桑馬達要求解約　時隔10年再戰西甲

最強博彩盤路過關神器《串績王》：http://win.on.cc/football/　

西班牙中場桑馬達今季喺曼聯長居後備，雖然佢張合約仲有半年先至完結，不過據英國《太陽報》消息，呢位33歲老將正同曼聯商討提前解約，希望可以喺1月轉會窗，以自由身加盟西甲嘅皇家蘇斯達。

桑馬達喺今季英超仲未踢過1分鐘賽事，曼聯亦無意同佢簽新約，依家只係等合約完結，不過桑馬達喺西甲仍有市場，皇家蘇斯達正向佢提出斟介，但前提係要免費轉會。報道指桑馬達已要求同曼聯提前解約，而曼聯新帥蘭歷克亦無意勉強留人，好大機會如桑馬達所願。

桑馬達喺2011年離開華倫西亞，過去10年分別效力車路士同曼聯兩大英超勁旅，嚟緊有望相隔10年後再戰西甲，除皇家蘇斯達率先出手之外，有傳巴塞隆拿亦考慮加入戰團。