人稱「政壇美女」的人民力量主席袁彌明（Erica），一二年豪花一千九百萬買入跑馬地千五呎單位自住，貪間隔見使廳大房大，景觀開揚、風水好，又有齊裝修，搬個篋即可入住，原本單身的她，更一心打算以此作為姑婆屋住過世。

不過，宣布年底與「謎網」行政總裁林雨陽拉埋天窗的Erica，嫁雞隨雞將搬到未婚夫新置的物業。臨別秋波，對這間曾作同居愛巢的屋，仍滿懷依依不捨，她說：「應該都唔會賣，可能租出去一、兩年後，再搬返嚟。」難得一遇心頭好，同生命中找到真愛一樣，同間屋談一生一世的戀愛。

年底結婚後，Erica將短暫告別她原先打算作姑婆屋的現居；一千五百呎的單位，偌大的客廳，裝修是上手留低，Erica僅作小改動，加添吊燈、窗簾和梳化作粉飾。

算爆揀樓

港姐出身，○七年與無綫反枱走人的袁彌明（Erica），經營女士化妝品、護膚品等生活百貨，搞得有聲有色。去年，她更當選激進政團「人民力量」的主席。身為女人，辣到不能再辣，而以她「辣椒仔」的本色，揀選的安樂窩，自然是「算爆」，計過度過最好先買。

○九年，Erica原來早已有意購入這個單位，但因資金投放在生意上，而未能成事。事隔三年後，單位由一千一百萬升到一千九百幾萬，業主更企硬一毫子都唔減，但她依然決定入市。而豪言睇過一百至二百個盤的她說：「睇嚟睇去，最好都係呢度，廳大房大，千五呎單位，實用千二呎，望出去有樹，前面係馬會，永遠唔會無端端起幢樓喺前面，樓望樓。」

目前和未婚夫林雨陽同居的Erica，將兩人外遊時的恩愛合照，放在一入門的飾櫃之上。

房間擺設簡潔至上，但喜歡英式鄉村風的Erica，特別購買一個英國大圓鐘掛牆以作點綴，收畫龍點睛之效。