香港小/中型巴士市場一向都係二分天下，唔係用豐田Coaster 就係用三菱Fuso Rosa 好少會揀其他牌子。話說網上耐唔時都會有人對兩款車作出批評，日前Facebook 嘅友台商用車大本營會員專頁有相信係三菱Fuso Rosa 車主出 post 大鬧部車有幾垃圾。
但隨即群組中有網友留言認為係司機操作有問題，甚至於留言貼出代理商的使用手冊內頁指如果極力子操作有不當就會發生事主投訴成日著紅色引擎警示燈嘅場面。
關於個 post 提及嘅兩樣故障可以引證「容易壞」之處都好大可能真係司機嘅問題。首先，長吊極力子呢樣嘢其實真係「抵打五百大板」，司機喺起步後或完成轉波之時左腳必須盡快完全離開極力子踏板，理應係任何通過正規駕駛考試嘅司機都知道嘅常識。假設嗰位司機真係係咁吊極力子，實際原因同動機係乜就當然唔知，但純粹理論層面去分析，司機此舉不但證明佢手車幾水皮又同時嚴重損害緊個波箱壽命，加速架車嘅死亡。
仲有另一個可能性搞到成日著紅色引擎警示燈就同個 post 提及嘅第二個毛病有關。Air intake Sensor 本身於車主而言嘅用途係監察住進氣濾芯 (俗稱「風格」) 是否「夠鐘」需要更換，其運作原理係監測進氣流量，目的係確保有足夠嘅空氣進入引擎氣缸。所以，若發覺流量下降的就會出故障碼（俗稱：出 Code），正常而言應該係要更換濾芯。但個 post 話經常發生仲有最少三個可能性，第一係 Sensor 壞咗 (最經常被以為係咁而持續更換嘅零件)；第二係進氣管道內有阻塞導致流量下跌 (呢個可以另外用儀器檢查得到，若屬實就要更換相關零件)，第三係司機長期「地板油」駕駛。
第三種可能性嘅成因係引擎電腦嘅運作係持續計算進氣量與油門深度是否配合，即係「油門踩得越深，進氣量就要越高」。相反地進氣量不足就好容易出故障碼，跟住就會認為「三菱 Fuso Rosa 好易壞」。至於 link up 返吊極力子，就是即使未出故障碼，引擎轉數上升速率都會較慢，然後就感覺上「架車唔起」於是地板油稍扯高轉數。
但事實上不論駕駛 Rosa 還是 Coaster，環保三型（歐盟3期） 或以後均均配備 渦輪增壓引擎（Turbo Engine），起步加速已經無需好似以前咁「波波盡，腳腳到底」；尤其是 環保五 /環保六 嘅 三菱 Rosa 所配備的 4P10 引擎，控制油門嘅模式猶如私家車般已經力量充沛；相反地踩「地板油」就會因為引擎電腦程式嘅 Acceleration Lock 而搞到架車「踩極都唔去」。
有唔少思想未有與時並進嘅老行尊，腦海裡仍係維持住 BB40、BB23、日產Echo、柯士甸、Morris等已經不再存在嘅車種操控模式（即係：必須踩地板谷到盡扯到行」，因而就有可能導致呢個問題發生。其實隨住科技嘅進步，新車感應器越加越多，而依班老行尊仲係食古不化用以前嘅駕駛模式去揸車，即使俾架佢哋心中最無敵嘅豐田Coaster 佢哋揸都只會一樣引擎燈長著，返廠多過行街。
其實講咗咁多嘢，我哋都係想行內班老行尊無論揸邊款車都好，都要與時並進，你哋成日用一種錯誤方式去「揸壞架車」，結果就係影響到車公司嘅收入，繼而車公司搵唔到錢就要減人減車，最終受害嘅都係自己。對車公司嚟講，其實類似大公司嘅車型訓練其實都係必要嘅，訓練可以改善司機嘅駕駛態度減少車輛返廠維修嘅次數，降低營運成本先係上策，不過好多業內人士同我哋表示呢個行業嘅流動性太高，加上唔少司機都係「性格巨星」，所以同佢哋講訓練根本係舉步維艱且徙勞無功，咁唯有靠班司機生生性性唔好成日揸壞架車啦。
Be the first to comment