上環圖章小店 印出本土色彩
今日工作坊正正就在情懷十足的文華里街頭，面對一系列飽歷風霜的排檔，由吳師傅教我們這套中國傳統手工藝。
師傅每人派發一枚石章，首先教我們要將底部用粗砂紙磨至平滑．．．
而師父巡視協助我們就說：「唔～你磨得唔平喇．．．你就凹咗喎」，（吓？在場只得師傅一個睇得出, 我哋全部都唔知點睇平定唔平？）
我唯有磨了又磨, 師傅走來一拿上手「幾好喎, 磨得唔錯．．．（真係？我只係一味死力磨咋喎），之後就用鉛筆畫一個十字，找出平衡點。」
我今日分配到一粒叫肖山紅，另外朋友白色的叫青田, 有否發現明顯我的肖山紅比較短， 因為我剛才不停磨磨磨， （估唔到咁易磨走咁多～驚驚地）。
之後就寫字，師傅輕而易舉就可以反轉寫出中文字， 並說：「隨心就得， 無所謂嘅， 最緊要造得開心．．．」(你講就易，我完全唔知點攪，於是就說：「師傅呀．．．不如幫我寫個「仁」字吖？」)
師傅即時答應；「你想寫隸書，定篆書呀？」我答：「無所謂．．．你話點書就點書。」師傅停一停：「我就梗係唔想輸啦．．．」（估唔到吳師傅都係GAG人喎！）
登登登凳．．．這就是師傅給我的「仁」字真跡．．．（其實我覺得似擘大咗口嘅史諾比多啲）。
而夾住我的石圖章的工具， 就是另一位周師傅的個人收藏「呢個樞， 我用咗十幾年架啦， 而家香港應該無得賣，大陸應該仲有嘅，夾住嚟雕刻用架。」
揚言一刀走天涯的吳師傅， 手起刀落，極速雕出一個「王」字， 不過大家卻一臉茫然。「初頭慢慢啦，今日大家當認識一下基本功先啦，唔識係正常架。」（吓！咁難雕架， 我都係Keep起真跡圖章，留為紀念算喇．．．）
另外， 跟周師傅傾談中， 他有感而發指：「1990－1993年， 每日我開檔前，一定有幾個日本人等我開舖，當年最風光， (咁而家做咩人生意多呢？) 而家咩人都唔多， 根本無人嚟．．．」(我好似問錯問題, 令師傅有啲尷尬．．．唔好意思。)
原來， 當年公價150元雕一個圖章， 因為有人鬥價，甚至只收70元一個，不過就拿上大陸製， 質素自然下降， 當年圖章街更被那些敗類影響，污名成「行貨街」， 所以人流愈來愈少。 (點解行行都總有啲一個累全家的衰人， 最鬼憎人鬥價。)
兩年前學院開始參與後巷改善計劃， 希望可以保留昔日傳統工業， 更加希望加入不同藝術元素。 除了想吸引更多香港人及遊客之餘， 同時告訴大家， 香港不止連鎖集團及大商場， 香港仍然有充滿人情味的小店， 希望有朝一日，可以將香港由消費形旅遊， 變成為文化形旅遊。
到時如果成事， 遊人質素， 甚至環境污染問題應該都會有很大的改善，最起碼一些舊文化， 傳統創意小店， 全部也可以繼續生存， 繼續為香港添上美麗的顏色。 （我真心唔想全港九30間商場， 都係一模一樣的海港城，因為我要行小店！）
（節錄）