張祺忠殺妻案 庭上解釋藏屍原因「我唔想揼咗佢」 | 蘋果日報

張祺忠殺妻案 庭上解釋藏屍原因「我唔想揼咗佢」

更新時間 (HKT): 2020.11.16 22:03

港大機械工程系副教授張祺忠被控謀殺於高等法院受審,日前在庭上親述殺妻經過,他今繼續作供,供述事後藏屍過程。張稱屍體原本藏於行李箱並放在宿舍,但因他估計警方很快會找到,因此自製木箱並把藏屍行李箱運到辦公室。辯方大律師問為何選擇辦公室,張回答時顯得激動難耐:「因為我唔想揼咗佢……我唔想揼咗佢落海,或者揼咗佢喺垃圾站……」

被告張祺忠(56歲)承認於前年8月17日凌晨在港大偉倫堂1601室睡房內,殺死妻子陳慧文。辯方稱是誤殺,但控方不接納。張上周供稱,案發後用兒子房間外的藍色行李箱藏起屍體,及後放回原位。

張今透露,曾把屍體轉換到三個位置。8月17日早上7時45分他離開睡房後,為免被人發現妻子死了,故向妻子胞妹說「你家姐好似出咗街喎」,食早餐後他駕車載兒子上班。他回家後無人在家,遂把屍體從兒子房外的行李箱,換到客廳外顏色帶綠的行李箱,並放到少人踏足的露台,「等啲人唔好話隨意拎走個喼呀,或者打開個喼睇囉」。

被問及處理屍體計劃 張:「見步行步囉」

辯方大律師問張當時有何計劃,張說其實沒有,「見步行步囉」。到8月18日,張到木材店購買木板,製造木箱收藏行李箱,「因為夏天嚟嘅,好快個屍體就會發出異味㗎喇,所以打算用木板做個箱」。

早前證供指,死者胞妹發現死者常穿的鞋放在屋門外,後來不翼而飛。張今承認8月20日下午把妻子的鞋丟棄,「想造出個假象佢出咗去囉,即係離開咗屋企,去咗第二度旅行咁」。 同日晚上他和女兒報警指妻子失蹤,報案前他把藏屍木箱搬到住所外的升降機大堂存放。

張續說,8月21日很多警察到偉倫堂調查,「我知道好快就會喺16樓嘅大堂搵到個箱,所以22號上晝我就想搬走佢」。辯方大律師問張,為何選擇搬到辦公室。張此時顯得激動,答謂:「因為我唔想揼咗佢……我唔想揼咗佢落海,或者揼咗佢喺垃圾站……」身旁的懲教員遂為張遞上紙巾。

張於22日搬運木箱時,在停車場遇上警察,警察曾問他箱內有何物。張稱相信警方很快會查問木箱下落,故翌日再買木板,製造第二個箱再拆解,警察查問時便說已經拆掉。

「如果我搵拖鞋嗰陣唔係攞咗條電線 事情就唔會發生」

張同意大狀形容,那幾天活於謊言之中,自言感覺十分辛苦,「因為啲仔女同埋我姨仔係不停想搵返阿Tina (死者),我又要扮同佢一齊搵,咁我又扮唔到好焦急嗰個神態出嚟」。他亦知閉路電視已拍下他搬運木箱,「咁好快都畀人知道㗎喇,我就諗過得一日得一日」。

警方於8月28日在張的辦公室內發現藏屍,以涉嫌謀殺罪名拘捕張。對於警員早前供稱臭味很大,張今稱:「我自己唔係好覺。」

日前張憶述殺人過程,聲稱被妻子責罵和踢落床後,本想拿拖鞋離開睡房,卻在床下底摸到電線,遂拿來勒妻。張今哽咽地稱,被捕還柙後回想當時,「咁我最初成日諗嘅就係,如果我搵拖鞋嗰陣時,如果我搵到拖鞋,而唔係攞咗條電線嘅話,事情就唔會發生㗎喇。呢個諗法我諗咗好耐,一路喺收押所嗰度……」

對於案發後他的種種謊言,張說:「我係想逃避,但係當然亦都背棄咗佢哋嘅信任啦,我係覺得好羞恥。」張欲講述子女到收押所探望時的感受,不過法官向辯方大狀示意不必問。控方開始盤問張,聆訊下午繼續。

【案件編號:HCCC292/19】

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner