2020年夏季奧林匹克運動會同臺灣有關嘅事

喺2020年夏季奧林匹克運動會期間，有唔少同臺灣有關嘅事。

日本Niconico網民開幕儀式直播彈幕聲援台灣獨立

今年奧運開幕儀式，日本影片分享網站Niconico都有直播。其中喺台灣代表隊出場嘅時候，有好多日本網民寫上「台灣獨立」同台日友好嘅字眼。另外喺香港同中國大陸代表隊出場嘅時候，亦表示支持香港民主運動、香港修例風波同埋用「武漢肺炎」、「元凶」、「責任」、「戰犯」等字眼形容中國。

台灣正名問題相關爭議

台灣喺奧委會一向以『中華台北』名義參與，但係今年一啲日本媒體直接用『台灣』做稱呼，引起一啲中國網民不滿。

開幕進場儀式國家排序

日本今次奧運開幕進場儀式，以日文五十音嚟排國家出場次序。雖然表面稱呼仍然叫台灣做中華台北，但暗地就以「台灣」嘅名義（タイワン）而唔係「中華台北」嘅名義（チャイニーズタイペイ）排次序，事件引發咗唔少中國網民不滿。

日本放送協會喺開幕儀式後繼續直呼「台灣」

日本放送協會（NHK）喺開幕儀式後，唔理中國抗議，繼續堅持為台灣正名。喺佢哋網站統計各國奧運獎牌得獎數嗰度，亦都係用「台灣」而唔係「中華台北」。

中國網民欺凌台灣藝人爭議

有啲台灣藝人，包括范瑋琪、徐熙娣、蔡依林、徐佳瑩、魏如萱同埋吳映潔等，因為支持台灣奧運選手而被一啲中國內地網民攻擊，話佢哋支持台獨或者辱華。就算有啲藝人已經避重就輕，唔提及「中華台北」或者台灣等字眼，佢哋都一樣遭受到中國網民嘅欺凌。事件引嚟台灣跨黨派譴責，而台灣文化部就以「沒有一位藝人，需要為了支持自己國家的選手而道歉」，寫文力撐台灣藝人。民進黨立委陳亭妃就形容，中國係用緊抄家滅族嘅方式審查言論，希望所有藝人睇清楚。

呢啲欺凌，就連內地都有聲音批評。其中范瑋琪被狙擊之後，內地新聞網站《多維新聞》都呼籲大家放過范瑋琪，唔好郁啲就話人台獨。

睇埋

• 2020年夏季奧林匹克運動會同香港有關嘅事
• 2020年夏季奧林匹克運動會同中國大陸有關嘅事