M碼變XXL 張繼聰激變180磅大隻佬

張繼聰（阿聰）向來操得一副健碩身形，不過他前晚出席hmvod原創劇《向西聞記》煞科宴，明顯暴脹兩個碼，原來他為拍新戲努力增磅，餐餐食飽飯，成功由145磅肌男變成180磅肥仔。

阿聰前晚偕胡杏兒、趙永洪、王宗堯、鄧健泓及石詠莉等，出席劇集煞科宴。阿聰正準備明年二月拍攝一部拳擊電影，在戲中飾演拳手︰「我需要增磅同健身，依家要不停練大隻啲，直到開拍之前，會減番十零廿磅。早幾年（保持身形）成日捱餓，依家終於有飽飯食，我都幾享受。」

阿聰表示目前手臂15吋半粗、胸肌接近44吋，腰圍亦有30多吋，一身腹肌已消失無蹤。「我啲衫要買過晒，由中碼變到加加大碼。我身上嘅綫條都隱藏咗、休息緊，連最近我拍咗個廣告，網民竟然以為我將個頭key咗落第二個身，問我做乜文戲都要搵替身。我自從十零歲後，都未試過畀人叫肥仔。」

他除了演出新片外，還會參與劇本創作，他自言花了兩年時間準備角色。「我目前跟教練去練大隻同練拳，不過教練所教嘅打拳動作，係佢十歲時已經做，我都30、40歲，我連就咁企喺度同戴拳套都覺得攰。」他為免撞電影題材，之前有人邀請他拍攝MMA電影，他也推掉片約。

杏兒內地拍戲小心簽約

同場的胡杏兒，在《向西聞記》跟阿聰大演對手戲，她說︰「阿聰喺劇中會講粗口，我都有少少粗魯，如果角色需要，我都可以粗魯少少。」提到內地忽然爆出演員簽「陰陽合約」逃稅風波，近年多在內地發展的杏兒說︰「一定要小心，我同公司一直都循規蹈矩，所以唔擔心。不過我依家較少返內地拍劇，主要係唔捨得離開小朋友。如果相隔太耐同太遠，可能會安排小朋友返內地探我。」

撰文︰Pauline

編輯︰李潔盈

美術︰梁政敏