花幾百蚊去酒店食自助餐，十居其九都是衝著海鮮而去，一定要食盡最貴價的海鮮才算回本！當中要數最矜貴又受歡迎的，必是士頓龍蝦及阿拉斯加皇帝蟹！今次推介3間酒店自助餐，無限量供應波士頓龍蝦、阿拉斯加皇帝蟹，食法間間不同，一於食勻三間睇下邊間最合你口味！
登入 瀏覽本網站，可獲取積分換領專屬優惠
點擊查看專屬優惠
1.馬哥孛羅香港酒店
阿拉斯加的帝皇蟹有「蟹中之王」美譽之稱，生長於北太平洋的深水海域，環境無污染，天生天養，蟹肉特別肥美！馬哥孛羅咖啡廳自助晚餐供應一系列以阿拉斯加皇帝蟹入饌的菜式，蟹腳比身軀長三倍以上，啖啖鮮甜蟹肉滿足海鮮迷！同場仲有冰鎮松葉蟹同時令生蠔。
以蟹入饌的美食包括蟹柳配燒南瓜沙律、蟹子三文魚薯仔沙律及蟹肉芒果木瓜沙律等，由前菜開始帶你進入蟹王世界！食完前菜，輪到主食：其蟹湯、香辣蟹、咖哩蟹及蟹肉龍蝦批，每晚輪流登場，唔知你會遇上邊一道菜式呢？
馬哥孛羅香港酒店自助餐 INFO
自助晚餐時段：即日起至2018年10月31日 6:30pm–10:00pm
星期一至五價錢：$568 （成人）；$338 （小童）；$468 （長者）
星期六、日、公眾假期及前夕價錢：$628 （成人）；$378 （小童）；$528 （長者）
*須另收加一服務費
2. 太子酒店
太子酒店add@Prince推出海龍盛宴自助晚餐，每晚分別以日式、中西式、泰式等不同風格炮製來自波士頓龍蝦，除咗必定有的芝士焗龍蝦外，由清新的西式沙律，到充滿亞洲風味的泰式龍蝦美饌，全部都有龍蝦的蹤影！
沙律方面，雅枝竹龍蝦藜麥沙律係必食推介，當中以近年大熱的超級食物藜麥，並加入清新的雅枝竹，胃口大開。
中式菜式有京蔥黑椒炒龍蝦，有鑊氣兼略帶微辣，卸有豉椒龍蝦炒麵，爸爸媽媽一定鍾意。其他菜式包括西式甜椒龍蝦意粉、泰式龍蝦炒粉絲、金不換炒龍蝦、老干媽炒龍蝦及龍蝦燴伊麵等，日日不同，每晚輪流供應！
太子酒店自助餐 INFO
自助晚餐時段：即日起至2018年11月30日 6:30pm–10:00pm
星期日至四價錢：$518 （成人）；$318 （小童）；$498 （長者）
星期五、六、公眾假期及前夕價錢：$558 （成人）；$338 （小童）；$538 （長者）
*10歲或以下小童星期一至五免費
*須另收加一服務費
3. 香港尖沙咀凱悅酒店
食開buffet的一定知道食過香港尖沙咀凱悅酒店咖啡廳的自助餐，向來都有生猛龍蝦專區，今個10月逢星期五、六、日、公眾假期及前夕，將專區擴展為生猛阿拉斯加帝王蟹及龍蝦專區，無限阿拉斯加帝王蟹及龍蝦供應！
特別之處是，大廚會在食客面前即席烹調帝王蟹及波士頓龍蝦，夠晒新鮮，保證原汁原味，想一次過食盡龍蝦同阿拉斯加皇帝蟹，非香港尖沙咀凱悅酒店莫屬！
香港尖沙咀凱悅酒店自助餐 INFO
自助晚餐時段：即日起至2018年10月31日晚上6pm - 10:30pm
星期一至四價錢：$628（成人）；$314（小童）
星期五至日、公眾假期及前夕價錢：$688 （成人）；$344 （小童）
*帝王蟹及龍蝦只於星期五至日、公眾假期及前夕同時供應