Facebook

夏蕙 bb 真係香港嘅正義女神！

近月嚟，被稱為「香港後花園」嘅南生圍疑遭連環縱火，美麗嘅大自然景觀被燒成灰燼，香港人無一不心痛，包括香港女神黃夏蕙。

佢老人家日前有感而發，特登搭車去到南生圍，拍番輯寫真（放心，有著衫）。夏蕙 bb 身穿黑衣，表達對南生圍嘅悲傷，拍照時佢亦不忘挺起雙峰，令夏蕙 bb 性感氣質與大自然融為一體，燒成灰嘅南生圍頓時再次火辣辣。

夏蕙諗起以前好多愛情片都係喺南生圍拍，於是有感而發：「唉！要地方起樓，香港仲有大把可以揀，何必要搞Lee度啦？」夏蕙所言甚是！佢仲開出一個令人欲拒還迎嘅承諾：「下次再燒，我就實行讓半球（指酥胸半露），或者唔著衫咁影（寫真）！實行抗議呀！」

嘩… 雖然好唔想見到南生圍再遭不測，但夏蕙 bb 呢個衰妹嘅 offer 實在太吸引… 唔著衫嘅夏蕙，想睇嘅香港男人真係由南生圍排到去吉慶圍！好衰㗎你，夏蕙！我唔準你咁魯莽呀！

夏蕙最後咁講：「可憐下我Lee個老人家，唔好再搞南生圍，俾香港後花園Lee個美譽流傳落去啦，求求你！」係啦，無謂虐老，要個老人家俾兩蚊搭車入去舟車勞頓唔著衫影寫真啦，求求放過南生圍！

#我愛夏蕙bb影迷會
（圖片來源：facebook @ Wong Hawai）