愛駒流鼻血包尾 李丞責有斬獲贏百萬！
20181202
東網電視
更多新聞短片
李丞責一家三口入場支持愛駒「歡樂從心」雖然包尾，但其他投注大有斬獲。
堪輿學家李丞責同港姐老婆劉倩婷啱啱榮升馬主，今日佢哋匹新貴「歡樂從心」正式登場，李丞責梗係要同老婆帶埋個女一齊現身馬場支持，佢賽前對愛駒好有信心，仲話今日藍色嘅綵衣有利添！可惜人算不如天算，「歡樂從心」雖然一出閘就帶頭，但走咗半程突然減慢速度，最終遙遙包尾，再睇真啲，原來係流鼻血呀陰功！希望「歡樂從心」快啲好番，日後再上陣贏到頭馬喇！此外，朱玲玲同葉蒨文亦有現身馬場，當中葉蒨文仲着咗豹紋長裙，相當搶鏡！
雖然愛駒跑包尾，但有指今日李丞責都有斬獲，話佢今日總共投注46,000蚊，最後贏咗近70萬，認真犀利！李丞責接受東網訪問時話：「如果要計，條數唔只70萬，應該接近100萬，我都好感恩，當時知道『歡樂從心』流鼻血之後，我同一時辰投注另一隻馬，要Keep住平穩情緒落注，好難得喺咁亂情況下中。（啲獎金點用？）畀隻愛駒做照料費，因為佢聽日會做檢查。（送畀太太？）張飛佢一早Keep住啦！」
----------------------------
東網巨星開咗ig喇，大家快啲follow啦！