【林鍾一戰︱林作擁抱戰術無被KO 鍾培生輕鬆勝出】
今晚「林鍾大戰」前夕,先由樂隊LMF演唱辣㷫個場,其中佢哋唱出《冚家拎》有大量粗口,唔知在場嘅Liza姐會唔會聽到皺眉頭呢。
鍾培生不愧係老闆,一出場啲影片特效多到暈,個人介紹仲成幾分鐘咁長,佢父母喺台下拍片拍得好開心。
講返賽事,「林作嬌喘一聲倒在鍾培生懷裏」算係半發生咗,因為佢成晚嘅作戰計劃係採取「逃避雖可恥但有用」,經常打一兩拳就主動抱住鍾培生打消耗戰,連裁判都忍唔住話佢消極作戰。
而評述都忍唔住問觀眾話林作咁打法,觀眾覺得點,全場即刻畀噓聲,去到第三回合林作終於積極少少,不過個樣已經超辛苦,第四回合去到最後10秒,林作更加係明顯體力不繼全程彎身,鍾培生輕鬆勝出。
賽後鍾培生樣子好似唔多滿意,佢話係有啲:「今日好多謝所有嚟嘅咁多位現場觀眾,我半年前話過好鍾意飲可樂,而家打完要即刻飲,我半年都冇飲,係因為大家嚟撐我,相信我,而每一日去操,係因為有班fans想同我一齊贏 我哋都做到,2021年我哋每個人都贏。」
林作就話:「多謝,好開心,唔小心打爆咗個鼻,我今晚唯一目標,我做到,yeah,打完一定要大方啲,都同鍾生講,多謝安排呢個咁好嘅比賽畀大家睇,佢係尊敬嘅對手,希望鍾生會再接再厲,再搵我打,下次double出場費。」
鍾培生就話:「多謝林作肯應戰,我expect佢一開場即瞓低走,而家頂咗4個回合,佢有努力練嘅,希望林作經過呢件事學識尊重人,抽少啲水,擂台最公平,好fair咁打一場,日後,我哋會冇乜機會再聯絡。」
--------------------------------------------------------
即刻跟住Follow 晒我哋Channel: