阿仙奴喜訊　杜沙特唔使踢國際賽

比利時國家隊宣布，效力阿仙奴嘅翼鋒李安度杜沙特因為身體狀態不足，已經退出大軍名單，無緣出戰嚟緊2場歐國盃外圍賽，意味可以趁機休息一下，留力為兵工廠搏殺。

李安度杜沙特曾於上月英超對愛華頓射入1球，協助阿仙奴贏1比0，其後歐聯對燕豪芬，亦取得入波。不過，呢位28歲翼鋒上仗對曼城，踢完上半場就被換走，疑似受傷，比利時國家隊依家正式確認佢退隊，無法出席未來2場比賽，比利時主帥泰迪斯高補選咗18歲新星禾美倫，球隊將於10月14日凌晨歐國盃外圍賽作客奧地利，3日之後主場對瑞典。

阿仙奴日前已經有布卡約沙卡、威廉沙列巴因傷分別退出英格蘭、法國國家隊，加上李安度杜沙特，3人可以趁機「叉電」。