曾包場睇《你好，李煥英》！范丞丞有眼不識張小斐成熱話

范冰冰細佬范丞丞近日都有入戲院睇大熱電影《你好，李煥英》，仲要包場添，真係好有心。不過喺尋晚播出嘅內地綜藝節目《王牌對王牌》中，佢就突然面盲，竟然認唔出片中女主角、飾演李煥英嘅張小斐個樣，而「范丞丞回應沒認出張小斐 」更成熱搜話題。

話說節目中畀咗張小斐張相范丞丞去認，佢即呆咗亂咁答係「張偉」，要在場《李》片另一女主角賈玲提醒，先答到相中人係張小斐，賈玲即寸佢：「你不是包過場嗎？」搞到范丞丞鬼咁尷尬。

有眼不識張小斐如今成為熱話，范丞丞今早即喺社交網留言：「照片没拍出小斐姐真實美貌，一場不行我就再去包一場！」唔少網友都話佢答得好，留名等睇佢再包場。