廣東話［香港地道俗語］
香港地道俗語，係指香港日常生活使用嘅俗語詞彙。有啲重喺香港嘅電台、電視台出現嘅特有俚語、俗語同專業術語，部份俗語經常喺香港網絡上出現。
［ＰＧ家長拍引］
。Gag
。爛 Gag
係指［笑話］。英文字典證實外國都有呢個講法。［爛 Gag］係指好差嘅笑話，又叫做「冷笑話」。
。Kai
形容［無聊］同［可笑］嘅嘢，重有形容一啲［低能］同［白痴］嘅人，呢個字有啲侮辱性，同［硬膠］意思相近。
。Hea
好得閒，無事做。正字為［口氣］。
。仆街
。仆街死
。死仆街
指抵死嘅人，又可以解［去死啦！］、咒人哋［橫屍街頭］嘅意思。而［死仆街］，就明係鬧人。
。無記
。三色台
。是但台
香港電視台〔無線〕電視廣播有限公司嘅俗稱。
。Ｍ記
。麥記
。老麥
。牡丹樓
係麥當勞（McDonald's）嘅俗稱。
。Now 頭
。Now 佬
原本係［撈鬆］，因為普通話『老兄』嘅發音同粵語嘅［撈鬆］，［撈鬆］成為咗廣東人對外省人嘅粗俗稱呼。後嚟演化至對外省男性稱為［Now 頭］或［Now 佬］，外省女人就叫［Now 妹］或［Now 婆］，再粗俗啲係［Now 西］。
。假港
係指香港嘅［新移民］嘅俗稱。
。七仔
。7．11
係（7-ELEVEN）便利店嘅俗稱。另外又可以用嚟形容啲人面目可憎，動作遲鈍。用法可以參考廣東粗口五大字。
。問責
香港啲高官要對佢哋自己嘅錯誤負責，通常係要革職。
。食死貓
即係［孭黑鑊］，接受啲唔係因自己行為構成嘅後果，可以參考［祭旗］。
。粉腸
廣東話嘅粗口［撚樣］嘅諧音之一，用嚟形容啲人面目可憎或者奸狡。
。金魚佬
喺金魚街一帶徘徊嘅中年男人，泛意係指對細路有興趣嘅中年男人，好似［叔叔帶你去睇金魚…］係金魚佬嘅口頭禪。
。監躉
即係［坐花廳］嘅囚犯、囚徒。
。北漏洞拉
原本係越南話［現在開始］嘅意思，出自上世紀八、九十年代香港政府通過電台廣播向越南船民講解新政策內容嘅第一句。由於香港人都長期喺本地電台廣播嗰度聽到呢段越南話廣播，香港人就［貪過引］戲稱越南人係北漏洞拉。
。冇雷工咁遠
係指好遠嘅地方。
。鬼佬
呢個詞語係演變自［洋鬼子］，又叫［黃毛鬼］，係自中國人見過外國人嘅樣之後嘅普遍戲稱。因為大多數外國人嘅身形大件，皮膚蒼白，紅鬚綠眼，而且重週身毛，個樣好似傳說中嘅山鬼，因為咁而得名。
。碌葛
係指人呆笨，好似［粉葛］咁保頭保腦嘅人。
。攔坦
原本係［死蘭彈］，意思係［毫無責任感嘅軟皮蛇］。但係呢個詞語經過發哥［周潤發］嘅演繹後，就變成咗鬧嗰啲行事粗魯冇禮貌、冇教養同冇文化嘅人。
。豬兜
。豬 dum 兜
係譏諷嗰啲又笨又蠢嘅人。
。揸兜
係指或詛咒人乞食。
。大炮和／大泡和
係指嗰啲經常撞板，做事魯莽嘅人。
。食塞米
即係話嗰啲成日遊手好閒，冇啲建樹嘅人。
。食穀種
係指無正常收入，靠積蓄為生。
。睇餸食飯
係指因應情況而做事。
。木嘴
讀音係［muk7 zeoi2］，木字轉陰入調。指乳臭未乾，呆板嘅人；近似［hihi］。
。師奶
讀音係［si1 naai1］，奶字讀高平聲，如果有懶音就會讀成［屍拉］。
。Ｃ９
即係［師奶］，用９嘅英文［Nine］嘅發音。
。黃面婆
係話嗰啲面部已經現出泛黃嘅女人。「黃面婆」係男人用嚟形容自己年老、唔懂保養、潑辣嘅另一半。亦有啲男人用嚟鬧一啲潑辣、唔識做嘅女人。
。茂李
正字為［暓里］，讀音係［mau6 lei2］，［李］字轉陰上聲，可以寫成［茂利］。又係唔受歡迎嘅人嘅俗稱，個量詞係［條］，［嗰條暓里］。
。瀨尿蝦
通常用呢個詞嚟取笑夜晚瀨尿喺床度嘅細路仔。要留意［攋尿蝦］先至係正寫。
。老虎蟹
用嚟比喻惡霸同大惡人，因為佢哋惡得好似隻老虎一樣，霸氣橫行就好似蟹咁而得名。
。卡啦蘇
。騎呢蘇
經常做埋啲莫名其妙嘅舉動或者行為嘅人，又或者外表裝扮得好怪相嘅人。［騎呢］係形容詞，可以單獨使用。
。麻甩佬
通常用嚟形容嗰啲好猥褻嘅男人。
。跴親條尾
係指有意或無意激嬲咗人。
。Ｏ記
即係［有組織罪案及三合會調查科］，英文係 Organised Crime and Triad Bureau，簡稱 OCTB，係香港警察裡頭嘅一個部門。
。磨碌
原本係指［磨盤上面嘅磨扇］，後嚟演變成暗喻啲人外表同行為又笨又蠢。另有一個係話源自英文字 Moron 嘅音譯，解做低能仔、白癡仔。又有人傳［茂利］呢一個字亦係由 Moron 嘅另一個音譯。
。賓周
通常係指男仔嘅［雀仔］，或者指隻雀仔好細隻。有時又會用［賓周仔］嚟嘲笑美國賓夕法尼亞州嘅人。
。蛇王
即係話人偷懶。
。賣飛佛
係 My favourite 嘅港式英語讀音，意思係［我嘅最愛］。出自香港演員吳卓羲喺泰林電器拍攝嘅電視廣告，吳卓羲用非常重嘅港式英語口音讀出［Tai Lin, My favourite（泰林，我嘅最愛）］。
。鑊
除咗指煮食嘅器具之外，亦作為量詞嚟使用，可以解做［一次嚴重嘅事件］。本來係帶有不雅嘅意思，依家已經淡化。呢句嘢係出現喺香港1940至1950年代嘅一宗輪姦案，當時嘅口供透露疑犯佢哋每次強姦受害人嘅時侯都會講一句［開鑊啦！］第日報紙即刻用［少女一夜慘被連開七鑊］做頭條，受害人更被稱為［七鑊之花］。［鑊］呢個正係由咁而出曬名。同佢相關嘅有「大鑊」、「孭鑊」。
。大鑊
係指事態嚴重，形容一件事件發展到無法承受嘅危險地步。
。孭鑊
係指揾一個人或者一小撮人為某一個過失負責。呢句嘢同［祭旗］意思相近。 普通話稱為［背黑鍋］。
。入冊
即係關入監倉，坐監嘅意思。原本係黑社會嘅術語，而舊一輩人叫坐監做［坐花廳］。
。出貓
即係作弊，尤其係指喺考試嗰陣。
。洗大餅
即係指洗碗碟。酒樓餐廳用嘅碟多數都好大隻，好似一塊大餅，所以有呢個戲稱。
。收皮
係用嚟辱罵人，著令人唔好出聲或者自動消失、咒人一世倒霉或者不屑佢哋。
。放飛機
指雙方相約好，但其中一方沒有出現。
。打飛機
係話啲男人自我安慰嘅俗稱。
。問候
係指用粗口辱罵他人。
。摟打
係指做出啲挑釁其他人嘅行為而畀人哋毆打。
。摟屌
可以講［五行欠屌］，係［摟打］嘅升級版，經常做出博人屌（辱罵）嘅行為。
。玩嘢
耍寶、作弄人、玩把戲、耍花樣、耍花招嘅意思。
。抽水
指佔人便宜，尤其係佔女人便宜為要。
。博懵
。博大霧
係指趁人冇防備而從中取利，或者係佔女人便宜。
。搵笨柒
。搵老襯
係指欺騙人哋。［老襯］除可以解做畀人呃嘅人之外，重可以解做襯家嘅人，即係同仔或女聯姻嘅對方家長。
。舐嘢
讀音係 naai2 je5。因為唔小心而得到壞嘅結果，好似誤墮陷阱、畀人呃咗丶撞咗板、受傷等等。
。拗柴
係指拉或扭傷腳、筋骨、肌肉。
。及嘢［目及］
即係指［偷窺］，及嘢係男人嘅天性，尤其係睇見啲樣靚身材正嘅性感索女，自然引嚟唔少男人嘅目光。
。條屌揈
或［吊吊捹］，讀音係［tiu4 tiu2 fing6］。本嚟意思係長條形嘅物體（例如：繩、木棒）擺來擺去，比喻啲人四處遊蕩。
。救火
。搾水
。交水費
即係話要去［小便］。
。爆石
。炖翁
。擺推
。Oscar
。整蛋糕
。辦公事
。做大事
即係話要去［大便］。
。扯旗
即係話陰莖勃起。
。吹水
係指閒聊，或者形容人哋講嘢冇憑據，亂講一通。
。收嗲
意思係指收聲閉嘴，通常會講「收嗲啦」。
。游乾水
即係搓麻將〔打麻雀〕。
。依牙鬆弶
可以讀做［衣牙鬆鋼 gong6］。唧係咬牙切齒嘅情緒或表情。［弶］係比較正統嘅寫法，讀 goeng6，係一種捕捉鳥獸嘅工具，外形似把弓。
。雞啄唔斷
係指人講嘢喋喋不休，好鬼死長氣，講唔停。
。燉冬菇
係指人做錯咗嘢，畀人降職。
。爆樽
指用玻璃瓶攻擊對方（通常向個頭部攻擊）。由於攻擊之後玻璃樽大都會爆，所以稱為［爆樽］。
。爆缸
係指畀人襲擊之後流血，叫做［爆紅］或［爆缸］。
。打機
即係玩遊戲機，玩電子遊戲。
。挑機
係指喺有對戰功能嘅電子遊戲、線上遊戲裡面，主動揾對手挑戰。
。屈機
最初係指打機嘅人利用遊戲漏洞屈打對手至無招架之力，依家都係用嚟指一啲強大得過分嘅人同事物。
。神級
即係話［勁到無人有］。
。硬食
冇法防禦嘅攻擊，迫不得已全部承受。可以延伸指喺某啲情況之下，冇法拒絕而不得已之下全部接受。
。踢爆
係指將人哋啲醜事揭發同張揚出嚟。
。秒
嚟自［秒殺］，代表喺好短嘅時間內打敗對手，可以引伸指喺好短嘅時間完成一件事情（例如做功課）。
。撻Ｑ
係指人做事［失準］，係嚟自打枱波嘅用語。
。揸Ｆｉｔ︰
係指為一啲事情負責，［揸Ｆｉｔ人］就係指負責人。
讀書時，話事果個腋下夾住藤條嗰個就係［話事］嘅人，係條藤條 fit fit 吓咁樣！
。揸流灘︰
係指人哋偷懶，做事馬虎，有欺騙成份。
。搵食︰
係話人去做嘢揾錢，為口奔馳。
。攔開
。死開
叫自己討厭嘅人唔好接近您。唔該你同我死開啲啦！
。插水
可以做俚語或者足球術語，意思大致相同，都係指扮受傷博同情。
。批個頭落嚟畀你當凳坐
係指啲人有膽量，可以用自己嘅頭嚟打賭，證明講呢句嘢嘅人對自己嘅判斷好有信心。
［形容詞］
。戇居
有［呆鈍］、［目光呆滯］同［愚笨］嘅意思，實際啲講，即係［蠢］。
。薯嘜
形容啲人愚蠢，無知；或者外表感覺呆頭呆腦嘅人。
。廢柴
可以做名詞，形容啲人冇用，好似廢物咁。
。托杉
。托柒
形容有啲行為係多此一舉；或者形容有啲人毫無貢獻。近似［把鬼］嘅意思。
。混吉
指一啲人打斷或影響人哋正常工作，需要人哋幫手處理，但係又冇對做緊嘢嘅人帶嚟幫助嘅無聊行為。
。扮蟹
形容假裝，扮嘢；收似裝傻、扮啞、扮無知、唔識扮識等等。
。裝假狗
係指由冇扮到有嘅意思，好似假胸，假眼睫，假髮等等。
。勁
形容［好厲害］嘅意思。
。九唔搭八
係指啲人講嘢完全離題，或者令人搞唔清楚。原句係［鳩唔搭柒］，後嚟係為咗消除粗口感覺而改為［九唔搭八］。
。嘥氣
。㩄氣
形容浪費氣力，徒勞無功。
。冚旗
。釘蓋
。摺埋
。瓜老襯
。賣鹹鴨蛋
都係解做［死咗］，又可以話〔瓜咗〕。
。冬瓜豆腐
。衫長褲短
源自［三長兩短］嘅溫和詞語，同樣解做死亡或者遇到嚴重意外之類。
。肉酸
形容事或物醜，即係［核突］，唔好睇，難以入目嘅意思。
。滋陰
。姿柔
。姿姿柔柔
滋陰原本意思係［用中式藥品或者補品嚟滋潤內部機能］。而喺香港嘅術語嚟講，呢兩個詞可以解做優優閒閒，慢條斯理，唔緊唔要嘅意思。
。姿整
。姿姿整整
。苛個（go6）
。屙個
。娿哿
形容嗰啲好執意顧全自己外觀嘅人，例如：只係落樓下買報紙等，都要悉心打扮先致出門嘅人；或者嗰啲經常攞住境鏡成日照，怕有粒塵喺面上嘅人。
。庹縮
庹，音［度］，唔願多出分文，吝嗇。可以單做名詞用嚟形容人。
。么心么肺
么，讀［腰］音。多數由講嘢引發，形容經常頂撞，語帶諷刺，或者挑起內心悲痛嘅感覺。
。甩皮甩骨
形容殘缺不全，唔完整嘅意思。
。搶疆
形容喺賽馬嘅時侯，馬匹唔受騎師控制而只顧發力向前衝；又畀人引申去形容女人喺做愛時採取極度主動，令過程失去節奏嘅意思。
。夠薑
形容狠辣，夠膽嘅意思。
。嚡拾拾
形容好凹凸不平嘅粗糙質感。
。齊輯輯
形容修剪得好平整；多數用喺頭髮，草坪，籬笆等一啲好雜亂嘅嘢。
。貓咗
。Wing 咗
係［醉貓］嘅省稱，意思係飲醉咗。而［wing 咗］又可以形容暈眩，或者啪咗藥［毒品］之後嘅精神狀態。
。乞人憎
形容令人討厭，經常畀人誤寫為［黑人憎］或［黑人僧］，其實同黑人冇咩關係。
。慢吞吞
形容人哋嘅動作或者行為緩慢。
。淆底
。縮沙
形容臨陣退縮，做咗虧心事唔敢承認責任。
。無得輸
形容對象強橫，唔會失敗。
。吹咩
。吹乒乓
。吹波波
。吹唔漲
。咬我食
以上嘅都係解做［奈我唔何］，［冇我辦法］嘅意思。
。串
可以做動詞或者形容詞，動詞嗰時係表示向人哋［搶白］，形容詞就係［囂張］嘅意思，另外有人會寫成呢個［寸］。
。收到風
意思係指從一個唔確定嘅消息來源（人或傳播媒體），得到一啲有意思或者無意思嘅情報。
。卡哇兒
係嚟自日文 Kawaii［可愛］嘅意思。
。Ｑ
。ＱＴ
。Ｑ版
係嚟自英文 Cute，意思都係話［可愛］咁解，而［Ｑ版］就專係指大頭嘅漫畫風格。
原：自由獵人［2013-06-19〕
廣東話俗語。廣東話資料館
' xlink:href='%23b'/%3e%3cuse fill='black' filter='url(%23c)' xlink:href='%23b'/%3e%3cpath fill='white' d='M12.162 7.338c.176.123.338.245.338.674 0 .43-.229.604-.474.725a.73.73 0 01.089.546c-.077.344-.392.611-.672.69.121.194.159.385.015.62-.185.295-.346.407-1.058.407H7.5c-.988 0-1.5-.546-1.5-1V7.665c0-1.23 1.467-2.275 1.467-3.13L7.361 3.47c-.005-.065.008-.224.058-.27.08-.079.301-.2.635-.2.218 0 .363.041.534.123.581.277.732.978.732 1.542 0 .271-.414 1.083-.47 1.364 0 0 .867-.192 1.879-.199 1.061-.006 1.749.19 1.749.842 0 .261-.219.523-.316.666zM3.6 7h.8a.6.6 0 01.6.6v3.8a.6.6 0 01-.6.6h-.8a.6.6 0 01-.6-.6V7.6a.6.6 0 01.6-.6z'/%3e%3c/g%3e%3c/svg%3e){kind=small}
所有心情：
31個回應
56次分享
讚好
回應
最相關
Eric Luk
呢個專頁應該正名港語或者香港語香港話資料館，因為所講嘅內容已經唔係廣東話資料，而係擺脫咗廣東話而獨自持續發展，蛻變成為一種更有時代感且活潑多姿的獨特語言。