娛壹 - 疫下冇菜賣三色豆關注組幫到你三色豆達人李綺雯教你煮：當買唔到菜，你就知佢係好嘢第一波...

娛壹

2022年2月8日

疫下冇菜賣三色豆關注組幫到你

三色豆達人李綺雯教你煮：當買唔到菜，你就知佢係好嘢

第一波 #疫情，市民搶（購）廁紙搶米，唔知而家用晒未。

第五波疫情，市民搶菜。但菜嘅嘢，擺得到今日，未必過到聽日。入雪櫃變雪菜，你又嫌冇營養喇。

因有本港跨境司機 #確診被禁足 #隔離，連累本港蔬菜供應受影響。據報道，今日菜價飆升至少三成，豆苗漲價一倍。有人趁火打劫，有菜販去超市大手掃菜拎返街市賣；有人開方便之門，#阿布泰傍晚宣佈即時重啟阿布泰網店，網店產品售價會與門市一致。有街市商販表示，菜檔已經閂晒，因為冇菜賣，肉檔價錢暫時同平時一樣。

冇菜食，確是令人苦惱，但香港人識變通，出大絕—— #三色豆。

【跟健身未婚夫一齊食三色豆】

三色豆同芫茜一樣，喜惡兩極，或者只好三色豆裏其中一款，all in就搞唔掂。不過大家有冇諗過，搞唔掂三色豆，可能同煮法有關。「𡃁妹」#李綺雯原來係「三色豆達人」，落到佢手上，可變化出十幾種菜式：「當買唔到菜嘅時候，你就知三色豆係好嘢。」 #三色豆關注組。

李綺雯先同大家介紹三色豆嘅營養：

．紅蘿蔔富含維生素A、β胡蘿蔔素，能幫助守護黏膜健康、增強保護力及保護眼睛；

．青豆仁含豐富植物性澱粉及膳食纖維；便秘者或排便不順暢人士可以跟精緻澱粉替換吃；

．粟米內含葉黃素、玉米黃素，對於經常對住電腦／手提電話人士及青少年都是必備的補充營養。

李綺雯回覆《娛壹》表示，食三色豆，係因為其健身教練未婚夫Ocean（梁愷傑）。Ocean要跟餐單進食，其中一項食物就是三色豆配雞肉。「佢食咗三色豆一排，而家發覺好彩餐單有三色豆；咁我又唔想去街市，所以我都食緊。其實三色豆都幾好吖，凍咗都食得！反而其他菜無論係翻叮定加熱都好難食，翻叮亦唔健康。」李綺雯話，如果真係接受唔到三色豆，可以選吃泡菜或沙律菜。

【蕃茄煮三色豆包開胃？】

既然搞得「三色豆關注組」，交流好煮意好正常，李綺雯提供嘅烹調方法包括：

．三色豆炒肉碎

．三色豆蒸蛋／炒蛋

．三色豆雞粒粒

．三色豆漢堡扒

．蕃茄煮三色豆

數到最後「蕃茄煮三色豆」，李綺雯都忍唔住笑。其實三色豆煮法真係可以無限延伸，相信煎魚餅都幾好味：「其實我都係呢幾日費事去買菜，所以先至食三色豆啫，又唔係日日食，都OK嘅。我都唔明點解啲人咁唔鍾意食三色豆。睇過大家嘅留言，覺得大家最接受唔到係青豆，但你哋又有冇食過烤青豆？再加啲wasabi，幾好食㗎。

「同埋大家有所不知，如果你去高級餐廳，唔一定用薯蓉伴碟，有時可能用青豆蓉承住一塊好靚嘅主菜，所以其實係好嘢嚟㗎！」不過提提大家，青豆同粟米屬澱粉類，如日日食要注意份量。

【開戶外動態training班消脂增肌】

李綺雯與健身教練未婚夫夾份開gym room「#Build肌」做老闆娘，疫下執手同行，只係防疫禁令有增無減，李都好無奈：「吓，可以點呀？而家全公司打晒針，但都唔俾開，咁可以點呀？惟有做一啲戶外訓練，大家如果想減肥，唔好諗住等『動態清零』、等健身室重開先至做，不如嚟我哋戶外動態training啦！」正如Ocean話齋，「正虎」令到大家越苦、幫唔到手，面對逆境要自強。

Gym room關閉，美容院又關閉，部份食肆停業，李綺雯話佢有啲廣告都hold住咗：「我喺香港開電視有個真人騷節目《開間咖啡店2》出街，本身有派咖啡宣傳活動，都因為咁而取消。」虎年啱啱先開始咋…

#娛壹

-------------------------------------

即刻跟住Follow 晒我哋Channel：

FB：http://fb.me/as1hk.entertainment

IG：https://www.instagram.com/as1.entertainment/

YT：https://www.youtube.com/channel/UCgaIJfwFLXQsasrffZt4cEw