政情：唔靚仔都揀 曾國衞讚太太有眼光
政府經常有跨部門合作，跨部門戀情亦唔少，入境處處長曾國衞（曾Sir）同海關助理關長何珮珊就係其中一對。尋日曾Sir大爆當年點樣發展呢段辦公室戀情，仲盛讚老婆有眼光，因為自己「個樣唔係咁好」，都揀中自己喎！
經常合作 促成辦公室戀情
曾Sir話，○三年佢被借調到保安局，第二年何珮珊亦被調至同一部門。佢話兩人經常合作，「就好自自然然咁（一齊）」，至於邊個追邊個？曾Sir講笑話自己都唔記得。結婚多年，兩人都冇諗過生小朋友，因為平時各有各忙，無謂害人咁話。
講番工作，曾Sir話，被調往駐京辦期間，同唔少內地官員合作，學到唔少嘢，當中包括講普通話同飲酒。佢話自己本身唔飲酒，但入鄉隨俗，少不免飲幾杯，但至今都未領會到飲酒嘅樂趣。佢又提到正就管理層嘅接班工作做準備，心中已有人選咁話。