朱晨麗16歲出嚟選面腫哨牙

朱晨麗前晚以大熱姿態奪港姐雙料冠軍，但受訪時因一時「失憶」而否認曾選亞姐，她冷靜後在慶功宴多次致歉補鑊，還自爆早年曾參加內地選美賽，被發現當時她闊面兼哨牙！

應屆港姐冠軍朱晨麗新鮮出爐，憑着美貌智慧並重，成功洗去「豬扒港姐」污名，賽果符合民望。不過，朱晨麗奪冠後未知是否太興奮而「腦閉塞」，被問到是否曾參選《2006年亞洲小姐網絡賽》時，竟一度失憶以「唔記得」回應！其後，她由無綫外事部副總監曾醒明傍實出席慶功宴，向傳媒連番道歉急補鑊：「唔好意思！頭先太激動，激動到諗唔到嘢。（點解唔認？）真係唔記得有參加過，係你哋提起先記得！當時只係貪玩喺網上報名，冇正式參加，亦冇通知我入唔入圍。」還自爆參選港姐前還有另一次選美經驗：「16歲參加過內地《第三屆水鄉麗人評選活動》，當時冇攞獎，但有同無綫申報。」問到申報只是近期的事，為何仍會忘記？她即尷尬支吾以對，只表示不記得細節，並再次道歉。

住銅鑼灣千萬豪宅

至於曾醒明強調她有向無綫申報：「佢唔記得啫！叫咗佢冷靜啲慢慢諗。」記者昨日在網上翻查資料，發現《水鄉麗人》的官網有疑似朱晨麗的相片，但當時的她只有Baby Fat與眼圈並重，兼有輕微哨牙，娘爆樣與現在「翻版陳法拉」的樣子相差甚遠！

三位出爐港姐賽後參加慶功宴及拍攝官方刊物，直至凌晨時分才乘無綫安排的保母車返香閨。冠軍朱晨麗原來家住位於銅鑼灣貴價地段的加寧大廈，雖然大廈已有近五十年樓齡，但樓價不菲！據資料顯示，近千呎的單位售價逾千萬，如近二千呎的大單位更售近二千萬，家住貴價樓，難怪她前晚在台上揚言「唔怕窮」！而亞軍朱希敏則返太古城住所，同樣是「有米之人」。

男友放心繼續支持

昨日一班得獎港姐出席活動及領獎，朱晨麗透露男友已祝賀：「佢話好榮幸可以同港姐冠軍拍拖！佢了解我為人，好放心，仲支持同信任我做自己想做嘅事。」而亞軍朱希敏則不介意被指「爆冷」奪獎：「攞亞軍已滿足，滿意賽果！（致勝之道？）朋友讚我台上散發出信心。」不少網友表示滿意今屆港姐賽果，讚朱晨麗實至名歸，又指她激似陳法拉。