【2022年9月7日】

栢天男（Adam）與鐘錶品牌合作推出腕錶，今日Adam出席發布會，並分享首次設計腕表的心情。本身讀大學時主修藝術與設計的Adam，透露入行後有十年未有拎起枝筆設計，但對設計的那團火未有熄滅，談到他對設計有心得，過往可有設計物品送畀女友？他笑說：「我直頭畫埋佢個樣，你要對嗰樣嘢有感覺先可以畫到！媽媽都有送過。」
另外，現正忙於為電影《錄影歹》拍攝的Adam，見他眼紅紅，他笑言今早六時才收工，不過今次能夠跟李施嬅、關智斌合作好開心，兩人也是很欣賞的藝人，大家擦出不少火花。
談到跟英國導演Bizhan Tong合作，他說：「他無論對鏡頭、演員的表情，當時諗乜都睇得好清楚，他是一個好考究的導演。」

繁體中文

《Viu1》娛樂新聞，搜羅本土及世界各地每日至Hit娛樂資訊，以及藝人名人專訪、專題，搶先介紹本土電影音樂製作，以嶄新的報導方式，為你帶來全新娛樂感受。

Viu1 娛樂新聞 2022

【2022年12月31日】

《毒舌大狀》今日請全港巿民免費搭摩天輪，黃子華、Dee哥何啟華、謝君豪、栢天男、王丹妮、Fish廖子妤、Renci楊偲泳拉大隊去中環海濱宣傳，即席敲鑼預祝票房大賣。子華神對《毒》片票房有信心，仲笑言如果超越到《飯戲攻心》嘅7千幾萬票房，相信海陸空慶功不是夢！講到呢期興po泳衣照派福利，Dee哥笑言以往經常扮女人，儲落唔少泳衣相，可以派畀大家，但聽到子華神講得栢天男有資格騷美色時，Dee哥即刻「褪軚」話自己會跳段舞當福利，但預告農曆年一定會入戲院謝票見fans！
至於女子組就對派泳裝福利耍手擰頭，Renci仲反推舉Dee哥除褲跳舞，大讚佢「好勁」，驚人到連Fish都忍唔住問幾時見過Dee哥除褲跳舞，笑Cry呀！而Fish都冧爆話會帶男友小野入場睇戲呀，各位Fans可以求偶遇噃！

【2022年12月31日】

《毒舌大狀》今日請巿民坐摩天輪，一班演員黃子華、Dee哥何啟華、謝君豪、栢天男、王丹妮、廖子妤、楊偲泳齊齊現身中環海濱宣傳，仲預告如果票房大收會派福利，想知有咩福利，睇足本訪問咪知囉！

【2022年12月31日】

Kayan9896、組合MC $oho & KidNey同三缺一樂隊RubberBand噚晚現身主題樂園出席音樂派對，以吸睛性感look上陣嘅Kayan唱新歌炒熱全場氣氛，不過竟然唔小心敗喺最後一粒音，事後MC $oho man爆護花：「由佢走，出去玩吓先囉！」又搞笑話自己每隻歌都可以好似Kayan咁勁hot扭腰，但要下次先可以示範，依家開行turbo出歌，希望再下年有面目出席頒獎禮！

RubberBand主音6號帶病演出仍然發揮超高水準，自稱仲係「一線」歌手嘅佢希望後日演唱會演出順利，三子仲希望身在北海道嘅阿正能夠趕得切返港出騷，如果唔係就要行plan B：「畀張online飛佢睇。」另外，佢哋宣布好消息，就係明年3月會跑歐洲tour，暫定4站，簡直係未出發先興奮！

【2022年12月31日】


Jeffrey魏浚笙搶先成為2023年樂壇新人，噚日佢就去到銅鑼灣同過百名咖啡豆快閃睇處男作《第一個迷》MV，Jeffrey見到咁多歌迷支持自己都忍唔住嗌好感動！MV上架一日就登上熱門影片第1位，氣勢強勁，Jeffrey超開心咁呼籲大家繼續loop，仲自爆已經睇咗廿次咁多！

講到Edan笑佢唔着衫睇MV首播，Jeffrey自我放棄mode話：「由我啦！」不過佢都好多謝兄弟以及多位圈中好友出ig story支持，諗定「以身相許」報答，其中天后Sammi鄭秀文亦係佢勁厚面皮咁親自拜托幫手，並許願希望可以同天后合作。

提起張半裸出浴cover，Jeffrey笑話係佢自己揀嘅，但竟然勁快落閘話再出歌就着番衫，又自封做「密實哥」！至於上次阿正一句「一對新人」事後勁大迴響，Jeffrey隔空叫阿正唔好走數，兼以競爭對手身份嚟個下馬威：「你小心啲，把握好啲！」真係笑爆嘴呀！

【2022年12月30日】

出道2年嘅男神Jeffrey魏浚笙噚日(29號)推出首支個人單曲《第一個迷》，搶闖做2023年樂壇新人，實行歌影視三棲發展，而同日上架嘅MV，一晚時間就登上熱門影片第二位，認真威水！Jeffrey更獲圈中一班好友包括5膠、MIRROR嘅Stanley同Alton、鄭秀文、毛舜均、百萬同居計劃嘅拍檔黃德斌、簡慕華以及練美娟等幫手大大力宣傳！
為咗一圓歌手夢，Jeffrey今次自資6位數字打造新歌兼拍MV，仲邀請咗Hanna陳漢娜助陣做女主角，今次要同Hanna演一對情侶，Jeffrey都覺得好緊張，事關喺MV入面佢要同Hanna冷戰，但現實生活中，Jeffrey甚少同女朋友意見不合，搞到要靠想像力去完成呢啲戲份啊！而Hanna亦大讚Jeffrey，除咗搞笑之外，亦係情深嘅暖男，唱起歌嚟咁感情性，仲話希望Jeffrey出年可以成為新人王添！

【2022年12月30日】

「雙謙」林家謙、Jay Fung馮允謙咁啱得咁橋一齊攞「勁爆男歌手」大獎，前者仲係首次獲得呢個殊榮，所以家謙話心情寧舍開心，加上今年出完大碟、再出黑膠、又開埋處男紅館騷，認真喜事連連！不過家謙話呢年為咗儲歌開騷都真係開行turbo寫歌，嚟緊要好好整頓一吓自己再出發，如果唔係就會好大壓力！

Jay Fung同「勁爆女歌手」之一嘅鄭欣宜孖住受訪，全程對欣宜口花花喪flirt勁搞笑！佢哋仲各自拎埋「勁爆歌曲」，齊齊多謝大家嘅支持，又話對今年成績好滿意！另一個共同點就係佢哋都會喺明年3月開紅館騷，唔知會唔會互做嘉賓呢？欣宜又開心話終於收到Jay Fung為佢寫嘅歌，但可能要喺下下隻碟先面世，唔緊要㗎！慢工出細貨嘛！

至於今日（30日）開首個自資演唱會嘅Alfred許廷鏗，喺九展總綵排飛過嚟攞獎，做訪問期間一邊話唔會劇透，但一邊又勁搞笑係咁自爆個唱內容，真係好鬼死期待Alfred着小deep V嘅歌衫跳唱呀！佢又特別點名讚Jeremy唱live非常出色，尤其係妖艷feel單眼好強勁，即刻想跟隊學習！

【2022年12月30日】


樂壇第一張成績表《新城勁爆頒獎禮 2022》噚晚喺會展盛大舉行，眾望所歸男團MIRROR以團獎加個人獎捧走9個獎成為大贏家，惟單計個人獎就以張敬軒攞3個獎做「獎王」；而大獎「勁爆男、女歌手」排名不分先後有林家謙、馮允謙、姜濤、鄭欣宜、泳兒等；至於「勁爆我撐新人」得主就係Jeremy@MIRROR；值得一提係「勁爆組合」分別由MIRROR、ERROR、P1X3L奪得，全部都係《全民造星》出身，場面溫馨又有愛！

MIRROR是晚9缺3 chok爆現身，除了腳傷嘅姜濤之外，Alton、Tiger齊齊請病假。隊長Lokman勁冧話最開心見到「壞男孩」Jeremy攞新人獎，而Jeremy亦勁豪氣話要請食飯！分別攞「勁爆唱作人」、「勁爆我撐歌手」嘅Ian、Anson Lo均預告將有新作推出，咁啱公布新歌名《LOVERSE》嘅Edan就話估唔到有「爵屎」估中，咁就要好好獎勵吓啦！再講到姜濤、Edan、Anson Lo同AK喺「全球百大型男」靚仔過碧咸，佢哋抵死隔空讚碧咸「Handsome」。

193早前曾豪言如果ERROR攞組合獎就裸跑，呢晚獲頒「勁爆組合」獎後佢糾正係要喺指定嘅頒獎禮，仲胸有成竹咁話唔使裸跑，除非！有某團體突然解散！仲話佢哋4個人敵唔過12個人嘅力量！「勁爆新人」得主之一嘅保錡訂下明年再出跳唱歌心願，同時又搞笑密謀下年冧莊，真係邊個夠佢嚟呀？

P1X3L坦言攞組合獎好驚喜、好有鼓勵性，三子又不約而同話多謝漏人。其中Phoebus仲奪得「勁爆新人」獎，佢話之後會再努力出歌，仲睇好兩位兄弟下年攞新人獎添！

【2022年12月29日】

林家謙首次喺新城頒獎禮攞到「勁爆男歌手」大獎，仲憑《某種老朋友》獲得「勁爆歌曲」，第一張樂壇成績表就有咁好嘅成績，佢人如其名「謙」稱對其他頒獎禮抱平常心。頒獎禮一開始家謙同今年新人出場，佢指好似見到自己個影子咁。另外，講到老友張敬軒「中招」，家謙話都有慰問佢，然後再提起聖誕節同Serrini交換禮物，Serrini拆禮物嬲嬲豬一事，家謙就咁回應啦！各位樹林黨記住要睇片啦！

【2022年12月29日】

「激甜」足本訪問注意！「雙J」Joyce鄭欣宜同Jay Fung馮允謙各自攞完「勁爆歌曲」、「勁爆男、女歌手」大獎後受訪，Joyce怕醜話被Jay Fung Flirt！

事關Joyce一嚟就「曬命」話收到對方隻新碟，上面寫住「cutest and sweetest」；之後又講到雙方都喺出年3月開紅館騷，Joyce諗番起起上次開騷嘉賓之一嘅Jay Fung送咗蜜糖畀佢，話sweet到唔捨得用，Jay Fung即刻講咗句：「你唔用，下次諗唔到送咩！」簡直係爆甜！另外當然唔少得講得獎感受啦，即刻睇片！

【2022年12月29日】

男團MIRROR喺《新城勁爆頒獎禮2022》掃走9個大獎繼續做大贏家！受訪嗰陣隊長Lokman指Alton、Tiger請咗病假，搞笑話已經諗定叫佢哋萬歲「賠罪」！之後又話最開心係見到Jeremy攞新人獎，Jeremy一嚟就勁醒目話請食飯，仲即場示範「最壞一面」，相信睇緊片嘅Unicorns實暈到一陣陣！

有拎個人獎嘅Ian、Edan、Anson Lo、Jer、AK都有分享得獎感受，某成員仲自爆埋新歌動向添！最後講到姜濤、Anson Lo、AK、Edan喺「全球百大型男」榜上有名，四子齊齊撼贏碧咸，AK笑話唔太在意，相反Edan就自信心爆棚話實至名歸，爆笑足本訪問唔係唔睇呀？

【2022年12月29日】

「宇宙天團」ERROR喺《新城勁爆頒獎禮2022》獲頒「勁爆組合」，其中保錡仲攞埋「勁爆新人」！四子抵死自嘲以樂壇「四隻企鵝」拎到大獎都好興奮，阿Dee直頭話要進化做皇帝企鵝添！

提起193之前話攞到組合獎就要裸跑，點知佢話要指定頒獎禮先認數，兼再加把口笑話：「4個人敵唔過12個人嘅力量！」有記者提議之後同MIRROR crossover一齊爭獎，佢哋就爭住認係畜牲，真係笑死無命賠！最後肥仔仲獻計畀保錡下年再冧莊拎新人獎，點知保錡自己都有妙計，即刻送上足本訪問！

【2022年12月29日】

「舞台劇教父」詹瑞文以幕後掌舵人身份，一人兼任沉浸式美食劇場《異世界—捕夢之旅》嘅藝術總監、編劇同導演，將舞台表演融入美食，內容仲相當貼地，有大家最愛嘅MIRROR，詹Sir都話想同鏡仔合作呀，仲點名讚一位鏡仔最有喜劇天份添，想知係邊位？記得收睇足本訪問喇！

【2022年12月29日】

Jay Fung馮允謙噚晚以白馬王子look舉行新碟《LOVE & LOSS》發布會，除咗有屋企人撐場之外，釗峰、on仔都有嚟support！期間Jay Fung大唱4首歌兼專登編咗一首精選medley送畀哥哥，瞬間將發布會變成mini concert！

戲肉嘅部分就係佢喺最後宣布明年3月殺入紅館開演唱會，呢個機會等足11年呀！佢命令大家千祈唔好離開香港，事關上次Jay Fung開九展騷嘅時候孖生細佬Tim去咗旅行，搞到Jay Fung堅係嬲，而咁啱呢次哥哥話可能做嘢睇唔到紅館騷，佢都即刻話唔嚟就冇兄弟做！至於未婚妻啦喎⋯ 就梗係要嚟啦！

籌備演唱會同時又要為《全民造星V》做導師，Jay Fung話行程充實到唔想休息，又爆最近面試都睇中幾位參賽者，不過都要再慢慢觀察吓嘅！

【2022年12月29日】

Eason紅館誇年騷噚晚順利唱到第十五場，因為26號Boxing Day晚，Eason賣大包節日限定唱咗一段《浮誇》，噚晚再有觀眾起鬨嗌《浮誇》，Eason笑問：「我介紹新歌你哋聽啦！有冇聽《人啊人》啊！《浮誇》老歌嚟！我第一隻入新藝寶出嘅碟，05年6月7 號，我記得晒我出碟日期，係咪好變態？哈哈哈...」為免顧此失彼，Eason都即興唱咗其中一段《浮誇》。

之後Eason又憶起初出道表演時被冷落情景：「我人生第一個騷，喺香港會議展覽中心，當年連自己歌都未有，上台係唱我偶像張學友嘅《望月》。一路唱一路唱，台下啲人一路喺度十五、二十....因為係人地廣告公司春茗。我依家仲記得唱完之後，我返後台，好嬲，發誓以後要唱歌好聽到佢哋個膀胱爆都唔去廁所！留喺度聽我唱！當年 21 歲！好有動力，過咗幾年，人大咗，人哋尿急到塊臉變紫色都唔俾佢去咩？勸都勸佢去啦！」而噚晚就有Stephy鄧麗欣、何超蓮、何超雲、華納新人Nancy、蘇志威、楊彤@石山街等等嚟支持。

【2022年12月28日】

陳蕾同Yoyo岑寧兒一連五場嘅九展音樂會《PANTHER X YOYO：We Wish You A Warm Winter》順利完成，呢對老友用靚聲獻唱《RIDE》《相信一切是最好的安排》《言之無物》，陪fans冧過聖誕！

【2022年12月28日】

一連五場嘅九展音樂會《PANTHER X YOYO：We Wish You A Warm Winter》順利完成，陳蕾同Yoyo岑寧兒呢對老友用靚聲陪fans冧過聖誕節，死黨洪嘉豪同陳凱詠都有到場支持！喺Encore嗰陣陳蕾同Yoyo除咗互爆秘密之外，當然唔少得fans期待已久嘅Mario Kart大賽，5場得出嚟嘅結果係Yoyo 3勝、陳蕾1勝，尾場就打成平手，齊齊唱Encore歌！自認好勝心強、對自己期望高嘅陳蕾，爆頭場一輸即刻收到勁多人嘅安慰，佢自己就當手制係壞嘅了事，又對Yoyo原來私下有練車不忿，認真爆笑！

至於講到「日劇迷」陳蕾首Encore歌就係最近勁hit、宇多田光首經典歌《First Love》，笑問畀張敬軒喺演唱會唱先會唔會覺得唔抵？佢話反而覺得唔抵係開騷嗰陣個熱度過咗，又謙指唔敢做港版宇多田光，而呢兩位老友仲話想完騷返「鄉下」去大阪嘅賽車樂園玩番轉添！

【2022年12月27日】

保錡、濟哥、麥子樂、胡子彤、周祉君等今日出席微電影《足動生命》首映禮發佈會，其中保錡喺戲中飾演無家癮君子，之後因踢足球改變一生，佢笑話開正佢嗰瓣踢波，至於「吸毒」就參考《門徒》、偶像張家輝喺《走投有路》嘅演繹，又分享「吸毒」難忘事。

講到經理人濟哥都有份演出，保錡話今次冇同框機會，但讚濟哥喺演藝界嘅表表者，期待之後有機會可以喺演戲上過兩手，可以試吓調轉經理人、藝人身份咁話！問到年尾頒獎禮有冇信心攞新人獎？佢抵死話冇，仲預知自己嚟緊十年都冇獎拎。

飾演社工嘅麥子樂大讚「收數佬」193演得好好，笑話喺旁邊偷師。胡子彤就笑話同保錡做對手戲最緊要忍笑，仲話之後想同ERROR四子一齊拍文戲，呢個反差萌肯定好精彩，就睇吓古生有冇興趣投資啦！

【2022年12月27日】

陳奕迅《Fear and Dreams演唱會》噚晚嚟到第14晚，繼平安夜同聖誕節，Eason都因為節日賣大包為Fans一再安歌。噚晚Boxing Day，Eason以自己鼓勵大家，「好似跳舞咁，你哋都得㗎，我排舞時同dancers 跳 ，佢哋叫我做啲動作，我覺得自己好核突，哈哈，所以我排舞唔望鏡㗎，從來唔知自己跳成點，隻腳又粗額頭又闊，哈哈哈...但係既然我都做得。」佢鼓勵大家做任何事最緊要係有態度，「記住！ 唔好唔型、唔好俾韓國人型晒先得㗎！你睇我唱《浮誇》時，佢哋個d 樣...」Eason即席扮演一個呆樣，全場觀眾即拍掌歡呼讚同，並起鬨叫佢唱浮誇，佢一開始都話自己老啦，又冇準備唱《浮誇》，但最後都被Fans嘅熱情打動，「既然你哋咁想聽，唉，Christmas Special 唱幾句啦。」並喺樂隊用琴伴奏下唱咗一小段《浮誇》，呢份boxing day大禮，令觀眾開心到飛起！

【2022年12月26日】

陳奕迅入行咁多年，第一次喺紅館過聖誕開騷。因為要應付二十幾場演出，防疫上要非常小心，所以Eason除咗往返紅館之外，基本上連休息嘅日子，都係一個人留喺酒店，就算係普天同慶嘅聖誕節，佢都係一個人過Lonely Christmas。

所以噚日一班工作人員，特別為佢安排驚喜，趁佢唔察覺將佢嘅座駕，佈置咗聖誕裝飾，喺聖誕車廂一路聽住《蒸糕Bell》一路返紅館。到上台綵排時間，舞台又突然響起聖誕歌，見到所有dancer向佢衝埋嚟，一齊又跳又唱聖誕歌，祝佢聖誕快樂兼送簽名聖誕咭，搞到Eason都有啲措手不及，然後佢都同大家送飛吻回禮！其實大家仲準備咗一條影片送俾佢，裡面收錄咗呢十三晚嚟睇騷嘅圈中好友對佢講嘅說話，為佢打氣！

演唱會上，Eason除咗清唱聖誕歌俾大家之外，更加Encore咗兩次，滿足歌迷嘅要求，唱咗大家都好想聽嘅《Lonely Christmas》！

【2022年12月26日】

《Let It Snow C AllStar Live 2022》噚晚尾場，「皇上」阿King喺台上宣布做老竇，C AllStar隨即唱出歷代兒歌串燒，送畀「太子」做禮物，令台下觀眾high爆啊！

Viu1 娛樂新聞 2022

娛樂新聞

第741集

標籤

僅限本集

字幕