李佳芯落重閘 甩底避見蟲草大王
陳恩德轟TVB下禁令欠尊重
抽起千萬廣告報復
視后
#李佳芯(
#Ali)去年同拍拖七年嘅男友
#陳炳銓 分手,日前被爆跟
#蟲草大王陳恩德 (Mark)秘戀,就喺蟲草大王舉行「Pet Paws NFT發佈會」前,俾傳媒影到佢哋出入酒店。鬧出緋聞後,Ali激動落閘,喺IG Story發聲明否認,斬釘截鐵話同對方冇任發展空間,仲嬲到甩底今日蟲草大王嘅宣傳活動。
今午有備而戰嘅蟲草大王,向傳媒講出另一版本。唔係Ali嬲到唔出席,而係大王唔使佢嚟,係我飛你!「我諗係因為公司之間,佢哋有某啲要求,令到我哋覺得唔係好合理,同埋有少少唔尊重及侮辱,所以我哋喺最後嘅時間,唔需要佢出席。」陳恩德說。
至於有咩唔合理要求,就係呢啲︰「去到last minute,佢經理人同我公司PR聯絡,話出席活動過程,Ali唔能夠同陳先生單獨影相,即使上台都唔能夠接近陳生,訪問都唔能夠同陳生做,由入嚟嘅合照全部都要取消,其實佢嚟同唔嚟都冇分別。我哋其實乜都唔使做,佢自己過嚟坐就得,飲杯水就走得。喺咁唔合理同咁唔尊重嘅情況下,我惟有取消。」合照好重要㗎嘛!
搞到咁僵,有冇影響心情,大王坦言有啲唔開心。至於有冇因為緋聞,影響佢同Ali嘅感情,呢一點Ali表態都出面,不過大王就話︰「咁佢都講,因為公司合約,都要聽公司話。(唔關佢事)…係啦,所以算啦,唔緊要,公司另外搵唔同藝人嚟,今日都星光熠熠,係咪。」仲話暫時唔會再同對方合作。
對於Ali噚日發嘅聲明,講到明同佢冇任何發展空間,大王睇完有咩感受?「呢啲私事就唔好提……如果可以再講,都係同一番說話,佢係我朋友,佢講嘅任何嘢我都唔會發表任何言論,我會尊重佢講嘅任何一句說話,佢係一個好人,脾氣直啲啫。
「我都補一句,我只答一次,啲相一定唔係我拎出嚟,我鄭重講多一次,一定唔係,我唔會再答,你哋都唔需要問我,我都好遺憾。」
此時TVB娛樂新聞台記者問陳恩德,擔唔擔心俾人話佢以此 (緋聞) 做宣傳,大王稱︰「其實真係唔會囉,時間咁貼,真係擇日子都擇唔到,更加估唔到TVB會出啲咁嘅terms,其實如果你唔想(出席),Day 1唔好接呢個job就得,唔需要接咗去到last minute先至改,放心,日子冇可能咁準,如果就得咁準,我就係娛樂大亨,咁我未做到。」
雖然佢話考慮唔再用TVB藝人,不過就唔會告TVB︰「都合作咗廿幾年,每年仲會喺佢嗰度落過千萬廣告,接近兩千萬嘅客戶又有幾多個,真係唔明點解對我哋公司態度咁差,可能我真係好蝦,我要話畀佢知我唔好蝦。」之後佢向TVB宣戰,話會抽起晒啲廣告,仲話要樂易玲畀個交代佢。呢舖真係首飾箱變返藥箱,戥TVB傷!
冇咗真Ali出席,最搞笑係有「翻版Ali」蔡潔頂上。不過大王否認蔡潔係臨時頂替,「人哋係女一,咩翻版呀。」
就今日蟲草大王轟TVB,仲話會抽起晒廣告一事,樂易玲今日回應傳媒稱, TVB旗下藝人蔡潔、戴祖儀、羅孝勇等今日都出席蟲草大王嘅記者會,「公司一向與各廣告客戶保持良好嘅關係,至於藝人喺公司工作以外嘅商業活動,保護及尊重藝人嘅意願,都係經理人嘅基本責任。」
訪問重溫
【葛民輝專訪|潮牌生意失血蝕兩層樓 良心老闆:唔可以搵佢哋墊屍底!有風浪嘅時候,應該攞賺嘅出嚟】
【蓋世寶專訪|《放學ICU》原意被扭曲 激嬲LuLu 勸無綫放低光環:你叫人愛TVB,你有冇愛過人先?】
【田啟文專訪︱派錢幫3000同業 失戰友廖啟智 田啟文心痛香港影業衰落同行唔團結:個別人係有私心,明知唔好仲鬧有咩用】
【黃文慧專訪丨「梅超風」磨劍半生未獲獎 人到晚年只追尋:我想好死!唔好受痛受苦!】
【張偉文專訪|68歲「靚聲王」腦退化冇礙演唱 生活靠社署及好友資助︰遇到咁幫忙嘅朋友係我一生最值得記住嘅日子】
【渣哥渣嫂專訪|憶患病心痛家人受苦 狠戒幾十年煙 譚小環:老公係我最強後盾!】
-------------------------------------
即刻跟住Follow 晒我哋Channel: