【驚蟄2019】本周三驚蟄係咩日子？打小人步驟禁忌一文睇哂

身邊小人當道、有氣難消嘅你要注意啦！本周三(6號)係二十四節氣中嘅「驚蟄」，亦即係「打小人」嘅日子。

驚蟄(粵音京直)，代表天氣回暖，雨水增加，春雷驚醒冬眠中嘅蛇蟲鼠蟻，驚蟄英文為Insects Waken，意思都相當吻合。根據天文台資料，本周三驚蟄會有驟雨及雷暴，無論你當日會否打小人，都記得帶把遮出街。

驚蟄由來

講返驚蟄，根據民間習俗，當日人們一般會祭白虎同打小人。相傳民間以燒香同祭白虎嚟驅趕蛇蟲鼠蟻，後來演變為借白虎之力鎮壓小人，並漸漸發展出驚蟄當日祭白虎、打小人嘅習俗。

驚蟄打小人旺點：銅鑼灣鵝頸橋底

打小人切忌張揚，最好喺陰暗地方進行，聽講喺殺氣大嘅地方打小人會更加靈驗。位於銅鑼灣嘅鵝頸橋，唔單止夠哂陰暗，而且橋底正正係三岔口，殺氣特別重，所以一直以嚟都係打小人嘅熱點。每次經過鵝頸橋底，都例必會聽到一班神婆唸唸有詞：「打你個死人頭，打到你有氣無得透！打你個小人腳，打到你無鞋挽屐走！」

驚蟄打小人步驟你要知

打小人雖然係民間習俗，但一啲都唔可以馬虎，最緊要準備好祭品同跟足步驟。祭品方面，要有小人衣紙、五鬼紙、用黃紙製成嘅「紙老虎」、肥豬肉同觀音像。首先，要以香燭敬奉神明，然後喺小人衣紙寫上小人嘅資料。之後神婆會一邊用鞋大力打小人衣紙，一邊幫你唸口訣，再將小人衣紙夾喺掃過肥豬肉嘅紙老虎口中，意思係令紙老虎口中充滿油水，唔能夠再傷人。最後，神婆會撒芝麻、豆子等，將一切污衊、災害化解，並用紅色貴人紙為委託者祈福，進寶和擲筊後就完成整個打小人程序。

驚蟄打小人注意事項

1. 如果你有意打小人，先要確定自己所屬生肖係咪同打小人日子相沖。今年驚蟄日沖猴，即是屬猴嘅人想打小人不宜親自出手，宜搵別人代勞。

2. 如果係自行打小人，千祈唔好喺屋企打；而打完小人嘅衣紙要化咗佢，唔好帶返屋企。

3. 用嚟打過小人嘅舊鞋，最好都係唔好要喇。

另一方面，就算你唔打小人，都難保唔會成為被打對象。如果想求安心，可隨身攜帶貴人牌或化太歲牌，又或於家中撒芝麻、綠豆、紅豆、黑豆、花生或白米，亦可令小人走散，化解危機。

來源：Links Between the ‘24 Solar Terms’ and Astronomy

香港天文台

【玄之又玄】驚蟄打小人 三岔路口夠殺氣

【2D睇】驚蟄打小人 有咩避忌要留意？

相關字：

驚蟄意思 驚蟄2019 驚蟄讀音 打小人 鵝頸橋底 驚蟄節氣 驚蟄英文 打小人禁忌