為第一次婦科檢查做好準備！

定期做女性健康身體檢查係關心自己嘅表現，不過第一次就梗係有啲緊張，唔知要做啲乜、會唔會尷尬、會唔會痛、要唔要事前準備啲乜......

婦科檢查做啲乜，痛唔痛? 

通常都係取子宮頸細胞抹片進行化驗，呢個檢查係目前有效預防癌症嘅篩檢方法，以小編經驗，越放鬆感覺會越好，你越緊張，個人越繃緊，就越痛；醫生亦會用手按壓盆腔，以觸診形式檢查盆腔內有無不正常狀況，例如子宮及卵巢有無異樣，有時會進行盆腔超聲波。

另外就係乳房檢查，醫生會以觸診方式檢查乳房有無硬塊或其他問題，如果有家族病史、乳房疾病或病變的話，不妨早啲開始檢查 。

幾時開始要做?

衛生署建議25歲以上有性行為婦女開始定期進行婦科檢查。而從來無性行為嘅女性就毋須進行細胞抹片篩檢。

外國有啲地方則建議21歲以上開始做婦科檢查，除非出現咗特定健康問題。其實每人情況都唔一樣，最穩陣就係同家庭醫生仔細商量，如果家族歷史患某啲疾病嘅風險較高，就要俾佢知道，有咩疑問、唔明，就問清楚先預約幾時、做邊啲檢查，唔好自己亂咁估。 

婦科檢查事前準備

· 咁啱經期嚟就改期好了，因為會影響婦科檢查嘅結果，檢查起嚟亦唔方便。 

· 如果無相熟嘅婦科醫生，不妨請家庭醫生或朋友介紹。

· 去到醫生會了解一下你嘅嚟經狀況、家族病史等等，最好事先自己go through一下，唔使到時答到一嚿嚿。

例如幾時第一次嚟經、上次經期幾時嚟、一般經期量多量少、嚟經時有無咩唔舒服、有無同乳房或子宮問題嘅家族病史、幾時開始有性行為、用咩避孕/安全方法等。

· 有咩疑問，不妨向醫生了解清楚，例如邊啲檢查建議幾耐做一次、喺咩情況下需要做超聲波、邊啲避孕/防止性傳染病嘅方法較適合你、需唔需要打預防針等等。

最重要係放鬆，盡量放鬆，咁個檢查都會做得順利啲，緊張就深呼吸幾下，等自己鎮定落嚟。太緊張的話，不妨搵個伴陪你去，雖然佢喺外面等你，但個心都會定啲架！