超Club魔女

時興美魔女，今晚嘅「Paco巨星飯堂」就邀請咗當中嘅代表人物擔任嘉賓！《女人俱樂部》收視平穩，「M Club」成員李麗珍、張慧儀、江欣燕同葉蘊儀（Gloria）功不可沒。我就帶四位美女，去到位於旺角嘅「Canto Pot」，一邊品賞特色火鍋，一邊暢談「M Club」令人有共鳴之處。 協力☆吳靜 攝影☆蔡豪 設計☆洪萌雅 誠意打動 由曾志偉親自監製的《女人》，邀請到珍妹、慧儀同Gloria等一眾久違了嘅熟識面孔，再次演出。今晚我一定要了解一下，究竟志偉憑咩打動眾美女？ Gloria表示：「一直我同志偉都有聯絡嘅，當佢同我講會拍一部劇嘅時候，我都想睇咗劇本先，到睇到個劇本，我好鍾意，又知道佢（指李麗珍）都拍，咁就即刻應承啦！」 珍妹同Gloria相識已久，九○年二人已經喺港日合拍片《阿修羅》合作，兩人分別係對方女兒嘅契媽。珍妹話：「以前大家約埋去街買公仔，𠵱家就去行supermarket買餸！」 哈哈哈！所以無論戲裏戲外，珍妹同Gloria都有自己的「M Club」！講到接拍劇集，珍妹話今次都算係佢事業上嘅突破。「我未試過飾演一個咁八嘅角色，今次『朱莉』呢個角色畀到一個發揮嘅機會我，所以拍得好開心。」 至於Gloria，就特別為角色增肥十磅。「我個角色叫『肥菜』，咁梗係要肥肥哋，本來我諗住自己已經夠肥，點知開咗工之後，志偉話我仲未夠肥，所以之後就再谷肥啲，去到喺劇入面嘅我，比𠵱家肥十磅。」 十年轉變 Gloria同珍妹係真正好姊妹，而據欣欣所講，「M Club」其他成員都因為拍劇而成為好朋友喎。「係呀！啲人話咩不和吖！其實我哋都不知幾咁friend，𠵱家我哋有個WhatsApp嘅『M Club Group』，就算Carmen（李若彤）同Fennie（袁潔瑩）今日嘅唔到，我哋都會喺個group入面share畀佢哋睇！」 哈哈哈！有時製造新聞嘅宣傳手法，對當事人嚟講可能係完全冇影響。好似今晚我同珍妹經常乾杯，Gloria即時拍低實況、直播上「M Club Group」㗎！至於慧儀，佢就話人生每十年，都有一個轉變。 「九三年我參加選美入行，到○三年就離開香港做生意，而志偉搵我拍《M Club》嘅時候，就咁啱係一三年。呢個十年一次嘅轉變，令到我覺得人生係好奇妙嘅，有時緣份嘅安排令我有唔同嘅變化，今次拍呢個劇，就令我多咗啲新嘅朋友，我好感恩。」 美魔心法 哈哈哈！最難得係佢哋都保養得宜，尤其珍妹依然keep到大勇狀態，問佢嘅「美魔心法」，佢答得爽快：「急步行囉！每日我都會急步行半個鐘，出好多汗㗎！一定要出好多汗先會有用，所以有時間嘅話，我會焗埋桑拿，咁一定出到好多汗！」 運動之外，珍妹話睡眠亦都係同樣重要。「每日我都會瞓夠八至九個鐘，有充足嘅睡眠，人就自然容光煥發。」 慧儀就話，最有效嘅keep fit方法係湊小朋友，「我每日都要六點起身湊個仔返學，之後就冇停過，所以平日我通常夜晚九點就瞓，所以只可以喺星期五睇《M Club》。」 母愛嘅偉大，喺慧儀身上完全體現晒！佢囝囝只有九歲，為人母梗係要專心照顧啦！而珍妹嘅囡囡倚榕就喺舊年赴笈加拿大，「佢喺加拿大讀寄宿學校，近排仲send啲男仔相畀我，叫我幫吓眼揀男朋友。哈哈！我哋咩都傾嘅，唔會有代溝。」 所以欣欣都話：「佢哋圍埋一齊，好多時傾湊仔經，有時搞到我搭唔到嘴㗎！」 戲如人生，戲中「M Club」嘅友情歷久常新，戲外嘅佢哋，友情亦由此起。 我帶Gloria、珍妹、慧儀同欣欣4位「M Club」成員，去到位於旺角嘅「Canto Pot」，品嘗特色火鍋，誘發美魔女威力！ Gloria同珍妹相交多年，不論戲裏戲外都係好姊妹。 兩款湯底各具特色，均用上熬足一日嘅上湯，夠晒火候。 花膠燉響螺湯（$278一鍋） 黃耳黑虎掌菌湯（$108一鍋） 韓式鍋套餐（$438）包括韓式牛肋骨湯鍋、美國無骨牛肋片、韓國年糕、巴西牛舌等配料，貨真價實！ 澳洲有機牛肉眼（$248），肉味濃！ 慧儀感恩每10年一個轉變，令佢嘅人生更充實。 欣欣爆「M Club」成員感情好，絕冇不和。 本地新鮮牛頭脊（$248），產量極少，肌肉同脂肪分布均勻。 匈牙利綿羊豬肩胛肉（$298）係匈牙利國寶級食材，堪稱豬肉界嘅A5級水準！ 海膽鮮蝦丸（$128）每日新鮮手製，蝦肉包住海膽，層次豐富。 羊肚菌黑豚肉餃（$98/6件）選用法國羊肚菌炮製，健脾益胃。 店內有來自世界各地啤酒供選擇，我哋今晚就試咗圖中前左嘅士多啤梨啤酒。 特選菇類拼盤（$348）包括日本黃耳、雞油菌、靈芝菇等菌類，夠晒多選擇！ 欣欣（右）妙語連珠，令慧儀笑不攏嘴。 珍妹（中）同Gloria常聚首，加上其他媽媽級的「M Club」成員，多傾子女經。 下期預告 與少女版「M Club」成員品嘗特色日本料理。 Canto Pot 地址：旺角廣東道1131號薈賢居2樓 電話：3968 7888 簡介 黃柏高（Paco），03年成為電影製作人，近年兼任飲食達人、知名玄學家李丞責博士經理人及運動員經理人，集四職於一身。業務雖繁忙，但仍為本刋專欄「Paco 巨星飯堂」，及《頭條日報》周一專欄「名人會」擔任主持，與巨星、名人深情對話。