藝人票選港姐冠軍 大熱湯洛雯險勝黑馬朱千雪

(綜合報道)(星島日報報道)今年香港小姐競選由全城票選，本報找來12名藝人投選心目中的港姐冠軍，其中湯洛雯以5比4險勝朱千雪。另外，tvb.com討論區的「一人一票選港姐」的投票者不多，至昨日獲最高票數是張名雅，其次為湯洛雯，而前日只獲5票的黃心穎卻突然颷升至21票，令人嘖嘖稱奇。文、圖：娛樂組 今屆港姐大熱湯洛雯看來勢不可擋，早前曾被視為熱門之一的林泳淘和張名雅，在藝人及網民投選中都被摒出冠軍之列。在藝人的投選中，朱千雪突圍而出，差點可威脅湯洛雯。力撐湯洛雯奪冠的5位藝人包括選美出身的苟芸慧、胡杏兒與呂慧儀，蔡一傑及童愛玲也睇好她。 苟芸慧：「湯洛雯整體表現吸引，她的樣貌也像我一個朋友，所以我選她囉！」胡杏兒：「湯洛雯夠Sharp，個樣好適合拍劇添！」童愛玲：「湯洛雯好有型，無論樣貌學識都好平均，加上我同佢爸爸湯鎮宗好熟，梗係選佢啦！佢細個時我已見過佢，我唔會信佢整容，決賽時我一定會投佢一票添！」呂慧儀：「我平時都有留意湯洛雯，雖然佢好多新聞，但都留意到佢答得好好，識得面對壓力又靚女，所以我揀佢。」 朱千雪飛躍進步獲睇好 近日成功瘦身的朱千雪則獲任達華、高海寧、麥包及唐詩詠睇好。任達華：「朱千雪一眼望落去讓人很舒服，也看得出她的內心世界好有潛能，笑容樣貌各樣好好，好平均。」高海寧：「朱千雪笑容燦爛，我在電視看過她的談吐不俗，而且在很短時間能成功減12磅不容易，欣賞她這份毅力。」唐詩詠：「一班港姐都是由零開始，我見朱千雪由甚麼都不懂卻一直有進步，而家睇佢愈來愈靚，狀態愈來愈好，所以我揀佢。」麥包：「朱千雪冇乜負面新聞，樣貌大方，有氣質。」 此外，鍾嘉欣認為岑杏賢有機摘港姐后冠，她說：「佢個樣好Sweet，笑容真誠，感覺開心，雖然佢唔係大熱，但以我選美經驗，好多時勝出的都係黑馬口架！」鍾舒漫的心水則是陳潔玲：「她樣子清新，所以我揀佢，希望今晚佢表現會好，因為我相信臨場表現都好重要。」周家蔚揀了李渼琦：「我鍾意佢個樣鬼鬼哋，我對鬼妹仔樣情有獨鍾。」 黃心穎票數離奇飇升 另外，港姐網上投票走勢，tvb.com討論區的「一人一票選港姐，你會選who？」的投票數字雖然不算熱烈，但反映了網民的三甲心水。截至昨日，最高票數佳麗是張名雅（Carat），有34票，第2位是大熱門湯洛雯（Roxanne），獲28票，第4位是獲16票的張鈞美（Amy）。黃心穎的票數則突然飇升，由5票勁升至21票，進佔第3位，被懷疑有造馬之嫌。 網友留言大讚湯洛雯即使素顏也有化妝的水準，而且各方面都優秀平均，甚有冠軍相。至於投選張鈞美的網友則大讚她氣質高貴大方，樣子雖不夠突出但勝在耐看，最重要形象健康。 10候選港姐昨日出席決賽前的拜神儀式。張名雅被指成績一般沒拿過獎學金，又懷疑曾為加國男友墮胎，她一一否認各負面新聞，強調不是事實，不會影響比賽心情。黃心穎亦否認口是心非、爛蒲、抽煙及貪錢的指控，希望觀眾能留意她的表現。 ■港姐決賽今日舉行，10位候選佳麗昨日出席拜神儀式。 ■張名雅是網民最睇好的冠軍之選。 ■黃心穎的網上選票昨日突然飇升。 ■（左起）湯洛雯、曾明俐與陳潔玲都曾是今屆的大熱門。