林鍾一戰 張致恒battle大J
疑減磅失敗 或需賠償
林鍾一戰——林作同鍾培生上擂台。香港人由食花生到課金買飛入場，激動到就連九巴都話要遷就佢哋改班次，七師傅亦擇好時辰，去林家「作法祝福」。成個戲棚搭好晒，估唔到有人彈出嚟搶fo，佢就係大家嘅童年回憶——前Boyz成員張致恒（Steven）。
Steven早前因為一個「色」字形象插水，債主Naomi臨門追數，為養妻活兒，而家主要北上登台。參加「林鍾一戰」對決YouTuber大J，Steven話係想藉拳賽令大家睇到佢想改變嘅決心。
點知距離拳賽得9日，3月5號仲係81公斤嘅Steven，疑似未減磅成功。大J於社交網表示，收到大會來電，問佢可否把合約上的對賽體重（70公斤）調高。大J講到明：絕不妥協。
大J喺片中嬲爆：「原因係乜嘢？我諗係九成九我嘅對手梳於訓練梳於練習，冇將體重降落70公斤。其實我哋有5個半月時間準備呢場決賽，當時佢報自己體重係81公斤。其實佢係絕對絕對夠時間。」
大J質疑Steven未減到磅，相信大會方面一定會對佢有懲罰，例如罰錢，但要等到17號先知對方實制有幾重。大J講明：「我係絕對唔會妥協去配合佢，我哋合約寫明70公斤就係70公斤！」
睇番Steven IG同YT，唔係經常出post，而且多數都係晒下幸福、貼下妻兒相，幫老婆慶祝生日、帶小朋友去公園玩咁，操肌post得一個——就係疑似跑山，但都係得一張相，可能佢出過好多操肌IG story但大家錯過咗啦！
