中英混血朱敏瀚轉型成功 自細高顏值曾奪「最英俊王子大獎」

一年一度嘅《萬千星輝頒獎典禮2020》已經圓滿結束，入行11年嘅朱敏瀚（Brian）成功揮低羅天宇及謝東閔等勁敵，奪得「飛躍進步男藝員」，及與王浩信及張振朗憑《反黑路人甲》嘅「反黑三劍俠」奪得「最受歡迎電視拍檔」，真係恭喜晒呀！

現年28歲嘅朱敏瀚（Brian）擁有四分一英國血統，因為佢媽媽係中英混血兒。童年時嘅朱敏瀚樣子精靈又靚仔，5歲嘅時候曾參加由無綫兒童節目舉辦嘅《仙履奇緣旅程大競賽》，仲喺Jackeline姐姐（張潔蓮）手中奪得「最英俊王子大獎」，之後更拍過廣告及教育電視，令佢自細就已經立志成為演員。

喺中五畢業後，朱敏瀚就投考藝員訓練班，多年嚟經常飾演某角色嘅「年輕版」、學生及細佬，所以被稱為無綫「御用細佬」。為咗撇甩潺弱形象，幾年前佢努力操肌積極轉型。今年無綫播出6套佢有份參與嘅劇集，當中嘅《反黑路人甲》「金牌打手」陸秋俾人耳目一新嘅感覺，獲得觀眾關注，人氣急升。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！