孖妹S檔案：點炒轉板股 唔使手震？
魚缸股友日日落行收風，無非都係想同一眾戰友交換股壇最新消息，甚至合力揀股提高勝算啫，佢哋唔要求贏盡全行，但求每日贏幾餐茶錢。不過，隨住今年嘅潛在黑天鵝逐一飛走，股友嘅生活被轉板股劃破平靜，先有護老股百本醫護（02293）轉板前跳彈床，轉板後轉跌；後有研究轉板嘅雲裳衣（08127）一度單日急飆近五成，究竟轉板係神之祝福定係死神之吻，想趁升勢坐吓順風車又有冇行呢？
會計師：變陣誘因多 唔止殼價
林：香港立信德豪會計師事務所董事 林鴻恩
彩兒：究竟創業板股轉板有乜着數？點解投資者又會追住轉板股嚟炒？
林：現時創業板股份比兩、三年前多咗好多，有270多隻，於是轉板嘅情況都多咗，以一五年為例係有十幾隻，因為主板嘅名聲好、股份又大隻啲，殼價亦會高過創業板一倍，創板殼價係3.5億至4億元，主板係6億至7億元，本身創板股市值原本多數得幾億元，市場上會有「聰明錢」睇實近幾年業績比較好、符合到轉主板條件嘅創板股，猜測佢有機會轉板，咁就會有投資者一窩蜂入場，不過呢啲消息唔係秘密嘢，跟緊啲財務報表就會睇到，所以隨時有接火棒嘅風險。
倘失敗股價恐插水
林：搞IPO郁啲都要兩、三千萬元上市費用，但轉板就唔同，唔集資普遍只需要三數百萬元，加上創板上市要求較主板鬆，所以部分公司會捨難取易；即使上創板，財務上都會較易得到銀行擔保，所以上到市再考慮轉板……轉板誘因除咗殼價外，原因都可能係顧及唔少基金只可投資主板股份嘅規例，而且對客路、交易對手同銀行信貸都有提升作用。
Kitty：咁創板股一轉板咪似足水鬼升城隍？
林：轉板唔係必然成功，符合利潤門檻要求只係其中一個條件，失敗咗股價就有機會跌番落去，搞到摸頂……要留意整體審批係趨向愈來愈嚴，依家審批委員會會睇埋公司未來一年前景會係點，公司需要提交未來一年盈利同現金流預測，散戶得到嘅資料係不完全嘅。
一般審批要幾個月時間，喺呢段時間，委員會都會觀察公司盈利預測準唔準，因為有時會有不可想像嘅天災人禍發生，特別係外向型生意，例如出口咁，若然客人喺英國收開英鎊，脫歐後業績跌係唔可以預計；又或者係生產基地政變，咁就冇計。
投資專家：睇實CCASS洞悉先機
徐：資深投資專家兼港大教授 徐燦傑
Kitty：近排魚缸股友成日講啲創板股，Hit爆！
徐：近排轉板股突然成為焦點，係因為早排有唔少人入場博創板半新股爆升，一向創板都有畀人唔公平、唔公開、挾高嚟散貨嘅印象，喺駿傑集團控股（08188）上市半日即停牌後，配售上市嘅情況收斂咗，其實創板係一個低門檻嘅上市途徑，若第三年交到數，就可轉板，好似妹仔點石成金變成公主一樣。
愈近成本價愈值博
彩兒：點先可以避免中伏？
徐：創板股轉主板由來都會例炒一陣，炒到咁上下就落實轉板，喺冇乜人留意之時就散貨，所以投資者可以留意公告，睇吓有冇啲研究緊轉板嘅，會係一個信號，到時要睇吓股份股本結構，因為佢上市時規定街貨量要有25%，若然睇CCASS（中央結算系統），有單一券商持股有10至15%，基本上就已經夠乾身，容易炒上，喺北水氾濫之時，最緊要口號係「貨已乾，等亮光」。
炒股係資金行先、大陽燭行先，真金白銀掃上去，加上貨源歸邊，兩樣嘢夾埋嚟睇先係王道。早前百本醫護向下陰跌，再公布轉主板，愈近轉板日子就愈升，一轉板就散落嚟，其後又挾番上去，一般韻律都係咁。唔少創板股配售已經圍晒飛，街貨少，喺有消息出時，想避免中伏可用配售價做參考，愈近成本價去買，就值博率愈高。
Blogger：風險高 冇跟開咪亂掂
偉：偉哥投資手札Blogger 偉哥
Kitty：有唔少股友一聽到「八字頭」冧巴就手騰腳震，睇嚟大家嘅陰影都唔細。
偉：其實我自己都少炒創板股，我覺得唔少股友會認為創板上市時嘅盈利要求唔高，加上有啲股份係全配售上市，盈利跟唔上市值，甚至有例子係冇盈利，但係就有過百億元市值；再者，上市配售可以話係小圈子遊戲，有莊家活動嘅股份多，你可以扑中隻爆升10倍、8倍嘅股份，亦有機會踩蕉皮跣鑊甘。
睇估值及大升原因
其實想玩呢類轉板股，一定要睇吓個估值，了解大升原因，有部分創板股上市嗰陣已經諗緊賣殼，由於創板同主板嘅殼價差好遠，見過有股份一轉板即賣盤，例如隻龍傑智能卡（02086）咁，我哋可以計吓殼價同市值，睇吓股價反映晒未嘅。至於最近轉板嘅百本醫護，近期癲升過，如果睇番風險與回報，個人覺得現價唔值博。
彩兒：有部分創板股，好似雲裳衣咁，一話研究轉主板，單日可以幾成幾成咁升，如果高追咗，真係企咗喺度！
偉：咁你就要睇吓隻股未炒之前嘅股價同波幅喇，若然係大升大跌，業績又跟唔上市值嘅莊家式炒作，就有機會係放風轉板嚟炒，佢急升後打回原形，然後收貨，會係一個循環，若然係冇跟開個走勢Pattern嘅股友貿然追入，就好大機會喺急升後高追，跌低後又被震走，最怕係間公司玩財技，例如供股，所以冇跟開就咪亂掂啊。
賺幾千萬先可「跳槽」
為咗股友着想，我哋即時搵港交所問問創板股嘅轉板規矩，正所謂，力不到不為財，大家齊齊溫功課啦！
創板股申請轉板首要條件係，最近一年至少有二千萬元盈利，及前兩年累計至少有三千萬元盈利；過去一年無論係公司生意或者係公司管理層都唔可以有重大違規事件，同埋公司最少掛牌一整個財政年度等。一四年有7間成功轉板，一五年有14間，一六年就有6間，今年暫時只得1間。截至二月底止，港交所今年已接受嘅轉板申請只有2宗。
若有料報畀彩兒同Kitty或有嘢問，可電郵money.biz@on.cc
Kitty、彩兒