J2人妻女神梁芷珮計劃帶團遊意國:試吓水溫!|香港01|即時娛樂

J2人妻女神梁芷珮計劃帶團遊意國:試吓水溫!

撰文:
最後更新日期:

J2旅遊節目《潮什麼》系列主持梁芷珮(Christy)多年來,一直深受網民歡迎。身為三名子女之母的她依然樣靚身材正,更被封做「J2人妻女神」!正在播出的《意大利潮什麼》Christy就繼續帶大家玩轉意大利,到訪意國十三個城市,令不少觀眾都郁郁想訂機票!Christy日前就在IG順意民意,計劃開團帶大家去旅行,短短幾小時已經收了超過30個私訊話帶興趣參加,認真厲害!

Christy接受《香港01》訪問時就透露因為一直好多人問她會否帶團,她稱:「仲係初步階段,試水溫睇吓係咪真係咁多人想跟我去玩!其實一路都好多人問我會唔會帶團,因為我好多節目嘅內容好多人都話去唔到。我都一路都有諗法,但就未正式去籌備,咁啱呢一排我去完北歐返嚟,好似有啲時間可以試吓,真係越嚟越多人問我,所以先有呢個構思!」

Christy透露自己最近剛完成北歐的拍攝!(IG圖片)

+8
+8
+8

問到Christy怕不怕帶團會辛苦,她就稱不會:「我唔怕辛苦,因為我覺得好好玩。我平時拍節目真係我同我老公諗晒所有所有嘅嘢,由開頭諗地方,揀乜嘢內容啦,聯絡啦,去到現場拍嘢,除咗有人幫我哋剪片之外,其他所有前期同後期都我哋兩個自己搞,雖然好多嘢做,但我一啲都唔覺得辛苦,因為好難得會有一份咁好嘅工。你叫我坐喺office朝九晚五未必可以咁enjoy,呢一個真係寓工作於娛樂。好似我哋最長去30幾40日,完成一日假都冇得放,日日朝早7點出去拍嘢,夜晚9、10點先返嚟,返去酒店再入片,但我哋都好enjoy好開心。」

旅行團計劃仍是初步階段!(IG圖片)

+3
+3
+3

除了帶團外,Christy亦計劃出旅遊書:「其實好早有人叫我出,但嗰陣出版商想我出亞洲,我唔熟所以就推咗。有時間我會出關於歐洲旅遊書。(會唔會出寫真?)寫真就冇謂,一把年紀仲出咩寫真,出有資訊性嘅旅遊書好過啦。」而Christy亦計劃做KOL,她稱:「我會拍做gym video,因為想做多啲啲人好有興趣,成日會問我嘅嘢。(幾時開始做gym?)呢幾年開始做gym,11月拍新劇《她·她·她的少女時代》先做好密,幾乎每日都去做,就算唔做gym都會boxing或者跑步。因為喺劇入面做曹永廉嘅情人,仲要衣着都幾貼身,所以努力練腹肌。(怕唔怕KOL競爭大?)唔怕,因為每個人都有各自方法,我自己心態都唔睇到咁大,因為我每日都會做運動,只係叫老公拍埋,修剪睇靚少少等人容易啲睇,有興趣咪睇囉,覺得冇用嘅咪唔好睇囉!」

生完3個,竟然可以keep成咁...(IG圖片)

Christy和阿廉有大量對手戲!(IG圖片)

+2
+2
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。