譚炳文設靈丨李香琴女兒代母送別摯友 謝賢持枴杖到靈堂鞠躬 | 娛樂 | 即時 | 20200921

譚炳文設靈丨李香琴女兒代母送別摯友 謝賢持枴杖到靈堂鞠躬

更新時間 (HKT): 2020.09.21 19:29

有「配音王」之稱的譚炳文於本月5日因肺癌病逝,享年86歲,今日假紅磡世界殯儀館地下世界堂舉行設靈及追思會,下午5時許,84歲的四哥謝賢現身靈堂外,當時炳哥女兒炳淑瑩剛在殯儀館門口接受訪問,四哥突然出現,引來一陣混亂。

四哥一身黑衫黑褲打扮,落車後要用枴杖助行,一枴一枴略現老態,他亦禮貌地停下腳步,讓傳媒拍照後再進入靈堂鞠躬,及到親屬區慰問炳嫂,逗留約半小時後離開。四哥和炳哥都是粵語片年代小生 ,大批記者包圍四哥,問到與炳哥的難忘往事?四哥說:「講來講去都係嗰啲。」沒有停下來受訪,便與友人登車離去。

而炳哥生前的拍檔李香琴傳患腦退化症,琴姐女兒蕭紫筠亦有代母前來鞠躬。蕭紫筠離開靈堂時,停步接受訪問,問到有否將炳哥病逝消息轉告琴姐?她說:「我有同琴姐講,但佢精神有問題,思想有差異,冇乜表示,佢唔知老拍檔走咗,一路有老拍檔喺心。」並多謝大家關心琴姐狀況,至於現時琴姐身體狀況?她說:「身體好好,只係唔記得嘢,好似小朋友咁好開心,你講佢就聽。」

傍晚時分,天文台發出紅色暴雨警告,前來致祭的賓客落車時都有點狼狽。胡楓和羅蘭姐撐着雨傘一同到來,二人難掩悲傷之情,他們一齊接受訪問時更加眼濕濕。問到羅蘭姐心情平復?她搖頭嘆息:「唔係一時咁快,噚晚瞓到三點幾醒咗瞓唔到,識咗幾十年之前知道佢有病,但唔知佢有癌症,咁快就……」她透露疫情前大家也有見面,炳哥有否透露患病?羅蘭姐說:「我諗佢都唔知自己患癌症,之前只係話心臟有啲事。」提起大家相處難忘點滴,羅蘭姐不捨說:「好多嘢,一星期做三次EYT,有時見足五晚,冇辦法,人生嘅嘢。」修哥悲哀透露與炳哥未入行前已經相識,還記得當時炳哥做珠寶行業,兩人在工會一齊打乒乓波,相識數十載,修哥悲痛說:「我哋未入行前已認識,呢次佢嘅唔喺度令我非常難過、傷心,知道佢有長期病患,但估唔到係肺癌。」對於和炳哥的人生點滴,修哥說:「難忘事好多,講唔晒,亦都唔想講。」

尹飛燕、安德尊、鄧英敏、陳榮峻與太太吳香倫、劉雅麗與母親包曉華、徐小明、劉錫賢、黃夏蕙、尹光、葉尚華、溫柳媚、阮德鏘和太太、鮑起靜等先後到靈堂向炳哥作最後致敬。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner