世界精英雲集嘅體育盛事完結喇～早前嘅單車女子個人公路賽，爆冷由奧地利選手安娜．基森霍夫（Anna Kiesenhofer）贏得金牌。Anna唔單止體能優勝過人，原來仲文武雙全，本身更係一位傑出嘅數學博士！

年僅30歲嘅Anna，擁有英國劍橋大學數學碩士學位同埋西班牙加泰羅尼亞理工大學（Universitat Politècnica de Catalunya, UPC）應用數學博士學位，目前喺瑞士洛桑聯邦理工學院（Swiss Federal Institute of Technology Lausanne, EPFL）擔任博士後研究員，專攻非線性偏微分方程式。 作為一個業餘單車選手，Anna冇教練，完全靠自學，仲兼任埋自己嘅軍師，由飲食營養、設備、訓練到戰術，都一手包辦。

Anna知道比賽冇捷徑，更加冇奇蹟。所以喺比賽前一個月率先去咗東京考察場地，詳細研究當地嘅天氣同路線，運用體溫測量器記錄自己喺唔同氣溫下嘅表現，再用呢啲數據做賽前準備，所以佢比其他選手更加容易適應環境。做好分析後，Anna制定一套適合自己嘅戰術，比賽開始已經一馬當先，並一路領先到終點，憑住智慧同能力，勇奪金牌！

其實Anna由鐵人三項起家，但2014年因跑步受傷轉攻單車， 2017年曾短暫加入過職業車隊。2019年Anna以業餘車手身分贏得奧地利國家公路賽同計時賽冠軍，並喺世界錦標賽計時賽中排名20，連續3屆獲得奧地利計時賽冠軍。今次喺呢場全球矚目嘅體育盛事獲得參賽資格，並喺單車女子個人公路賽中，擊敗曾獲世界冠軍嘅荷蘭選手安妮米克·范弗勒滕（Annemiek van Vleuten），以3小時52分45秒完成137公里嘅公路賽，比亞軍選手足足快咗1分幾鐘，更加令到荷蘭選手擺烏龍，以為自己衝線奪得金牌！

-----------------------------------

想知道2021年恒隆數學獎嘅最新動態，就請即click入呢條link https://hlma.hanglung.com ，去恒隆數學獎官方網頁睇睇啦～

恒隆數學獎嘅 Instagram 已經正式開通喇，快啲 follow 我哋啦：https://www.instagram.com/hanglungmathematicsawards/

#用微積分贏金牌 #勝利方程式 #做足功課 #精密計算 #贏到開巷 #奪金從不容易 #但寫論文嘅挑戰都唔小 #大家都要加油衝刺 #學霸 #運動中的數學 #應用數學 #微積分 #數學堂 #恒隆數學獎 #無限可能