【秘書唔易做】Com Sec名物——「變態阿姐」是怎樣煉成的？
要數數Com Sec（Company Secretary，公司秘書）的名物，「變態阿姐」應該係長居第一位。
有人可能會話：「咁你即係歧視女性啫？！你估男上司就一定好咩，男人賤喺上嚟，都可以好賤㗎！（下刪一千字）……」冇錯，男人要賤起上嚟可以賤過女人，之但係呢個唔係我哋今日討論嘅範圍。
文：吾係秘書——卡比
編按：Company Secretary（公司秘書，簡稱Com Sec）與私人秘書一職不同，它是屬於合法合規（Legal & Compliance）範疇，簡單地說，公司秘書的工作是照顧一間公司的「生老病死」。
何謂「變態阿姐」？
對於變態嘅定義，有人可能係妹仔肚——少少刺激都頂唔順，有人可能可以好Hardcore——愈墮落愈快樂（我就唔好呢味嘢嘅）。以在下多年來嘅觀察及根據正常人嘅承受程度，「變態阿姐」通常有以下幾種特徵：
按圖了解：
根據非正式統計，「變態阿姐」以中年（40歲起）未婚女性居多。我嘗試就「變態阿姐」呢個現象分析箇中原因。
工作性質
廣義來說，Com Sec工作量多而重複；根據公司註冊處官網數據顯示，香港於2014年至2016年期間成立的私人公司，約有14萬間（冷知識：多數由NGO成立的Company Limited by Guarantee一年成立數目平均少於1000間）。所有私人公司均需Fulfill最低限度的Annual Compliance（搵商業地址作為註冊地址、續領BR、召開AGM會議／撰寫AGM文件及Annual Return Filing）。因此，市場對於公司秘書服務（Company Secretarial Services）的需求很大。而從業員於Pro Firm或CPA Firm工作居多。
香港中小企傾向減低營運成本，Com Sec對於佢哋來說，係一筆每年需要額外俾錢俾人做嘅工作，猶如申領其他牌照如食物製造牌照、酒牌一樣，其視之為「企業稅」的一部分。因應呢類客人嘅需求，坊間的CPA Firm及商業服務公司正正可以提供價廉物美的服務；啲客搵開呢類公司做Audit，順便搭單搵埋旗下嘅Com Sec Firm做埋Annual Compliance，呢種一條龍服務，廣受中小企歡迎。
正所謂一分錢一分貨，大部分Pro Firm或CPA Firm的客人（統稱「客人」）一般結構簡單，只需做最低要求的Annual Compliance，最重要係唔好俾到麻煩佢哋，同埋……最緊要——平。
女比男多有得解
香港私人公司秘書Annual Compliance盈利少且市場競爭大，因此，一般Firm都需要接一大堆客，以量取勝去維持生計，一個Com Sec嘅Portfolio閒閒哋都有100、200間香港公司。呢度可以解釋點解Com Sec的工作量多而重複。負責的公司數目多，變相要照顧（用「湊」嚟形容會比較貼切）嘅客人數目亦多。
女仔天生性格一般比男仔細心、不怕悶、有耐性，喺呢個需要與客溝通及處理重複性高嘅行業，女性投身呢個行業意欲較男性高，而部分公司老細亦傾向聘請女性。
所以，Com Sec行業嚟講，女性從業員遠比男性為多係好合理嘅事。
然而，上述情況近年略有改善，隨着更多大專院校如樹仁、恒管提供企業管治（Corporate Governance）學士學位課程及年輕人對Com Sec行業認識加深，新一輩修讀相關課程繼而投身Com Sec行業嘅男女比例差距有拉近的趨勢。但喺短時間內，男女比例不見得會有很大改變。
女人多，自自然然大部分問題出自女人身上，係咪好合理先？
行業生態
多女人，咁點解一定要係變態嘅先？咁我哋要講吓行業生態。
以CPA Firm為例，有唔少客人係老細舊相識，如何與客人好好相處係一種學問，老細一般不會很清楚解釋每個客嘅脾性以及與其之交情，客人於Internal Deadline，甚至喺Government Deadline後才遞交已簽署嘅Annual Compliance文件嘅情況屢見不鮮。
Com Sec作為Legal and Compliance行業之一，容錯率低。例如，遞交Annual Return係有限期嘅，以香港Private Co為例，於結算日當天42日內遞交不到文件予政府的話，需繳交罰款，嚴重者，公司董事有機會需就此負上刑事責任。
一名Com Sec從業員一個月需要處理最少10份香港公司嘅Annual Return，行內一般將Internal Deadline Set得比Government Deadline早兩、三個星期，其實已預留時間俾啲客遲交返已簽署文件。我哋通常一個禮拜催個客一次，愈接近Deadline，催得愈密。正因為客同老細嘅關係千絲萬縷，Com Sec從業員成為老細及／或上司之間的磨心機會率很高。若跟足正常程序催客，有機會俾客鬧返轉頭，甚至直接向老細投訴。而不跟規矩做事導致罰款產生，上司生怕俾客戶責怪，怪罪於下屬。
單單返工要同客人玩拉鋸戰已用上不少心力。
此外，由於「人人都需要Com Sec的關係」，客戶良莠不齊，有些客戶不尊重Com Sec從業員，覺得你哋「做少少嘢」就收咁多錢，口講「啲文件我都識整」，身體卻很誠實——俾錢我哋賺，有些客人藉此要求提供折扣。
喺呢個環境工作底下，Com Sec從業員工作滿足感低下。
社會意識型態（Social Ideology）
上文已指出「變態阿姐」一般係指未婚中年女性，關於呢個婚姻狀況及年齡嘅組合，我有以下解讀。
香港社會對於未婚中年女性投有奇異眼光，喺呢個年紀而未結婚的女性一般被人標籤為有生理或心理有缺憾。
未婚中年女性喺香港呢個社會生活很容易造成心理不平衡，需要尋找精神寄託，不想回家對着四面牆。最容易及被動嘅方法，就係將時間全部投放在工作，麻醉自己。情況就好似父母過份將所有的精神寄托投放在子女身上，Putting All Eggs Into One Basket，他們只能夠從工作／子女身上獲得滿足感。
但咁樣做「風險」很大，若事情稍有不如意，人就會很容易動怒，使到整個人抗壓能力低，呢個係一個唔健康嘅現象。情緒沒有宣洩的渠道，唯有向同事開刀。
正因為通行嘅人好多都係咁，形成一個惡性循環，自自然然成為呢一行嘅不明文Norm（呢種真係大家想要嘅Norm嗎？）。唔好以為「變態阿姐」淨係喺Firm出現，有唔少做Listed Co的阿姐都係做Firm出身的。
鬧人者繼續鬧，而被鬧者則有部分變成施暴者。
「我以前都係俾人咁鬧㗎啦，受少少氣都唔得。」
但願不再有變態阿姐……
「個個都鬧人，唔通個個都想俾人鬧咩？」上面講咗咁多嘢，呢個係一個死局嗎？我覺得大家一人可以行多一步，逐步改善現有情況：
．多一點同理心，無人想俾人鬧，鬧人大前題係要有一個合理目的
．掉棄「少做少錯」心態，老套啲講句，學習係從錯誤中學習，「What Doesn’t Kill You, Makes You Stronger」
．拒絕無謂OT
． 善用工餘時間發展個人興趣
．最重要，不要讓自己成為下一個「變態阿姐」／「變態阿哥」
筆者希望有一日，「變態阿姐」終有一日喺Com Sec行業嘅Dictionary消失。
《香港01》App，教你做個醒目打工仔！
立即下載：
https://hk01.onelink.me/FraY/hk01app
【Intern】炮轟煙腸唔懂事 有冇諗番舊陣時？ 大家為咗Offer…
打工仔財務自由的12個等級 搭港鐵、iPhone X、坐國泰都係指標？
所謂 「財務自由」 從來都係一個「相對」 的概念，視乎你自己的要求與期望。即使你成日覺得唔夠錢用，但分分鐘其實你已經係某程度的財務自由，只你一人未發覺！