昨晚是無綫電視邁向55周年台慶的大日子，近200位藝人、歌手都齊齊出動為特備節目《萬千星輝賀台慶》載歌載舞，埸面熱鬧，不過在其中一個環節「女星勁歌熱舞賀台慶」上，竟然見到「ViuTV常客」林二汶同其他女星如Gin Lee、JW、欣宜等一齊演唱，即時引來網民炮轟，直指她「食兩家茶禮」！
自兩年前的反送中運動開始，無綫因為報導偏頗而引起網民不滿，發起抵制罷睇，同年林二汶推出歌曲《最後的信仰》就因為部分歌詞如「信最後善良留在世界」、「軟弱無力全是 堅忍的證據」、「靈魂內有信仰 搶不去」等似是有所隱喻而被激讚，所以昨晚林二汶現身無綫，網民都反應激動，紛紛湧入其IG留言炮轟對她感失望：「你一直係我最愛的女歌手，除左你嘅音樂你嘅態度，骨氣都係我最respect，今見到報道話你上cctvb？！我真心唔明，上音樂節目都算，但點解會係台慶呢？！」、「因為viutv造星而令到大家喜愛你，帶俾你一個女歌手獎，到最後你居然走去人人喊打嘅隔離台賀壽⋯只有一句：觀眾捧得起你，都可以捧返你落黎⋯」、「無啦啦走去TVB自降身價 不了」等，更有網民hashtag「最後冇信仰」作為諷刺。
不過亦有人撐林二汶表示「欣賞你，做歌手，邊度有表演機會就去邊，好正常不過」、「人在江湖，身不由己，尤其係有唱片公司合約嘅歌手。」等，亦有人揶揄指：「Mirror拍中資M記跟住個個發晒癲日日去食要儲啲卡又唔見有人鬧嘅？」暗示網民龍門任意搬。對於網民反應，林二汶未有任何回應，不過睇返她IG兩日前的帖子，就貼出一張黑底白字圖，以英文寫住：「給每個默默背負沉重心情的人，總有一天會好起來的」未知是否在暗示自己上無綫都帶住「沉重心情」呢？
