八達通卡儲值限額增至$3,000 點解我唔索性用信用卡畀錢？

八達通卡係港人日常生活中已經係不可或缺，好似搭車、買嘢、食飯都有機會用到，特別係港鐵優惠、月票、政府交通補貼都要係八達通卡交易先計算。近日八達通公司宣布將今年10月1日之前發出嘅八達通卡，儲值額由1,000蚊增加至3,000蚊，即係市民以後可以買到大額商品，唔怕負錢，至於每次增值幾多錢，仍然由市民自行決定。

通脹勁 八達通金額好快用晒

八達通卡發行超過20年，大家都感受到近10年香港物價升得幾勁，你中午食快餐已經40幾蚊，過海返工來回車費隨時要30幾蚊，基本上1,000蚊儲值額喺𠵱家環境好快用晒，用晒嗰時要到處搵增值地點。八達通公司𠵱家先提高儲值額其實算遲，叫做有好過無。

點解咁遲先改？有網民係討論區就話，主要係機械問題，唔少增值機、收費機仲用緊舊Model，只可以顯示3位數、同埋兩個小數位金額，如果唔係會有Bug。

用信用卡有更多優惠

就算係咁，八達通卡已經失咗市場先機。首先，好似3,000蚊呢啲大額金額，好多人係用開信用卡畀錢，有人話八達通優勢係小額支付，但兩大信用卡公司推出Visa payWave、MasterCard PayPass非接觸式支付，小額支付一樣可「嘟卡」，付款速度未必夠八達通卡快，但唔算慢到離譜，而好多商戶已經廣泛接受信用卡非接觸式支付，只係未到公共交通工具有啫。

【延伸閱讀】本地及海外簽賬現金回贈　邊張卡最多最抵用？

更重要係信用卡零售消費有折扣，又有積分儲，所以信用卡近年使用優勢係高過八達通卡好多。雖然八達通卡自動儲值一樣有信用卡積分儲，但𠵱家普遍係每增值6蚊只有1分，相比信用卡消費1蚊有1分，就差太遠了，除非你識得用某幾張專為八達通卡自動增值設計嘅信用卡。所以積臣𠵱家多咗用信用卡畀錢，賺回贈、積分嘛，積小成多！

隨着移動支付科技發展，唔少手機支付公司已經進入香港市場，挑戰八達通地位，八達通推出o'epay迎擊，但積臣眼見用AlipayHK、WeChat Pay HK仲多過用o'epay。

【延伸閱讀】信用卡積分都會過期？信用卡的積分有效期比併

負錢限額亦要改

除了改儲值額上限，積臣認為負錢限額亦要改，𠵱家設定最多係負50蚊，但只能負一次，50蚊𠵱家只夠一餐飯錢，但當要幫其他人一齊買飯，真係唔夠用，除非你有用到八達通卡自動增值。講起自動增值，雖然自動增值已經推出好多年，積臣起碼都用咗4年了，但積臣仲見唔少人係「嘟」完後先知負錢，急急腳走回頭搵增值地點，如果係上咗巴士就更麻煩，一係摷有冇散銀喺身，一係問人唱散紙。

雖然今次八達通卡「擴容」，但要留意只有指定嘅商戶先可以接受到3,000蚊交易，所以暫時使用範圍亦都有限。

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。