李斯特城足球會

出自維基百科，自由嘅百科全書
李斯特城
Leicester City
全名李斯特城足球會
Leicester City Football Club
花名狐狸（The Foxes）
創會1884年
主場皇權球場（King Power Stadium）
（容納人數：32,500 人）
打緊聯賽英格蘭足球冠軍聯賽
2022–23英超第18（降班）
網球會網站
波衫供應adidas
波衫廣告King Power
主場波衫
作客波衫
第三作客
今季

李斯特城足球會（英文：Leicester City Football Club）係英格蘭足球冠軍聯賽嘅球隊之一，喺英格蘭李斯特城，喺1884年成立。

簡介[編輯]

李斯特城嘅前身「李斯特福斯」（Leicester Fosse FC）喺1884年成立[1] ，喺福斯路（Fosse Road）附近嘅球場比賽。1891年開始，隊波就搬到費拔街球場（英文：Filbert Street（英文：Filbert Street）），1894年，隊波被揀中。開始踢英格蘭足球聯賽。1919年改名做「李斯特城」。2002年，球隊離開費拔街球場，搬入附近嘅獲加球場，[2]2011年，因為易權而改名做皇權球場。

李斯特城奇跡咁贏咗2015年至2016年英格蘭超級足球聯賽，都係佢哋第一個頂級聯賽冠軍。對於博彩公司嚟講，呢次係體育界長久之來最慘痛嘅經驗，因為佢哋當初嘅高賠率要付出高昂嘅金錢[3][4][5]。喺攞到英超冠軍之前，李斯特城最好嘅成績係1928年至1929年球季（The Football League 1928–29（英文：The Football League 1928–29））獲得嘅亞軍。喺歷史上只有一季降班到第三級聯賽，並即刻喺下一季重返第二級聯賽。球會曾經七次贏得第二級聯賽冠軍（六次英乙同一次英冠），係英格蘭球會之中最多。

李斯特城曾四次喺1948-49、1960-61、1962-63同埋1968-69闖入英格蘭足總盃決賽，但係都攞唔到冠軍，係足總盃最多喺決賽輸波嘅紀錄。球會喺1971年攞到英格蘭社區盾冠軍，之後喺2016年屈居亞軍。球會都曾經喺1964年、1997年同埋2000年共三次攞到英格蘭聯賽盃。李斯特城喺2016–17賽季首次踢歐洲聯賽冠軍盃，係球會第四次喺歐洲賽事中比賽。

響維基新聞度有一單新聞係同呢篇文有關：
Leicester City wins first Premier League as Spurs and Chelsea held for 2-2 draw


歷史[編輯]

1892年嘅李斯特福斯

成立[編輯]

李斯特城嘅前身喺1884年由維杰斯頓學校嘅一群舊生團體建立，叫做「李斯特福斯」（Leicester Fosse）嘅球會，球會喺1890年加入「英格蘭足總」[6]。 喺1891年搬到費拔街球場之前，球會曾經喺5個場地用作比賽，包括喺市中心東南部嘅維多利亞公園（Victoria Park）、貝爾格雷夫路板球場（the Belgrave Road Cricket）同埋單車公園（Bicycle Grounds）[7]。球會喺1891年加入中部聯賽，喺1894年以第二名完成聯賽入選到英格蘭足球聯賽乙組聯賽。李斯特福斯第一場英格蘭足球聯賽係以4-3擊敗甘士比嘅比賽，喺第一場聯賽後嘅一個禮拜，喺費拔街球場迎戰洛達咸。球會喺同一個賽季創造出最大比數嘅勝利，喺足總盃資格賽對陣諾士奧林匹克（Notts Olympic）嘅比賽中以13-0大勝對手[1]。 李斯特福斯在1907-08賽季喺乙級聯賽以亞軍完成該賽季，以在來季升班到甲組聯賽比賽，呢個係當時英格蘭最高級別嘅足球聯賽。然而，球會喺破最大比分紀錄以0:12輸比諾定咸森林，之後只係一個賽季就以降級告終[1][8]。

喺1919年，第一次世界大戰結束之後英格蘭足球聯賽再次開始，李斯特福斯一度因為財政困難停止運作。球會後來恢復返運作，都差不多喺呢個時侯改名做「李斯特城足球會」，這次改名係因應李斯特行政區最近被賦予城市地位。喺易名之後，球會喺1920年代喺領隊彼得·霍奇（Peter Hodge）嘅體系下享受咗溫和嘅成功，他在1926年5月離開2個月後由威利·奥爾（Willie Orr）接任。當時李斯特城都有保持球會入球紀錄嘅射手亞瑟·錢德勒在陣。[9]李斯特城喺1924-25球季贏得乙組聯賽錦標[10]同埋喺1928-29賽季只係以1分之差落後錫週三屈居甲組聯賽亞軍，呢個都係球會喺2016年之前最佳嘅聯賽成績。然而喺1930年代，因為財政問題，令到李斯特城嘅1934-35賽季結束之後降班。[11]1936-37賽季結束之後李斯特城再次升班到甲組聯賽，[12]但喺1938-39賽季結束後，李斯特城以包尾完成呢個賽季再一次降班至乙組聯賽。[1][13]

李斯特城喺英格蘭足球聯賽歷年身處嘅位置

第二次大戰後[編輯]

1949年李斯特城第一次打入足總盃決賽[1][14]，以1-3輸畀狼隊屈居亞軍。呢個賽季，李斯特城喺最後一場比賽打和先至護級成功，繼續留喺乙組聯賽[15][16]。李斯特城喺1954年再贏到乙組聯賽[17]，奪冠功臣係球隊前鋒亞瑟·羅利（Arthur Rowley），佢係李斯特城球會史上其中一位實力強勁嘅前鋒。雖然李斯特城升班到甲組聯賽一季之後就降班乙組聯賽，但球會喺時任主教練戴夫·哈利迪嘅體系下喺1957年重返甲級聯賽[18]，而球員羅利喺以單賽季44個入波打破咗球會紀錄[9]。 李斯特城喺甲組聯賽一直逗留到1969年，一共十二年[19]。呢個都係目前球會史上處喺最頂級聯賽最長嘅一次。

喺時任主教練馬特·吉利斯（Matt Gillies）同佢嘅助教伯特·約翰遜嘅體系下，李斯特城喺兩個賽季殺入足總盃決賽，但係1961年同埋1963年同樣輸畀決賽對手[1]。佢哋1961年輸咗畀當年雙冠王熱刺。喺1962-63賽季，李斯特城喺冬天開始取得甲組聯賽榜首位置，喺球隊比賽時有睇似結冰上嘅陣式，同埋球員喺冰凍嘅球場上不斷嘅跑動，當時李斯特城因而有咗「冰王」呢個綽號，並最後以第4名完成呢個賽季，呢個係球會喺二戰之後最好嘅成績，直至2016年先被打破。吉利斯嘅1964年帶領李斯特城奪得第一座銀盃（silverware），佢哋以總比數4-3擊敗史篤城，首次贏得聯賽盃冠軍[1]。 李斯特城之後一年又殺入聯賽盃決賽，但係總比分2-3不敵車路士。吉利斯同約翰遜為自己版本嘅「旋轉」同「開關」系統成為咗英格蘭足壇巨大影響力嘅人，完全打亂咗喺英格蘭傳統嘅1-11陣形[20]。

李斯特城喺1968-69年度賽季開始後表現差劣，馬特‧吉利斯喺1968年11月辭去主教練職務。佢嘅繼任者，法蘭克·奧法雷爾（Frank O'Farrell）未能帶領球會護級成功，喺1969-70年度球季降班乙組聯賽。不過已肯定降班嘅李斯特城仍然殺入1969年足總盃決賽，最終以0-1不敵曼城屈居亞軍。

羅比·沙維治喺1997-98賽季同班士利比賽期間被鏟低

喺1971年，李斯特城以乙組聯賽冠軍身份重返甲組聯賽，並贏得隊史上唯一一次社區盾冠軍[1]。當時應屆雙冠王阿仙奴需要打歐洲賽，乙組聯賽冠軍李斯特被邀請對陣應屆足總盃亞軍利物浦，李斯特城重以1-0打贏紅軍[1]。占美·布盧姆菲爾德（Jimmy Bloomfield）喺新賽季被任命為新教練，佢幫助球會護級成功。李斯特城喺1973-74賽季打入足總盃4強[21]。

李斯特城喺1977-78賽季後再次降班，領隊麥克林托克（McLintock）宣佈辭職。由蘇格蘭籍領隊喬克·華萊士（Jock Wallace）接任。喺華萊士嘅帶領下，李斯特城喺乙組聯賽有良好表現，喺1979-80年賽季再次奪得乙組聯賽冠軍，下屆返回甲組聯賽[22]。唔好彩，華萊士都唔可以帶領球隊維持在甲組聯賽作賽，但球會卻殺進1982年足總盃4強。李斯特城下一名主教練是戈頓·米爾恩（Gordon Milne），佢喺1983年帶領球會再次重返頂級聯賽行列。呢個時侯，李斯特城出現一名後來人所共知嘅出色球員加利·連尼加，在連尼加嘅幫助下，李斯特城喺1980年代初保住甲組聯賽一席，但佢嘅出色表現很快令佢被其他一線球隊垂青，1985年，李斯特城將連尼加賣到愛華頓，兩年後李斯特城再度降班收場。

李斯特城在1970年代開始喺英格蘭頂組及次組聯賽之間浮沉，領隊米爾恩喺1986年離任並喺1987年由戴維·普利特取代佢嘅位置，佢喺1991年1月因為李斯特城深陷降落丙級聯賽嘅旋渦而被解僱。戈頓·李（Gordon Lee）喺季中臨危受命直至賽季結束。李斯特城喺最後一輪賽事中贏咗，這保證咗佢哋避免喺來季降班到英格蘭第三組別足球聯賽比賽[1]。

列特喺1991年接手俱樂部並喺1991-92賽季帶領李斯特城殺進英超附加賽決賽，但最終輸比布力般流浪。李斯特城在接來下一年再次殺進升班附加賽決賽，以3-4不敵史雲頓。喺1993-94賽季，李斯特城最終從升班附加賽升上英超，在決賽以2-1打贏打比郡[1]。 領隊列特在1994年11月離任後前往阿士東維拉，而佢嘅繼任人馬克·麥吉都係未能幫李斯特城在1994-95賽季成功護級，球會再次降班到次級聯賽英甲作賽。

1995–2010[編輯]

1995年12月，李斯特城領隊馬克·麥吉突然離任轉投狼隊[23]。李斯特城任命馬田·奧尼爾嘅球隊新領隊[1]。喺奧尼爾嘅帶領下，李斯特城取得1995-96年度英甲升班附加賽資格，並憑著史蒂夫·克拉里奇的入球喺附加賽決賽以2-1擊敗水晶宮，取得升班到英超嘅資格。李斯特城喺1996年升上英超後，連續四個球季都取得聯賽榜前十名，同時喺1997年至2000年間，喺四年內三次打入聯賽盃決賽，並在1997年及2000年奪得聯賽盃冠軍，亦為球會三十年嚟第一次取得參加歐洲賽嘅資格。在2000年6月，奧尼爾離開李斯特城轉投蘇格蘭球會些路迪。

李斯特城改由前英格蘭U-21教練彼得·泰萊領軍。李斯特城喺泰萊領軍後，喺2000年9月28日於2000–01年歐洲足協盃以總數2-4敗給貝爾格萊德紅星出局[24]。但球隊於季初嘅聯賽取得好成績，曾有兩周英超榜首位置，但下半季成績下滑，最後只係取得聯賽第十三名結束2000-01年度球季。

泰萊因為2001-02賽季開季一系列嘅糟糕戰績被解僱，而佢嘅繼任人戴夫·巴塞特只領軍六個月，就改為佢嘅副手米奇·阿當斯接任。這季，李斯特城只贏了5場聯賽比賽，最後保級失敗降到次級聯賽英甲作賽。

皇權球場東看台

李斯特城嘅2002-03賽季開始搬到可容納32,500人嘅獲加球場，費拔頓球場都完成咗作為李斯特城主場111年嘅使命。新球場以球隊的贊助商暨李斯特薯片加工商獲加食品改名，獲加食品獲得球場10年嘅冠命權[25]。2002年10月，李斯特城因欠債3千萬英鎊而被接管，原因包括喪失電視轉播費用、龐大嘅球員薪酬支出、球員轉會費較預期少及起好新球場嘅龐大花費（3,700萬英鎊）[26]。阿當斯都喺該賽季被禁止喺轉會市場上作出任何交易，即使球會後來被連尼加啟動500萬英鎊嘅拯救計劃都於事無補[1]。球會後來得到新東家注資以解決財困，而球隊亦喺阿當斯領軍下，以90分奪取2002-03年英甲亞軍，喺2003年重返英超。不過李斯特一年後再次護級失敗，2004年回降當時已改名做英冠嘅次級聯賽。

阿當斯喺2004年10月辭任李斯特城領隊，球隊改為克雷格·萊文出任領隊一職，但由於萊文唔止未能帶領球隊重返英超，而且令球隊一度陷入英冠嘅降班區內，15個月後被炒魷魚，佢嘅助手羅布·凱利成為球隊嘅看守領隊。凱利成功帶領李斯特城護級成功，因此成為李斯特城正式領隊[1]。

在2006年10月，前樸茨茅夫主席曼達里奇表示有興趣收購足球會，據報道報價喺420萬英鎊至600萬英鎊之間。2007年2月13日，曼達里奇正式收購李斯特城[27]。同年4月11日羅布·凱利被球會炒魷魚，李斯特城改由奈傑爾·沃辛頓成為看守領隊直至賽季結束。沃辛頓喺該季帶領球隊護級成功，但球季結束後佢冇成為正式主教練。2007年5月25號，李斯特城改任前米爾頓凱恩斯主教練馬丁·艾倫為新領隊，雙方簽訂3年合約。但艾倫與球會主席嘅關係在新球季開始不久就惡化。2007年8月底艾倫在執教4場比賽後就離任。2007年9月13日，曼達里奇宣佈球會改任加里·梅格森為新領隊，並形容佢係一名有「豐富經驗」嘅教練。可惜梅格森只帶領李斯特城6個禮拜就喺2007年10月24號轉投保頓。曼達里奇唯有改任弗蘭克·伯羅斯同格里·塔格特做看守領隊。

皮雅臣同埋曼達里奇喺俱樂部贏得英甲冠軍後

同年11月22日， 伊恩·荷路威獲委任為李斯特城新領隊，他係50年來第一位李斯特城領隊喺上任後第一場聯賽就取勝利，他帶領「狐狸」以2-0擊敗布里斯托城[28]。 可惜呢場嘅勝利並不能夠持續下去，最後李斯特城喺2007-08年度球季護級失敗，下季降班到第三級聯賽英甲比賽，荷路威亦喺球隊降班後離隊，李斯特城改由皮雅臣領軍。 2008–09球季係李斯特城史上首次喺第三級嘅聯賽角逐，但呢季他們喺2-0擊敗修安聯後，提早兩輪賽事確定取得英甲冠軍，降班一年後於2009年返回英冠。2009–2010球季，返回英冠嘅李斯特城喺領隊皮雅臣嘅帶領下，取得聯賽第5名，獲得升班降加賽資格，可惜李斯特城喺附加賽以互射十二碼輸比卡迪夫城。喺賽季結束後皮雅臣離開李斯特城轉投侯城。2010年7月7號，保羅·索薩正式確認取代皮雅臣嘅位置[29]。

2010–2015: AFI早期年代[編輯]

在2010年8月，隨着同免稅商店巨頭皇權免稅簽咗一份為期3年嘅贊助合同，曼達里奇將足球會轉讓予以泰國皇權集團財團為首維猜·西瓦德諾巴帕嘅亞洲足球投資財團（AFI）。[30] 2010年10月1日，在李斯特經歷新賽季英冠最初9輪聯賽只得1勝嘅糟糕表現，當中更以1-6大敗比英冠榜末球隊樸茨茅夫，領隊保羅·索薩即時被球會解僱。[31] 2日之後，斯文·約蘭·艾歷臣，他在球會大敗給樸茨茅夫後已經接近加盟球會，並與球會簽咗2年合同。[32] 2011年2月10日，泰國亞洲足球投資財團嘅成員維猜·西瓦德諾巴帕被任命做球會新主席，填補喺舊年11月前主席曼德里奇因收購錫周三而離任後所補下的主席空缺。[33]

2011-12年度球季，李斯特城被視為其中一支有力爭取升上英超嘅球隊，可惜季初嘅13場聯賽，李斯特城只係取得5場勝利，領隊艾歷臣終喺2011年10月24號離職。[34] 三星期後，前領隊尼祖·皮雅臣返回李斯特城領軍。皮雅臣成功帶領李斯特城喺2012-13球季取得呢季英冠聯賽第6名，得到參加升班附加賽資格。李斯特城喺附加賽準決賽面對屈福特，當比賽去到次回合補時階段，雙方總比數打成2-2平手，李斯特城獲得一次十二碼罰球，由安東尼·洛卡特主射，但屈福特守門員文奴·艾蒙尼亞接連撲救了洛卡特嘅主射同埋補射，之後屈福特守衛既刻將個球發上前場進行反擊，最後由特羅伊·迪尼射入決定勝負嘅一球。結果李斯特城最後以總比數2-3飲恨出局，失去升上英超嘅機會。[35]

2014年4月，李斯特城以2-1擊敗錫周三，由於同一輪直接競爭對手昆士柏流浪和打比郡都輸球失分，導致李斯特肯定能取得英冠首兩名直接升上英超嘅資格，自2004年降班後十年來再次返回英超聯賽。李斯特城擊敗保頓後，肯定成為2013年至2014年英格蘭冠軍足球聯賽冠軍，呢個都係佢哋第7次獲得英格蘭次級組別冠軍。

2014-15年度球季，係李斯特城闊別英超十年後首次喺英超角逐，季初李斯特城5場比賽表現都唔錯，首場聯賽以2-2打和愛華頓[36]， 又以1–0擊敗史篤城，取得他們自2004年5月以來首場英超勝利[37]。

2014年9月21號，李斯特城創造出英超歷史上其中一場最大反超比分的勝利，在皇權球場一度落後曼聯1-3的情況下，在比賽最後30分鐘內連入4球以5-3反勝。

可惜李斯特城在擊敗曼聯之後就無以為繼，在2014年聖誕節時，打咗18輪聯賽的李斯特城就只係得10分位列英超包尾。至2015年3月21日第29輪聯賽李斯特城以3-4敗給熱刺後，李斯特城只有19分位處榜末，成為降班熱門，但係最後9場聯賽，李斯特城竟取得7勝1和1負嘅成績，最後以41分攞到聯賽14位，成功護級。呢季李斯特城亦繼2004-05年度嘅西布朗及2013-14年度嘅新特蘭後，英超史上第三支喺聖誕節時位處包尾而最後能夠成功護級嘅球隊。

2015年6月30日，李斯特城領隊皮雅臣被球會以「工作關係不合」為由解僱，外界盛傳呢次炒魷魚係與身為球會球員嘅皮雅臣個仔占士·皮雅臣（James Pearson）有關，他喺球隊於泰國進行季前熱身賽時，與另外2名球員涉及同當地三名女子嘅集體性愛影片流出，當中並有種族主義嘲弄嘅行為[38][39][40]。李斯特城隨即任命前車路士同埋希臘國家足球隊領隊雲尼亞里為球隊嘅新教頭[41]。

2015-16：封王神話[編輯]

李斯特城2015/2016英超冠軍陣容

喺新帥克勞迪奧·雲尼亞里帶領下嘅李斯特城，迎接佢哋喺2014年返回英超後嘅第2個球季，季前雲尼亞里話球隊呢季目標只係成功護級，點知李斯特城開季令人刮目相看。

從2015年8月～11月嘅前14場聯賽，李斯特城取得8勝5和1負嘅佳績，前鋒占美·華迪更連續11場比賽每場都有入波，總共為李斯特城入13球，打破咗曾效力曼聯嘅荷蘭前鋒雲尼斯達萊嘅連續10場英超賽事有入波紀錄，成為英超連續入波紀錄最長嘅球員[42]。2015年12月5號，球會以2分優勢，登上英超聯賽榜首，而射手占美·華迪亦在英超射手榜內領先[43]。至12月14號，李斯特喺皇權球場2-1擊敗衛冕冠軍球隊車路士[44][44]。12月19號，李斯特城前鋒馬列斯在作客葛迪遜公園3-2擊敗愛華頓嘅比賽中射入兩個十二碼。係馬列斯喺本賽季嘅第12同13個進球，都令到李斯特喺聖誕節登上英超聯賽榜首[45]。

占美·華迪喺2015年效力李斯特期間以11場比賽13球，打破英超比賽連續入波紀錄

喺「聖誕新年快車期」，李斯特城作客被利物浦擊敗，以及主場打和曼城同埋般利茅夫，李斯特城的榜首位置一度被阿仙奴取代，但隨着李斯特城打和般利茅夫，他們只用咗半季就攞到40分足夠留喺英超嘅分數。李斯特城雖然喺2016年1月足總盃第三圈重賽被熱刺淘汰，但同月作客熱刺嘅聯賽都以1-0獲勝，這場賽事嘅勝利成為日後李斯特城奪冠嘅關鍵。李斯特城喺2016年1月下旬至2月上旬連續擊敗史篤城、利物浦及曼城三支前列勁旅，令李斯特城2月初重登聯賽榜首，雖然喺2月14日作客對聯賽榜第二名阿仙奴的聯賽，以1-2敗陣，但因為阿仙奴之後接連失分，令李斯特城榜首位置更加鞏固，反而喺1月中旬至2月下旬取得聯賽六連勝反壓阿仙奴升上聯賽第二位嘅熱刺，成為李斯特城爭標最大威脅。李斯特城被阿仙奴打敗後，接下來8場聯賽取得6勝2和嘅佳績，其中五場聯賽以1-0小勝對手，繼續保持榜首優勢。喺2016年4月10號李斯特城作客2-0擊敗新特蘭，及後熱刺以3-0擊敗曼聯，確保李斯特城喺隊史上首次取得歐聯嘅參賽資格[46]。

2016年4月24號，李斯特城喺第35輪聯賽以4-0大勝史雲斯，翌日熱刺卻被西布朗迫和1-1，令到李斯特城榜首領先優勢擴大至7分。

2016年5月1號（第36輪），李斯特城作客奧脫福球場以1-1打和曼聯，加上翌日車路士主場迎戰熱刺，半場2球落後下追和，李斯特城確定以7分之差提早2輪聯賽奪取隊史英超首冠[47]。最後李斯特城全季賽事取得81分，比雙殺佢哋嘅亞軍阿仙奴多10分奪冠。

李斯特城喺2014-15賽季由4月開始嘅最後九場聯賽大逆轉成功避免降班，以及喺之後嘅一個賽季奇跡奪取英超錦標，李斯特城民眾相信係由於2015年3月，李斯特市將2012年發現出土嘅英王理察三世骸骨，喺李斯特座堂安葬有關。佢哋相信理察三世入土為安後，李斯特城足球隊得到佢嘅庇佑而改變咗命運[48][49]。另外，喺2015-16年球季開始時，英國兩大博彩公司立博同埋威廉希爾提供李斯特城奪得英超冠軍嘅賠率為一賠五千，所以喺李斯特城奪取英超冠軍後，英國博彩業因要發放彩金，估計要賠2,500萬英鎊，打破歷來英國體育賽事博彩嘅記錄[50][51][52]。而李斯特城奪得英超錦標亦被形容世界體壇其中一個最大嘅驚喜，同時都增加咗李斯特市喺世界嘅知名度同埋吸引性[53][54]。有評論指李斯特城奪冠會激起其他英格蘭球會嘅新足球思維，同埋令到中小型球會精神面貌出現改變[55]。而一部以李斯特城前鋒占美·華迪嘅故仔為題材嘅電影，亦喺2016年4月開始籌劃[56]。

封王之後[編輯]

2016-17：聯賽失利，初嘗歐聯[編輯]

李斯特城喺2015/16年度球季神奇封王後，唔少主力球員都被其他大球會垂青，但新球季只有中場球員尼高路·簡迪轉投車路士，其餘大部份主力仍繼續留隊效力。不過，衛冕嘅李斯特城喺2016/17嘅新球季表現失色，首場聯賽就以1-2輸畀升班馬侯城。李斯特城完成首循環十九場聯賽，輸咗其中九場，只係得20分排聯賽榜第十五位。但李斯特城喺首次參加嘅歐聯賽事，有出色表現，分組賽以六戰四勝一和一負嘅成績，壓倒波圖同埋哥本哈根，提早一輪確定以首名出線十六強淘汰賽。

踏入2017年，李斯特城喺聯賽嘅頹勢惡化，聯賽五連敗兼喺2017年頭六場聯賽零入波。喺2017年2月12號作客輸畀史雲斯後，李斯特城於聯賽榜跌至十七位，距離降班區只有一分。去季帶領李斯特城喺英超奇蹟封王嘅領隊克勞迪奧·雲尼亞里面臨解僱壓力，雖賒會方喺2017年2月初仍表示對佢完全信任，但2月18號李斯特城喺足總盃第五圈被英甲球隊米禾爾淘汰後，即傳出雲尼亞里有可能喺今季內炒魷嘅消息，2月22號球隊史上首次晉身歐聯十六強嘅李斯特城，首回合作客對西維爾輸1-2，出線仍存有希望，但比賽翌日李斯特城正式解僱雲尼亞里。唔少球壇名宿以至李斯特城球迷，都批評李斯特城會方炒雲尼亞里嘅決定。

李斯特城解僱雲尼亞里後，由助教格力·莎士比亞暫代領隊一職。李斯特城喺聯賽成績開始反彈，跟住聯賽取得五連勝，令李斯特城喺2017年4月上旬回升到聯賽榜第十一位，脫離降班威脅，而喺聯賽連勝嘅佳績亦令暫代領隊格力·莎士比亞喺領軍唔夠二十日就成為李斯特城正式領隊。最後李斯特城喺本季聯賽只取得44分得第十二名，成為英超歷來成績最差嘅衛冕球隊。

2017年3月15號，格力·莎士比亞帶領李斯特城出戰歐聯十六強次回合，主場迎戰西維爾，喺首回合以1-2落後嘅李斯特城最終成功翻盤，以2-0勝出，總比數3-2反勝西維爾，歷史性首次打入歐聯八強，亦係呢屆唯一晉身歐聯八強嘅英超球隊。李斯特城八強對手，係上屆歐聯亞軍馬德里體育會。李斯特城喺4月13號嘅首回合作客僅輸0-1，但喺4月19號嘅次回合主場比賽，未如十六強成功翻盤，同對手打和1-1，總比數以1-2輸畀馬德里體育會出局，結束呢屆歐聯之旅。

2017-18：先苦後甜，重返前十[編輯]

2017/18年度球季，格力·莎士比亞帶領嘅李斯特城季初只取得8戰1勝3和4負排尾三，雖然係同李斯特城季初接連面對英超四大豪門（阿仙奴、曼聯、車路士同利物浦）有關，但2017年10月17號，領隊莎士比亞俾李斯特城炒咗。10月25號，李斯特城委任前修咸頓足球會領隊克勞德·佩爾為新領隊。李斯特城喺佩爾執教後戰績有所改善，喺2017年聖誕節時回升到聯賽榜第八位，最後李斯特城以得47分取得呢季英超第九名。

2018-19：班主維猜遇難[編輯]

2018年10月27日，李斯特城喺2018/19年度第十周聯賽主場以1-1迫和韋斯咸，李斯特城班主維猜，搭直升機離開時喺皇權球場附近墜毀，翌日球會證實維猜遇難身亡[57][58][59][60][61][62]。之後維猜第四仔艾雅華特繼承阿爸，成為李斯特城班主。

李斯特城喺克勞德·佩爾帶領下，喺2018/19年度聯賽偶有佳作，例如曾經喺「聖誕新年快車期」接連擊敗車路士同埋曼城兩支前列勁旅，但自2019年元旦李斯特城作客擊敗愛華頓後，跟住六場聯賽錄得一和五負嘅劣勢，足總盃第三圈更爆冷俾低組別球隊淘汰。2019年2月24號，李斯特城主場以1-4慘敗畀水晶宮後，球會決定炒咗領隊佩爾。兩日後，球會任命前利物浦領隊、時任些路迪領隊班頓·羅渣士為李斯特城新領隊，係李斯特城2016年奪得英超冠軍以來，第三次換領隊。李斯特城喺羅渣士帶領下，最後以52分取得英超第九名完成本季賽事。

2019-20：神話再現？[編輯]

2019/20球季，李城喺頭兩輪聯賽都打和（主場0-0狼隊同埋作客1-1車路士）後，第3輪聯賽作客打贏咗升班馬錫菲聯，開始向頭四大步邁進。雖然作客打曼聯同埋利物浦都輸咗一球，但係佢哋喺主場反勝熱刺，對住中下游球隊更加係得心應手，包括贏般尼茅夫同埋5-0大炒紐卡素，季初喺聯賽榜緊隨上屆冠、亞軍曼城同埋利物浦之後，排喺第三。

李斯特城喺第9輪聯賽開始攞到八連勝嘅佳績，喺2019年10月25號第10輪聯賽，作客修咸頓，李斯特城開賽只係十分鐘就入波，喺對手上半場早段就有球員被罰出場後，人數佔優嘅狐狸大開殺戒再攻入八球，當中前鋒艾約斯·佩雷斯同埋占美·華迪喺呢場賽事同時戴帽，最後9-0大炒對手，唔只追平咗曼聯1995年喺主場以9-0擊敗葉士域治嘅英超最大比數勝波紀錄，亦創低130幾年以來英格蘭足球頂級聯賽最大比數作客贏波。狐狸之後又接連贏咗包括阿仙奴在內嘅六支球隊，第十四輪聯賽之後李斯特城超越曼城坐上聯賽榜第二位，雖然喺第十八輪聯賽作客1-3輸咗畀曼城，不過仲領先緊曼城一分，落後十分俾頭17輪聯賽16勝1和嘅利物浦，喺2019年聖誕節穩坐聯賽榜第二位，只係失咗14球，同榜首嘅利物浦並列為失球最少嘅球隊。新年後聯賽因為武漢肺炎疫情停咗三個月，復賽後李斯特城踢唔出之前嘅水準，今季聯賽排第五。

聯賽盃第2輪開始，李斯特城喺作客以1-1同紐卡素踢到十二碼先至以4-2晉級，並喺第三輪同十六強輕鬆過關，八強作客對住愛華頓，李斯特城在半場領先兩球下畀愛華頓迫和2-2，互射十二碼以4-2打敗對手晉級，但李斯特城喺準決賽以總比數2-3輸畀阿士東維拉，入唔到決賽。

李斯特城喺今季足總盃，先砌低咗韋根、賓福特同埋伯明翰，喺八強輸畀車路士。

球會榮譽[編輯]

榮譽 次數 年度
聯　賽　比　賽
英超聯賽 冠軍 1 2015-16年
英冠聯賽 冠軍 1 2013-14年
英格蘭第二級聯賽（而家英格蘭足球冠軍聯賽） 冠軍 6 1924-25年、1936-37年、1953-54年、1956-57年、1970-71年、
1979-80年
英格蘭第二級聯賽（而家英格蘭足球冠軍聯賽）升班附加賽冠軍 2 1993-94年、1995-96年
英格蘭第三級聯賽（而家英格蘭甲組足球聯賽） 冠軍 1 2008-09年
盃　賽　比　賽
英格蘭聯賽盃 冠軍 3 1963-64年、1996-97年、1999-2000年
社區盾 冠軍 1 1971/72年
英格蘭足總盃 冠軍 1 2020/21年

地區賽事[編輯]

  • War League South
    • 冠軍（1次）：1942[63]

比賽風格[編輯]

李斯特城擅長打防守反擊，可以迅速將對手嘅失誤轉化做反擊機會，球隊亦以犀利嘅球風聞名。喺羅渣士上任之後，球隊慢慢改變傳統嘅防守反擊打法，開始追求控球率同快速進攻嘅平衡。

球員（2022/2023）[編輯]

編號 國籍 球員名 位置 出生日期 加盟年份 前屬球會 身價
門 將
12 威爾斯 丹尼·禾特（Danny Ward） 門將 1993.06.22 2018 利物浦 1,260萬鎊
35 瑞士 查古保域（Eldin Jakupovic） 門將 1984.10.02 2017 侯城 207萬鎊
後 衛
2 英格蘭 祖士甸（James Justin） 右閘 1998.02.23 2019 盧頓 TBC
3 法國 科芬拿（Wesley Fofana） 中堅 2000.12.17 2020 聖伊天 3,150萬鎊
4 土耳其 蘇恩古（Çağlar Söyüncü） 中堅 1996.05.23 2018 弗賴堡 1,900萬鎊
5 牙買加 韋斯·摩根（Wes Morgan） 中堅 1984.01.21 2012 諾定咸森林 100萬鎊
6 北愛爾蘭 莊尼伊雲斯（Jonny Evans） 中堅 1988.01.03 2018 西布朗 350萬鎊
16 克羅地亞 班高域（Filip Benković） 中堅 1997.07.13 2018 薩格勒布戴拿模 1100萬鎊
21 葡萄牙 列卡度·彭利拿（Ricardo Pereira） 右閘 1993.10.06 2018 波圖 1,980萬鎊
27 比利時 卡斯泰尼（Timothy Castagne） 右閘 1995.12.05 2020 阿特蘭大 2,150萬鎊
28 奧地利 富治斯（Christian Fuchs） 左閘 1986.04.07 2015 史浩克04 免費
中場
8 比利時 泰利文斯（Youri Tielemans） 中場 1997.05.07 2019 摩納哥 無透露
10 英格蘭 占士·馬迪臣（James Maddison） 攻中 1996.11.23 2018 諾域治 2,250萬鎊
11 英格蘭 艾拜頓（Marc Albrighton） 中場 1989.11.18 2014 阿士東維拉 免費
18 加納 艾馬迪（Daniel Amartey） 防中 1994.12.21 2016 哥本哈根 500萬鎊
20 英格蘭 喬杜里（Hamza Choudhury） 中場 1997.10.01 2016 青年軍 --
22 英格蘭 馬菲·占士（Matthew James） 中場 1991.07.22 2012 曼聯青年隊 113萬鎊
24 法國 文迪（Nampalys Mendy） 中場 1992.06.23 2016 尼斯 1,395萬鎊
25 尼日利亞 尼迪迪（Wilfred Ndidi） 中場 1996.12.16 2017 亨克 1,584萬鎊
26 比利時 柏耶（Dennis Praet） 攻中 1994.05.14 2019 森多利亞 TBC
前 鋒
7 英格蘭 格雷（Demarai Gray） 翼鋒 1996.03.03 2016 伯明翰 370萬鎊
9 英格蘭 占美·華迪（Jamie Vardy） 前鋒 1987.01.11 2012 費列活特 1880萬鎊
14 尼日利亞 伊恩拿祖（Kelechi Iheanacho） 中鋒 1996.10.03 2017 曼城 2500萬鎊
15 英格蘭 拜恩斯（Harvey Barnes） 翼鋒 1997.12.09 2016 西布朗 租借回歸
17 西班牙 佩雷斯（Ayoze Pérez） 前鋒 1993.07.29 2019 紐卡素 TBC
19 阿爾及利亞 施利文尼（Islam Slimani） 前鋒 1988.06.18 2016 士砵亭 TBC

韋斯·摩根、卡斯柏舒米高分別係隊長同副隊長。

轉會（2020/21）[編輯]

外借球員[編輯]

編號 國籍 球員名 位置 出生日期 加盟年份 外借球會 外借年期

離隊球員[編輯]

編號 國籍 球員名 位置 出生日期 加盟年份 加盟球會 身價

參考[編輯]

  1. ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 "The History of Leicester City Football Club". Leicester City Official Website. 原著喺21 六月 2009歸檔. 喺31 October 2013搵到. {{cite web}}: Italic or bold markup not allowed in: |publisher= (help)
  2. ↑ "A History of Filbert Street". Filbertstreet.net. 原著喺29 九月 2011歸檔. 喺3 September 2011搵到.
  3. ↑ "Sport's greatest-ever upset". Sporting Life. 2 May 2016. 原著喺3 May 2016歸檔. 喺3 May 2016搵到.
  4. ↑ Harris, Nick (1 May 2016). "Just what were the odds? Leicester City the bookie bashers". Mail Online. Daily Mail. 原著喺3 May 2016歸檔. 喺3 May 2016搵到.
  5. ↑ Markazi, Arash (12 February 2016). "How longest of long shots could make history". ESPN.com. ESPN. 原著喺3 May 2016歸檔. 喺3 May 2016搵到.
  6. ↑ Sewell, Albert (1974). Observers Book of Association Football. London, England: Frederick Warne & co. p. 58. ISBN 978-0-7232-1536-3.
  7. ↑ "Short sporting lifetime". Leicester Mercury. 1 February 2010. 原著喺2015年10月2日歸檔. 喺31 October 2013搵到. {{cite web}}: Italic or bold markup not allowed in: |publisher= (help)
  8. ↑ "Final 1908/1909 English Division 1 (old) Table". Football DataCo Limited. 喺31 October 2013搵到.
  9. ↑ 9.0 9.1 "All Time Leicester Records & Achievements". Soccerbase.com. 喺31 October 2013搵到.
  10. ↑ "Leicester City 1924–1925 : English Division Two (old) Table". Statto.com. 原著喺2013年11月2日歸檔. 喺31 October 2013搵到.
  11. ↑ "Leicester City 1934–1935 : English Division Two (old) Table". Statto.com. 原著喺2013年11月2日歸檔. 喺31 October 2013搵到.
  12. ↑ "Leicester City 1936–1937 : English Division Two (old) Table". Statto.com. 原著喺2013年11月2日歸檔. 喺31 October 2013搵到.
  13. ↑ "Leicester City 1938–1939 : English Division Two (old) Table". Statto.com. 原著喺2013年11月2日歸檔. 喺31 October 2013搵到.
  14. ↑ "Socerbase.com FA Cup 1949". Soccerbase.com. 喺31 October 2013搵到.
  15. ↑ "Leicester City 1948–1949 : Results". Statto.com. 原著喺2013年11月2日歸檔. 喺31 October 2013搵到.
  16. ↑ "Leicester City 1948–1949 : English Division Two (old) Table". Statto.com. 原著喺2013年11月2日歸檔. 喺31 October 2013搵到.
  17. ↑ "Leicester City 1953–1954 : English Division Two (old) Table". Statto.com. 原著喺2013年11月2日歸檔. 喺31 October 2013搵到.
  18. ↑ "QosFC: Legends – Dave Halliday". qosfc.com. 原著喺2015年6月27號歸檔. 喺2016年5月10號搵到.
  19. ↑ "Leicester City drops into second division". Leader-Post. Regina. Reuters. 20 May 1969. p. 21. 喺2 January 2013搵到.
  20. ↑ Bagchi, Rob (6 October 2011). "The forgotten story of … Leicester City: Ice Kings". London: www.theguardian.com. 喺31 October 2013搵到.
  21. ↑ "Liverpool in 5th Cup Final". The Age. 5 April 1975. p. 26. 喺16 September 2009搵到.
  22. ↑ "Liverpool finally get something". New Straights Times. 8 May 1980. p. 30. 喺17 September 2009搵到.
  23. ↑ （英文）"McGhee the new man at Molineux". The Independent. London. 14 December 1995. 原著喺2016年3月4號歸檔. 喺16 September 2009搵到.
  24. ↑ Red Star end Leicester dreams, BBC Sport. 28 September 2000. Retrieved on 27 September 2007.
  25. ↑ （英文）"Statement by the Foxes Trust on an unofficial forum". Talkingballs.co.uk. 24 November 2004. 原著喺2016-03-06歸檔. 喺31 October 2013搵到.
  26. ↑ （英文）"Leicester City put into administration". BBC News. 22 October 2002.
  27. ↑ （英文）"Mandarić seals Leicester takeover". BBC Sport. 13 February 2007. 喺31 October 2013搵到.
  28. ↑ （英文）Nickless, Graham (26 November 2007). "Bristol City 0 Leicester City 2: 'Hollywood' Holloway makes successful start". The Independent. London. 原著喺2020年4月10號歸檔. 喺16 September 2009搵到.
  29. ↑ （英文）"Sousa confirmed as new Leicester boss". BBC Sport. 7 July 2010. 喺31 October 2013搵到.
  30. ↑ （英文）"Thai consortium eyes deal to buy Leicester for £39m". BBC體育. 5 August 2010. 喺31 October 2013搵到.
  31. ↑ （英文）"Leicester sack Paulo Sousa". BBC Sport. 1 October 2010. 喺31 October 2013搵到.
  32. ↑ （英文）"Sven Goran Eriksson returns to English football as new Leicester City boss on two-year contract". 倫敦: 太陽報. 3 October 2010. 喺3 October 2010搵到.
  33. ↑ （英文）"Vichai Raksriaksorn named Leicester City chairman". BBC體育. 10 February 2011. 喺31 October 2013搵到.
  34. ↑ （英文）"Sven-Goran Eriksson leaves his role as Leicester boss". BBC體育. 24 October 2011. 喺31 October 2013搵到.
  35. ↑ （英文）"Leicester City appoint Hull City's Nigel Pearson as boss". BBC體育. 15 November 2011. 喺7 January 2015搵到.
  36. ↑ （英文）Mike Whalley. "BBC Sport – Leicester City 1–1 Arsenal". BBC Sport.
  37. ↑ （英文）Steve Canavan. "BBC Sport – Stoke City 0–1 Leicester City". 《BBC 體育》.
  38. ↑ （英文）"Nigel Pearson: Leicester boss's sacking linked to son's actions". BBC體育. 1 July 2015. 喺1 July 2015搵到.
  39. ↑ （英文）"Leicester City parts company with Nigel Pearson". Leicester City FC. 30 June 2015.
  40. ↑ （英文）"Nigel Pearson: Leicester City sack manager". BBC. 30 June 2015.
  41. ↑ （英文）"Claudio Ranieri: Leicester City appoint ex-Chelsea manager". BBC體育. 13 July 2015. 喺29 September 2015搵到.
  42. ↑ http://www.bbc.co.uk/sport/0/football/34953098
  43. ↑ （英文）"Jamie Vardy equals record as Leicester City top Premier League". The Sidney Morning Herald. 21 November 2015. 喺21 November 2015搵到.
  44. ↑ 44.0 44.1 http://www.bbc.co.uk/sport/0/football/35023774
  45. ↑ http://www.bbc.co.uk/sport/0/football/35078549
  46. ↑ （英文）Clark, Gill. "Leicester qualify for Champions League". Goal.com. 喺10 April 2016搵到.
  47. ↑ （英文）"Leicester City win Premier League title after Tottenham draw at Chelsea". 2 May 2016. 喺2 May 2016搵到.
  48. ↑ （英文）Joshua Robinson (26 March 2016). "King Richard III Is Miracle Soccer Team's Most Valuable Player". Wall Street Journal. 喺5 April 2016搵到.
  49. ↑ Pass Notes (8 February 2016). "The incredible resurrection of Leicester". The Guardian. 喺5 April 2016搵到.
  50. ↑ （英文）Lawrence, Amy. "Leicester celebrate first title after Chelsea recover for Tottenham draw". The Guardian. 喺2 May 2016搵到.
  51. ↑ （英文）"Bookies set to hand over £15m if Leicester win title". ITV News. 2 May 2016. 喺3 May 2016搵到.
  52. ↑ （英文）Rayner, Gordon; Brown, Oliver. "Leicester City win Premier League and cost bookies biggest ever payout". Daily Telegraph. 喺2 May 2016搵到.
  53. ↑ （英文）Hinshelwood, Colin. "Thailand Cheers as Far-away Leicester City Clinches Unlikely Soccer Title". TIME. 喺2 May 2016搵到.
  54. ↑ （英文）Pylas, Pan (3 May 2016). "PHOTOS: Leicester joins pantheon of major sporting upsets". Washington Post. 原著喺2019年6月1號歸檔. 喺3 May 2016搵到.
  55. ↑ （英文）Sharma, Aabhas (3 May 2016). "Leicester City: The champions who were never meant to be". 喺3 May 2016搵到.
  56. ↑ （英文）Davis, Callum (14 April 2016). "Vinnie Jones in line to play Nigel Pearson in the Jamie Vardy movie". The Telegraph. 喺3 May 2016搵到.
  57. ↑ 直升机球场外坠毁 英超莱斯特城证实泰籍老板罹难
  58. ↑ Holmes, Oliver (2016-05-04). "The Thai billionaire whose gamble on Leicester just paid off". The Guardian. 喺2018-06-01搵到.
  59. ↑ "Royal Honour For City Owners". Leicester City F.C. 2013-02-01. 喺2018-06-01搵到.
  60. ↑ 《李斯特城證實 班主維猜直升機意外中罹難》，熱血時報
  61. ↑ 《球會證班主維猜罹難：失去一位偉人 互聯網檔案館嘅歸檔，歸檔日期2019年6月12號，.》，頭條日報
  62. ↑ 《李斯特城證實班主維猜直升機墜毀意外中罹難 互聯網檔案館嘅歸檔，歸檔日期2019年6月5號，.》，蘋果日報
  63. ↑ Chalk, Gary; Holley, Duncan (1987). Saints – A complete record. Breedon Books. pp. 104–105. ISBN 978-0-907969-22-8.
由「https://zh-yue.wikipedia.org/w/index.php?title=李斯特城足球會&oldid=2054159」收