【新精武門】鍾鎮濤「瀟灑哥」成最搶Fo配角 人生求燦爛不求永恆
撰文:許育民
出版:更新:
周星馳早期力作《新精武門1991》,食住《賭聖》個勢即拍即上,故創作上亦有類近地方,例如角色都是從內地而來,兩個角色都具天生異稟,一個有特異功能一個右手好大力,兩片都是由張敏演夢中女神。雖然如此,但仍不失笑點,亦開正星爺所愛,有不少情節向偶像李小龍致敬。而且該片更為星爺找來一個新拍檔︰鍾鎮濤「瀟灑哥」,其爆笑程度不下於星爺。
今日重溫,B哥哥鍾鎮濤的演出相當爆笑,演得非常享受。不過要知道當時的B哥哥其實是男主角之選,《表錯七日情》、《青蛙王子》尚算賣座,只是去到80年代尾叫座力放緩,加上90年代周星馳崛起,要迎合這股無厘頭風,實在要有所調整。
自命大上大落
戲中B哥哥擔任配角,並以一個小混混,性格無賴的「瀟灑哥」登場。過去B哥哥都有演過喜劇,多以傻戇見稱。「瀟灑哥」不同之處是戇居中帶有自信,正如他自言自己條命水︰「我瀟灑份人擺明大上大落,正所謂三更窮五更富,只求燦爛不求永恆。」似乎已總結了自己的人生,比起星爺戲中的劉晶,戇直單純、尊師重道、重情重義,有極大對比。
重溫瀟灑哥爆笑造型
+1
「瀟灑哥」更出色的,還是他的言行,甚至造型。好似被星爺掉晒所有衫後,走去撩隔籬屋陳小姐條皮裙著已夠爆,還有出自他口的特色點心︰「唔似貓、唔似狗、師奶淫得很」(魚翅包、魚翅餃、鮮蝦銀針粉),都係啜核到令人一笑再笑。
壓軸令人感動
不過鬥搞笑,真係好難贏到周星馳,所以「瀟灑哥」贏的是角色有血有肉。戲中二人同樣喜歡師姐霍敏(張敏飾),但知道自己無機會時便決定讓愛,更為劉晶寫情信助攻。去到結局,一生百無聊賴,冇乜做過正經事的他,為保護霍敏更以血肉之軀去抵擋眾師兄弟的襲擊,這幕最為感動,亦真真正正演繹一次「瀟灑哥」。