聖誕海鮮自助餐
不得不讚,朗廷酒店嘅自助晚餐真係好高質!海鮮Bar好豐富,如生蠔、龍蝦、大蝦、蟹、青口…選擇多,新鮮得嚟都大隻足料!另外,刺身除咗有例牌嘅三文魚、吞拿魚、甜蝦、八爪魚,仲有珍寶帶子!自助餐嚟講,可任食珍寶帶子真係好正!
熱盤之中,我最印象難忘係煎蒜香蒸聖子,攞枱面寫有枱號嘅匙羹比師傅,蒸好後,佢就會自動送上桌面!聖子肥美多肉,真係無限encore 之選!
另外,聖誕期間仲有限定嘅香煎鴨肝、烤火雞及限定甜品等,都係回本必食!今鋪真係肥都抵!
宮廷大堂、純白英倫套房
講完食,講返酒店房間先!小編向來都勁鍾意充滿歐陸宮廷風嘅朗廷酒店!聖誕期間,大堂及餐廳均換上聖誕布置,企埋去影相,真係好似置身歐洲呀!
由Checkin到送行李入房,staff全程都好好服務,又細心解說房間設備,感覺好窩心!
至於房間設計,同lobby嘅華麗歐式堡壘唔同,偏向美倫風,用色以白tone為主,整體feel都幾舒適!
我勁鍾意佢哋房間對出嘅六角形落地窗設計,唔似一般酒店咁方方正正,影相出嚟特別靚呢!此外,浴室嘅白色雲石浴缸都夠大夠靚,喺度用埋套票包埋嘅POLA香薰沐浴套裝沖涼就啱晒,成件事好Chill呀!