方東昇繼續有創意金句 《世界零距離III》第一集金句重溫

無綫經常被指節目質素低兼製作馬虎，不過由無綫新聞部製作嘅《世界零距離》系列就被網民激讚。由主播方東昇，新聞小花陳沛珈及黃曉瑩主持嘅《世界零距離》系列同一般旅遊節目唔同，佢哋會去一啲冷門、鮮有港人去旅行嘅地方去探討當地經濟、政治及民生等問題，之前佢哋去過不丹、福克蘭群島、瓦努阿圖等等。唔少網民仲好鍾意方東昇嘅主持方式同埋佢所拋出嘅創意爛gag金句，上年播出《 世界零距離 II》已經成為大家嘅討論話題。喺上年，無綫就再添食播出第三輯《世界零距離 III》，節目喺互動新聞台及TVB新聞台播出，無綫仲將第三輯重新製作成半小時全紀錄版本喺噚晚開始逢星期一至五喺翡翠台播出。

今次《世界零距離 III》會去埃塞俄比亞、厄瓜多爾、哈薩克等等嘅冷門地方，噚晚已經播出第一集，佢哋去咗東非嘅埃塞俄比亞探討當地嘅生活水平、國家發展方向同埋採訪長跑選手基比斯拉斯，而家就同大家重溫一下噚晚方東昇嘅金句啦！

1. 「一試無妨，再試投降」

2. 「外地人當草，當地人當寶」

3.「平民愛廣場，高人上深山」

4. 「上氣不接下氣，高手教你理順條氣」

5.「路遙知馬力，啲汗係咁滴」

6.「無論喺邊個領域，都有一股原動力」

7.「帶領埃塞跑出彩虹，告別貧窮」

8.「我想知，但係我唔想試」