Hailey:你好我叫hailey,我儲強積金都儲左差唔多10年啦，中間都轉過幾份工嘅。跟住又有做吓少少整合，本來有三至四個強積金戶口，但經過整合之後，而家得返兩個戶口，一個係匯豐，一個係宏利。但其實我平時都好少買股票嘅，就算買，都係朋友推介一啲冧巴，人哋叫我買就買少少囉，自己錢都唔多。近年成日聽到朋友講，話匯豐強積金唔係咁好，其實我都唔知啊，因為我都冇乜點理自己嘅強積金嘅。你問我我匯豐戶口買咗啲乜，我本來都唔知啊，搵咗好耐，依家先知道原來匯豐係買咗恒指基金，同埋….
Kat:你買香港股票基金，就唔好幫襯匯豐強積金啦，聽人講香港股票基金係永明彩虹計劃最出名㗎喎，好似我咁就買咗永明彩虹計劃，我仲揀咗佢最出名嘅香港股票基金添，香港股票基金雖然近年表現都唔係咁好，但係今年年初，就升得好好，不過最近又升又跌咁唔知點，我都有諗過轉返啲防守性既基金。但都仲睇緊囉。另外，我仲揀咗彩虹計劃內既進取基金…
Yoyo:彩虹計劃嘅香港股票基金曾經係出名，但係講緊之前嘅事了，近幾年，佢表現只可以用中規中矩來形容啦。而且彩虹計劃入面係冇美股嘅基金，好似近幾年，美股一直表現唔錯，彩虹計劃就冇呢個選擇啦，買唔到美股基金。
Kat: 佢無美股基金我都知啦，但彩虹計劃入邊隻行業基金屬環球股票類別嘛，入邊d股票大部份都係美國股票，雖然唔係完全百分百係美國股票，但我估表現同美股基金都相似啦。而且我仲揀咗佢嘅進取基金，入邊除咗股票仲有債券，但都係以股票為主，都有大部份係美國股票㗎。（錯）（片尾，醫務室）
Hailey:你哋不停講，都唔俾機會我講嘢嘅，等我講埋先啦。我揀港股基金嘅原因，係因為住喺香港，感覺上好似熟悉啲，知道下嗰個地方發生咩事。哈哈，但其實我平時都冇乜睇財經新聞嘅，你問我股市好定唔好，我都唔係好清楚啊。
Yoyo: Hailey,你咁樣係唔啱㗎，買基金，唔係一定要買你住嗰個地方嘅股票基金，因為可能你熟悉嘅嗰個國家或地方，嘅股票回報，因為地方嘅政治經濟同政策等，會令到股市表現未必及得上全球其他地方嘅回報，如果唔放眼世界，呢個叫做home bias,中文譯做本土偏好。比如你啲強積金，如果你只買香港股票基金，大家睇返就知道，近幾年香港股票基金一直表現都唔係幾好，但係如果你睇吓世界其他地方好似美國股票基金，或者去年嘅大中華股票基金，都有非常之唔錯嘅表現。
阿Kat,你話永明彩虹計劃的港股基金今年初升得唔錯，但係你冇講早幾年佢一直都浮浮沉沉，但其他類別就一直升，所以佢都落後人哋好多呀。
Kat: 阿yoyo,你咁多嘢都講到咁頭頭是道，好似識好多嘢咁，咁就想問吓你喇，咁你用緊乜計劃呢？又揀咗咩基金呢？
Yoyo: 哈哈，講嚟就好笑啦，雖然我好似好多理論都識咁，但我一向都無乜理我啲強積金，公司用邊間我咪用邊間囉，所以轉工就多一間，所以現在我都唔知有幾多間呀。久唔久就會收到嗰啲強積金公司寄來嘅通訊或者意見，我都冇乜點睇，強積金喎，咁耐之後嘅事，都唔知睇黎做乜。投資賺錢儲錢，不如靠自己好過啦。其實剛才同你講嘅，都係嗰啲投資嘅基本知識，我寧願自己做多啲投資，買下股票，買下外幣、買下樓。其實啲強積金，賺咗又攞唔到出嚟嘅，d人連移民想攞出黎用都攞唔到啦。我啲強積金戶口，部份連密碼都唔記得咗添呀，真係擺咗咁耐，就冇掂過，入面d錢又唔係多，同埋都唔知自己65歲時會點，所以啲強積金公司，寄咗啲資料黎，我都係放埋一邊，有啲睇都冇睇。
Hailey:佢就咁睇都唔睇好咩？嗰啲都係你自己嘅錢嚟㗎喎，雖然暫時唔多，但積少成多，你自己點都要睇吓掛！我都有朋友叫我做整合，所以現在只有兩個戶口，除咗匯豐之外，仲有宏利。宏利個戶口，我就乜都有啲，進取又有，混合基金又有，股票基金又有，環球債券又有，盡量乜都買啲，盡量分散丫，當然仲有佢最獨特嘅康健護理基金啦。
Kat:你太過分散都係唔好㗎，好似我咁，除咗買香港股票基金之外，就係買咗大中華股票基金，係舊年，就升左好多呀，但次次都係升咗之後，就唔知點做，要轉走，又驚太早贏少左，唔轉走，日日又驚跌。
Yoyo: 使乜驚跌呀，睇長線d嘛。如果你好驚風險，咁你不如買債券，無股票咁波動，起碼唔洗驚蝕錢。（錯，環球債券並不是最保守，債券都會跌，好似近月的情況）
Kat:今次MPF醫務室搵我地，就係想追蹤一下我哋嘅強積金戶口，喺未來嘅變化，順便可以睇吓唔同人嘅投資風格喺未來一段時間嘅表現。阿z呀，你雖然有好多間戶口啦，不如你講吓你最大份嗰份係儲咗係邊間啦。
Yoyo: 我搵咗一輪先發現，我最大嗰份係喺aia呀。我都冇乜理，我次次轉工，一填強積金張form時都會揀一啲混合類別，股票比較多嘅基金，另外例牌會揀埋啲大中華，美國，歐洲亞洲股票。
醫務室：其實一般既混合基金：根據MPFA既分類，主要用股票比例來分類，主要分為4種，100-80，80-60，60-40，40-20。而kay講佢揀左既永明進取基金，其實全名係永明強積金增長基金Sun Life MPF Growth Fund，屬於混合資產類既61%-80%股票類，
佢既投資範圍係股票可投資50%-90%。而係2020年底時佢既股票比例就有近80%
至於kay講既混合類內既股票多數係美國股票都唔係好岩，因為混合類基金內有股票有債券。當中既股票既地區分佈同環球股票唔同，混合基金既股票既地區分佈約有20%係港股，只有約15%係美股。留意我哋，遲啲我哋再拍片詳細同大家講這個話題啦。
係永明既fact sheet我哋睇佢既十大持倉都係熟口熟面既港股多。
Kay有講永明既行業基金同美股基金表現相似，我哋就比較一下。永明既行業基金係2017年底由佢前身既環球股票基金轉變面成，我哋就由2018年開始睇佢同環球股票既類別平均，同埋美股基金既類別平均比較一下啦。
係圖中我哋見到，永明隻行業基金，對比於環球股票基金裏面嘅平均數，表現一直都差唔多，有時仲比類別平均好，但如果同美國股票基金類別比較，就見到美股基金類別嘅平均數，喺2018 ，19年同20年都表現較佳。都可以見到，環球股票類既基金表現同美國股票類既基金表現不盡相同。
Yoyo有講買左環球債券基金唔會蝕錢，咁係唔準確，因為環球債券基金既基金價格係會有升有跌，。我哋睇返圖，咁多年來，環球債券類別既平均表現都有唔少年期係跌嘅。
kat就有揀一啲比較出名既基金來買。而yoyo就好少理佢啲強積金，但都係比較多揀股票類既基金。下周佢地會討論管理強積金同整合強積金，同埋公開佢地的基金持倉分布。
大家又有冇覺得邊個既想法做法同自己最似呢？你哋既做法又係點呢？可以留言講下
