話說由《矛盾一生》開始，筆者已經好留意林家謙呢個作曲人。一來係佢嘅曲風比較優美，有好多鋼琴、弦樂嘅元素；二來係佢同筆者年紀相近，五官端正得嚟又有幾分文青Feel，講真如果我係Gay嘅話，應該會日日J佢J到精盡人亡。Anyway，其實今次唔係想講林家謙呢個人，而係想講佢第一首由自己演唱派台嘅歌 — 《下一位前度》。
登入 瀏覽本網站，可獲取積分換領專屬優惠
點擊查看專屬優惠
呢首歌未睇歌詞，淨係睇林夕起嘅歌名，已經覺得好有追看性。人生流流長，拍多幾次拖之後，慢慢你唔再係嗰個成日充滿幻想，覺得一旦遇到傳說中白馬王子就可以做少奶奶、以後過住無憂無慮日子嘅無知少女。即使經歷幾次錯愛，你依然能夠無畏地付出真心，但你心底裡亦知道，世界上冇一個伴侶可以保證同你走到最尾。所以每一次準備相愛，可能同時都要做好下一次分手嘅心理準備；由下一個戀人，變為下一位前度。
「不會得到最愛，最多只有更愛。這麼反覆比較繼續重複到未來，才明白愛情是我和自己的競賽。」
戀愛係一輩子嘅課題，無聊你係拍拖定結婚（其實我覺得分別唔大，只不過就係一張紙，仲有分身家嘅問題。重點係要睇你個人成唔成熟），每一段嘅關係都係交緊學費。想要結束一段關係，最大嘅原因，無非都係想搵到一個更適合嘅人，談一場更轟烈嘅戀愛。
但我哋好多時候反而忘記咗，要享受一段愛情，唔止係要搵到一個適合嘅人，更重要係自己識得打開心扉去愛人。如果自己都唔盡情去愛，就算畀你搵到真命天子，緣份最後亦只會從手指隙縫中流走，到時你又喊打喊殺話要繼續搵更好嘅男人，到頭來根本就係多舊魚。
「未結識到你，竟已先鼓起捨得的勇氣、放下的志氣；不想找到你就像前度再一起」
拍拖拍得多，換句話講亦即係分手分得多。愛情裡面，最忌就係麻木；麻木會令關係僵化，所有事情都冇辦法再激起你內心嘅波瀾。麻木以後，每一個伴侶嘅樣貌、體溫、互動，對你嚟講都彷彿再冇分別。
就算上星期親吻完A君，今個星期同B君喺床上依偎，下星期都已經煙消雲散。世上最令人害怕嘅唔係心傷，而係哀莫大於心死。
「彷彿怕麻木便老得很快。不想哭笑純熟得這麼快。」