梁芷珮白恤衫露「胸」光　老公睇完冇反應嘥料

藝人梁芷珮與老公Ken育有3名子女，成為人妻嘅佢，向來都唔吝嗇晒身材，呢日佢喺社交網上載新造型相，見換上齊陰髮型嘅佢，着住性感開窿白恤衫，大騷「事業線」，獲網友讚新形象夠新鮮，似足何雁詩同周汶錡嘅混合體！

佢喺社交網透露今次拍攝係要幻想瞓醒着住男朋友嘅白恤衫，令唔少網友笑指佢呢個造型，隨時會同老公生第4個小朋友，對此佢留言：「好難，未試過咁樣引誘我老公……佢又冇白恤衫，波衫就有。」

佢接受東網電話訪問，笑言咁多年未試過引誘老公：「我哋19歲就開始拍拖，之後結婚生仔，長期都有小朋友喺附近，所以冇引誘過佢。（真係冇試過着得性感去引誘佢？）佢見得我最多就係睡衣Look。（佢今日見到你呢個Look有咩反應？）其實佢對我任何造型都冇感覺，唔知點解，佢超級佛系。佢平時只會睇曲棍球比賽，入波嗰陣先會有反應！」佢又指依家仲未習慣新造型：「未試過咁樣，但我好鍾意，感覺好新鮮。（有人話你似何雁詩加周汶錡！）我見到呀，可能髮型師都係幫周汶錡整頭髮，所以都有少少似，都有人話我似米雪！」