喺2021年底，強積金整個資產總值接近1.2萬億元。係呢1萬2千億元中，啲錢又有無話集中咗係邊d基金身上呢？喺2021年，最多人買嘅又係邊隻基金嚟呢？最多錢流入嘅又係邊個計劃呢？咁多錢留咗入去嗰幾隻基金度，當中又有冇你份呢？I
按計劃來講，大家都知市值最大嘅計劃係宏利，第二就係匯豐，之後第三就喺永明彩虹啦。第四就係友邦，第五就係中銀保誠嘅簡易計劃。大家見到，第一二位都拋離其他對手好遠嘅。換過角度畫幅圖俾大家睇。係pie chart就更加清楚睇到果3大加埋已經超過一半。
超過一半嘅強積金投資喺頭三大度，相信你的強積金，好大機會都有買到係呢頭3大呀。
睇完唔同計劃嘅資產分布之後，如果按基金來講，最多人買咗嘅係邊隻基金呢？資產值最高嘅就係宏利康健護理，宏利康健護理呢隻基金，我哋另外有片都講過，有興趣嘅可以睇返。而第二大嘅就係永明嘅港股基金，第三大嘅就係宏利嘅中華威力基金，第四同第五位分別係匯豐嘅恆指基金同埋匯豐嘅增長基金。
強積金整體市值喺舊年六月中到達頂點，超過咗1萬2千億，之後就開始慢慢回落，呢個現象應該點解釋呢？這個現象同港股表現有關。因為大家嘅強積金投資，只係計香港股票，被動加主動，都有超過15%。如果再加埋中國股票同埋大中華股票類別，就有超過22%係投資喺呢幾啲類別上面。咁樣仲未計投資喺混合基金入邊嘅港股比例，所以如果香港股市表現唔好，整體嘅市值就會跌好多了。
剛才講既係基金既資產值有幾大，但2021年投資市場風起雲湧，邊隻基金年內最多人買呢？大家唔好以為強積金淨係可以長渣等退休，原來都好多人做主動性嘅資產配置，調來調去㗎。
講得基金既吸金力，即係在這段時間內的資金流入隻基金。基金的資金流入流出的數據，都係我哋自己儲返嚟，再自己計算、分析得來㗎。外邊有啲統計報告，要收費又貴，又唔畀一般人訂閱㗎。我哋就唔同啦，我哋有咁獨特嘅數據，開放畀大家隨時可以睇，所以大家要關注我哋支持我哋呀，大家訂閱咗未呀?
係同大家講2021年嘅吸金王之前，首先，大家不如先估吓，2021年吸金最多嘅基金類別同走資最多既類別係邊類呢？相信大家都估到，吸金最多的基金頭5位都係股票基金，而走資最多既基金，多數都係債券或保守保證基金。
全年吸金王就喺永明嘅港股基金，佢全年吸左近46億元，第二位係宏利既美國基金，佢吸金能力緊緊低過永明少少，吸左近45億。第三第四位嘅分別係永明嘅大中華股票基金，同埋宏利嘅康健護理。第五位嘅係宏利嘅港股基金。
頭5位全部都係永明同宏利嘅基金，可見呢兩個計劃係2021年吸金力特別強。睇完五大吸金王，我哋又睇吓2021年入邊嘅走資王係邊個呢?
走資最多嘅5隻基金，有3隻係保守或保證類，一隻環球債券，一隻係增長類別。
走資最多既係，匯豐既保守基金，走資第一位比第二位多好多，第一位走左超過31億元。我哋見到五大走資的基金都係保守類別多，而從計劃的層面來講，就有三隻係匯豐，宏利既利息基金同中銀保誠既保守基金都榜上有名。
一隻基金吸咗好多錢或者一隻基金走咗好多錢，都唔代表整個計劃有吸金或者走資嘅情況出現嘅。所以我哋又整個計劃黎睇，未睇計劃嘅資金流之前，印象中都知道香港有超過20個強積金計劃，但一睇資金流之後，就以為香港只有兩個計劃，點解咁講？大家睇吓幅圖就知道。宏利同永明差唔多吸晒超過8成2021年強積金流入資金，相反地匯豐同恒生就有資金淨流出嘅情況。供款人每個月都仲供緊強積金，至於有咁大量嘅淨流入或淨流出，好明顯係因為額外供款或者係轉計劃所引致嘅。
西瓜靠大邊，強積金嘅未來發展會係點大家都估到啦。講到呢度，突然間想起張家輝嘅金句：現在冇、將來會有，這句說話可能係對永明或宏利幾好嘅形容。繼續發展落去，這兩間公司想統領強積金市場就不是夢了。
強積金喺香港個個打工仔都要供，各個供應商好心就俾心機努力經營下自己個計劃，唔好好似二世祖咁，諗住自己仲有大把，坐食山崩，遲下會點，就自己知啦。最後又同大家講多句，最多人買嘅計劃，表現未必一定最好，大家又想唔想睇下，係2021年邊個計劃整體來講表現最好呢？如果有興趣嘅話，大家就留言話俾我哋聽啦。
延伸閱讀
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
