政Whats噏：5年任期將盡　林鄭自爆周身骨痛

被外界形容為「好打得」嘅特首林鄭月娥，任期剩返不足3星期。喺佢5年嘅特首生涯即將走到盡頭之際，佢今日(15日)出席一個公開活動時自爆，話自己周身骨痛。

林鄭今早出席靈實醫院信望愛樓開幕禮，致詞時佢提及大樓內唔單止設有復康室，亦新增水療池，特別為腰背痛、膝頭痛症同下腰背關節痛患者提供訓練，跟住爆肚話「其實我這幾方面都痛，或改天要來一來這水療池，加快康復」。

其實喺舊年10月，佢喺禮賓府樓梯上跌倒，右手手肘輕微骨折，仲要「打石膏」，亦曾喺今年2月嘅記者會上，叫記者提問「大聲啲」，仲話自己「最近聽嘢唔係聽得好清楚」。

林鄭呢5年任期，本港飽歷修訂《逃犯條例》風波同疫情夾擊，政府施政失誤同抗疫不力，令港人五勞七傷。佢接受外媒訪問時亦承認抗疫工作有不足，但被問及係咪願意為任內發生嘅事向港人道歉，佢話「不會」，又話希望向丈夫同兒子道歉，家人為支持佢服務香港市民，將香港建設為中華人民共和國一部分嘅使命而作出咗犧牲。