香港文匯報訊（記者 阿祖）張敬軒今日（20日）出席健康食品活動，趁着「520」這日子，軒仔不但多次向圍觀約三百位粉絲做心形手勢，更向十位粉絲贈送禮物及送上每人一個擁抱，現場不時傳出興奮的尖叫聲。

軒仔表示今日「520」並沒有約會，但約定了粉絲見面，而他連續擁抱了十位女粉絲，也算是享盡艷福，他笑說：「咩size都試嚇嘛，覺得佢哋都好食好住，其實今日係示愛嘅大日子，我咁大個仔都係第一次有人對我講話養起我，真係突然『不想努力了』，要即刻俾我個銀行戶口佢！」問軒仔入行以來又有否被人問價包養？他笑笑口說：「咁又無，但我反而問過人價，因以前我做過agent (代理人）公司，要向藝人問價，不過並唔容易合作到，富豪飯局嗰啲我就無聽過，我都不在射程，唔係目標範圍之內！」

軒仔將於6月初在會展舉行11場演唱會，他表示日內再出席完活動之後，便會閉關為演出做準備。由於吸收過上次演唱會中途染疫的狀況，今次他不容有失，所以近期都推掉一些工作，加上最近疫情有再爆發跡象，身邊亦有同事中招，要以身體為先，要多休息吃保健品再排練，他指最近都有很多好看的演唱會，因此自己都要努力，為個唱加入新元素，包括唱新歌和更新演出流程，礙於不想個唱中途再出事，他會盡量保持與歌迷多互動，但會仍取消握手環節，亦不會去收花和禮物：「冇辦法啦，依家除咗COVID仲有流感，我一定要保證演出嘅狀態，要對觀眾負責，會打醒十二分精神。」他又指剛安頓好父母來港居住，希望他們先適應香港的生活，但也會想父母來捧場。

軒仔透露今次個唱暫不考慮邀請嘉賓，而他早前已開始操肌，他苦笑說：「脹嚇又縮嚇，有時我去跑步，今次會有少少舞蹈，但一出汗個人又細隻返，我喺Tyson嗰度操，我諗佢都好無奈，不過好好似教練咁會叫我起身做運動，但就唔會以佢為目標，因為年紀唔同。」操練後會否在台上騷肌？軒仔笑說：「盡人事，希望唔影響市容，我都係以歌會友，呢啲留返俾後生。」

軒仔的演唱會門票，最近一樣有黃牛黨炒賣，他無奈一直未有方法杜絕這種現象，暫時只能開放歌迷會、增加網站容量及增加工作人員為歌迷處理門票買賣，他指去年演唱會四個人要處理7000張門票，現在只能增加人手和科技去做，但這都是計錢，希望下次能做得更好。