【Emily】回收木設計家具 貼心廚櫃書枱惠基層 - 20210209 - 港聞 - 每日明報 - 明報新聞網

港聞

港聞二

【Emily】回收木設計家具 貼心廚櫃書枱惠基層

【明報專訊】唔少居住舊區嘅基層家庭生活空間同負擔能力有限,未必買到新家具。市建局連續4年舉辦「升級再造」家具活動,由職員伙拍大學院校學生組成義工隊,運用回收木材為有需要家庭「度身設計」家具,本年度有18個家庭受惠,包括6個係市建局土瓜灣重建項目範圍內嘅住戶;計劃至今共有51戶受惠。

市建伙大學生組義工隊

當中70幾歲嘅黃婆婆受重建影響,目前獲安排住喺土瓜灣社會房屋,但一直欠缺獨立廚櫃,要將米、麵等食物放喺地上嘅桶,要長期彎身拎糧食。4名科大學生聯同市建局職員舊年10月探望黃婆婆,了解佢嘅居住環境後,決定用回收木材為佢度身製造一個4層高廚櫃,每層層板都設有滑軌,方便拉出拎嘢,而頂層右邊亦預留空間,可以放置防蟲嘅按鈕式米缸,方便煮食。黃婆婆收到新廚櫃後好開心,話原先以為係普通木櫃,無諗到咁貼心啱用。

另一戶郭女士嘅家庭原先居喺土瓜灣庇利街/榮光街重建項目內一個舊單位,現搬去同區另一唐樓單位,屋企一直無書枱畀兩個仔學習,佢哋只能夠喺牀架上放置木板充當書枱。6名港大學生聯同市建局職員製作咗一張摺合式書枱,令兩人都享有合適嘅學習空間。

上 / 下一篇新聞