頭獎任選目的地機票 旅發局除夕大抽獎 聽晚6pm後登記參與

話咁快聽日（31日）就係除夕喇！要迎接新一年，當然要好好慶祝，更加唔可以錯過旅發局今年首辦嘅「香港除夕倒數」大抽獎！頭獎係4套任選目的地來回機票，獎品豐富，又開放畀全民參與，大家都急不及待，好想快啲參加。不過大家唔使心急，黛安知道旅發局特製咗「十問十答」，為大家解答詳情，知得愈多，中獎機會就愈大啦。

首先，最常見嘅問題一定係「喺咪今日就可以進入網站登記參加抽獎？」答案︰唔係！無論「即玩即贏抽獎遊戲」同「壓軸大抽獎」都係聽日傍晚6點開始，到時網站會開放5個半鐘至夜晚11點半。獎品亦非先到先得，好似「即玩即贏抽獎遊戲」咁，會送出2萬張100元超市現金券，並會喺成個遊戲時段內隨機抽出，所以只要喺當晚11點半前完成登記同參加遊戲就有機會贏到。而且毋須玩咗第一輪遊戲先可以登記「壓軸大抽獎」，可以2個都參加，又可以先登記抽獎再玩遊戲，好有彈性㗎！

頭獎得主將會喺ViuTV 99台嘅「香港除夕倒數」特備節目中公布，如果中咗頭獎機票，謹記要喺1月1日凌晨1點前，透過指定熱綫登記核實啊！至於其他獎品嘅抽獎結果，就會喺當晚凌晨2點後於活動網站公布，之後會有長達1個月領獎期，唔使擔心錯過消息。

黛安仲知道，無論旅客同本港市民參與中獎機會都係均等，但要留意活動只供除夕當晚留港倒數嘅香港市民或在港旅客參加，活動網站亦只限香港嘅IP位置進入，祝大家好運！