直擊!61歲吳岱融榮升「半億隱形樓王」 踢拖𥄫中複式豪宅

演技超晒班的吳岱融於15年回歸無綫,憑《巨輪II》大反派高天鷲一角入晒屋兼人氣持續高企,劇接劇未停過,播完《牛下女高音》被指演出有喜感,去年出街的《大醬園》繼續做大老爺,無論正邪角色都難佢唔到。努力搵錢的同時,其實吳岱融與太太鍾淑慧(Lily)亦投資有道,二人有錢即四圍買磚頭,唔止國內有物業、就連東南亞及香港都有樓揸手,保守估計手揸半億物業,絕對是圈中隱形樓王。本刊記者曾直擊吳岱融前往九龍城睇樓,大客仔駕到,地產經紀當然落足嘴頭,據知今次吳岱融睇了多個該區新建的豪宅樓盤,其中一個更是6千多萬的複式單位,吳岱融笑言自己有鋪睇樓癮,不過扑槌就交老婆話事,愛妻號吳岱融以行動證明錫老婆真係會發達㗎!

文、圖:東方新地

吳岱融 愈撈愈掂 榮升半億隱形樓王

61歲的吳岱融一頭灰白髮已成為個人標記,愈老愈型的他鏡頭前擅演一手遮天的有錢佬角色,現實生活中原來都是隱形富豪。過去幾年吳岱融愈撈愈掂,拍劇又拍電影,商演亦不絕,而其太太鍾淑慧(Lily)更是人如其名, 是個不可多得,賢淑又聰慧的老婆,早年她走 遍國內登台搵人仔,夫婦二人獨具慧眼,早年已投資買磚頭,之前鍾淑慧見時機成熟,把國內五個物業套現逾千萬,而他們現在仍持有的物業亦分布東南亞各地。

一頭白灰髮加花花恤衫,已經成為吳岱融的個人風格,愈老愈型的他,過馬路都有氣勢過人。 © 由 東方新地 提供 一頭白灰髮加花花恤衫,已經成為吳岱融的個人風格,愈老愈型的他,過馬路都有氣勢過人。

住慣大單位 買樓唔會揀窩居

據知情者透露:「岱融同Lily好多年前已經洞悉先機,佢哋鍾意喺外地生活,加上早年喺大陸搵到錢,所以物業都集中喺大陸同東南亞,不過近年岱融主要喺香港拍劇,留港時間多咗,呢幾年佢一直都係租屋住,見最近樓市好似有啲回落,所以有機會都想吼吓香港樓,不過佢哋喺大馬住慣幾千呎大屋,幾百呎唔會睇得上眼,如果買香港樓都要揀啲大單位,或者獨立屋。」在港忙於拍電影的吳岱融,早前與助手現身九龍城,本刊記者見他在地產舖前駐足近十分鐘,指住櫥窗內的樓盤招紙,與助手研究了一輪,有大明星駕臨,當然機不可失,店內兩名經紀即行出店外搭訕,未幾眾人即起行到附近的豪宅睇樓。

踢拖睇中複式豪宅 全權交老婆話事

本刊記者見吳岱融上了一個低層單位,單位望九龍城寨公園景,他跟隨經紀走出露台望景,不過望了兩望就返入 屋,看來這個單位並非吳岱融杯茶,之後未見他即時離開,未知是否繼續睇其他單位。約45分鐘左右,吳岱融徐徐步出,邊行邊興高采烈地與助手討論,莫非已經睇啱心水豪宅?

對於有意在港買磚頭,本刊記者致電吳岱融,他笑言老婆鍾淑慧不在港,絕對不敢輕舉妄動,「我唔係買樓,係睇樓咋!有時間咪睇吓囉,我不嬲有鋪睇樓癮,周圍睇,唔同地區都睇吓,時機啱同價錢啱先會入貨,不過咁大件事始終都要睇老婆頭,佢呢排唔喺香港,要等佢喺香港先再同我一齊去睇,我話唔到事㗎!」原來吳岱融當日還睇了一個叫價6千幾萬的複式單位,問他是否滿意,都係嗰句:「我滿意冇用,都要我太太鍾意啱佢心水。」

要睇老婆頭!(真實對白) © 由 東方新地 提供 要睇老婆頭!(真實對白)

做馬明父親演喜劇一樣得

至於工作安排,吳岱融說:「有劇拍亦會接電影,不過我好希望喺音樂方面可以有更多發展,好想開自己嘅個人音樂會。」吳岱融為無綫新劇《 BB來了2 》開工,飾演男主角馬國明父親,唔使做奸角演喜劇一樣得,再加上拍住出爐視帝一定有運行啦!

與鍾淑慧甜蜜廿四載

有指吳岱融從來都不管錢,他把所賺的錢全部拱手給太太鍾淑慧,讓她手握財政大權把錢愈滾愈大,而他們幾乎所有的物業,都寫在鍾淑慧名下,今時今日夫婦二人已是衣食無憂,工作以外可周圍飛享受生活。雖然吳岱融與鍾淑慧近年多在大馬生活,但吳岱融一家三口是新加坡籍,而他們的23歲乖仔Justin亦在新加坡大學修讀電影動畫。

如透過本文中的推薦連結購物,Microsoft 與合作夥伴或可收取佣金。
您可能有興趣的內容
意見反應

覺得故事有趣?

在 Facebook 上對我們讚好以查看類似故事


傳送 MSN 意見反應

感謝您提供意見反應!

請提供整體網站評分: