星光路上丨林景程親解做物理治療師原因 靠睇黃子華演活地產佬

林景程 年喺《香港愛情故事》演地產經紀Henry、《下流上車族》演「衰仔」演得淋漓盡致，為人印象深刻，現實中嘅林景程係演員及物理治療師，呢日佢接受 潘盈慧 Adwinner Poon 《星光路上》訪問，林景程當初參加新秀歌唱比賽躋身８強，後來再挑戰歌唱選秀節目《超級巨星》，佢曾一度諗住放棄，當刻希望畀自己最後機會，從而入TVB發展主力跳舞，直至拍《On Call 36小時》令佢愛上演戲。

林景程記得當時望住《On Call 36小時》演員好犀利，從中吸收好多嘢，後來同劇亦遇到好多勁人如：鄭嘉穎、秦沛、鮑起靜、黎耀祥及郭晉安，林景程指佢哋教好多嘢，分享好多經歷，又可以睇佢哋演繹，佢感到好幸運。

講到網民盛讚佢演《香港愛情故事》地產經紀好神似，林景程感謝導演畀好大自由度：「我好盡力返去諗點樣處理呢個角色，覺得呢個角色似子華神，睇咗大量子華神嘅棟篤笑，再望番個角色，而家要我做嗰個角色，要畀好長時間我再做，我好肯定而家係做唔到。」林景程笑指自己日常唔太講嘢，曾以為自己有社交障礙，要有合適話題先會講唔停，佢覺得自己比較極端同神經質。

林景程坦言初次睇《下流上車族》劇本覺得「閔家寶」呢個角色好衰，要調節自己演一個衰仔，鮑姐一直鼓勵佢要演得舒服，不斷給予鼓勵，記得鮑姐嗰場讀信戲，林景程不知不覺喊咗出嚟，連把聲都變得沙啞，呢場只係拍咗一take。

林景程去年與拍拖12年嘅圈外女友結婚，目前計劃生BB，佢除咗忙喺拍攝，間中亦到院舍幫手，相對時間比較易遷就，林景程回想之前想讀演藝，不過媽咪一直鼓勵佢，叫佢讀大學修讀物理治療，後來林景程亦如媽咪所願成為註冊物理治療師。

#林景程 #下流上車族 #OnCall36小時 #香港愛情故事 #星光路上