張曉明盡訴心中情　傳媒老總大豐收

港澳辦主任張曉明上周曝光率爆燈，上周三與駐京記者遊園摘蘋果，又去見訪京團老總。其實張曉明作風有剛有柔，柔起上來頗有創意，最經典係佢接見湯家驊，兩個男人一齊去賞櫻花，呢個浪漫之舉，可以趁機帶湯家驊談公事之餘，又能睇下內地人生活幾開心，等少返內地的泛民人士感受內地發展同人民生活。

上星期特色活動「摘蘋果」，既有時令因素，似乎亦別有心意，據講這個時候的蘋果口感甚好，摘之食之正係時候。

若講到內容之精采，都係佢去見訪京團老總，聽講期間佢差不多講咗個幾鐘頭，之後同大家食飯。由於隨團唔少係中英談判時候已經到內地採訪的老行尊，大家已經相熟，氣氛份外熱烈，大家暢所欲言。

張曉明在座談會裏，提到好多香港敏感問題，佢提到港獨問題時，強調港澳辦扮演「一國兩制」守護者嘅角色，最初防止內地干預香港運作，現在開始加強另一個角色，係「一國守護者」，正回應習近平說要注重認識問題的重點，時時調整方向。現在有些人將處理港獨同新聞、言論自由扯上關係，認為中央有收緊，其實呢啲行為是違法行為，所以必須取締。

提到廿三條立法，張曉明更加講得有感受。佢話作為港澳工作者，廿三條立法不能完善，都覺得羞愧，所以好支持林鄭在廿三條工作上的表態，希望在適當時間完成立法，令基本法全面實施。佢亦講到呢次訪京團提到的「基地論」，要防範外國勢力將香港變成牽制內地發展的棋子，這說法在一九八二年八月鄧小平已經提出，其後在不同場合，會見不同團體反覆講過。所以今次有中央領導人會見訪問團時，善意提醒是完全有必要的，沒有甚麼值得大驚小怪。

今次張曉明會見各老總時，明顯將中央對香港時局的分析、睇法盡訴心中情，老總聽後對時局了解大增，從政治新聞的角度來看，可以說是「大豐收之旅」。

上周一班傳媒老總到北京，獲港澳辦主任張曉明（前右七）接見，對本港時局交流意見，老總們收穫豐富。

張曉明（右）席間提咗好多香港敏感問題，包括港獨、廿三條立法、「基地論」。

張曉明帶訪京團去遊園摘蘋果，據講這個時候的蘋果口感甚好，摘之食之正係時候。

電視劇《延禧攻略》熱播，真正嘅延禧宮亦因此成為故宮必睇嘅景點。

故宮有文物醫院，這個西洋鐘維修後有機會運來港展出。

上星期香港傳媒訪京，除了會見領導人，仲去了參觀故宮、中科院、高鐵控制中心等。