廖啟智患癌︳半生受盡挑戰 幼子5歲血癌逝世 長子曾反叛 太太患抑鬱症

兩度贏得香港電影金像獎最佳男配角嘅廖啟智，最近傳出患上胃癌嘅消息。智叔回應時承認身體不適，話自己「年紀大機器壞」，並且辭演新戲，但就未有交代病情。

66歲嘅智叔演技爐火純青，戲外更加係好丈夫好爸爸，但係歷年來家庭遭遇唔少難關，今次更輪到自己面對病魔，希望智叔早日康復！

廖啟智1979年考入TVB藝訓班，後來與同班同學陳敏兒拍拖，1987年結婚。婚後智叔同敏兒育有3個囝囝，本來一家五口幸福美滿。2003年，當時3歲嘅細仔文諾發燒久久未退，後來證實患上血癌。治療過程令文諾受盡煎熬，智叔夫婦當然更唔好過。有一段時間佢地一家搬入沙田以方便送文諾去威爾斯醫院，智叔更要兼顧工作同照顧三個仔，朝早送完返學之後再去醫院，夜晚去電視台做主持，凌晨時份收工，日復一日。文諾病情反反覆覆，最終喺2006年4月逝世。

文諾患病令家人都要面對自己嘅難關，陳敏兒一度患上抑鬱症。而喺照顧文諾期間，夫婦壓力爆煲時有磨擦，加上無時間照顧另外2個仔而感到內疚，令敏兒情緒問題更嚴重。後來靠朋友支持同信仰先撐過去。

而今年26歲嘅智叔大仔文哲，青春期間曾經變得反叛，喺社交平台自post易服照，而且聲稱想做女人，又試過食煙飲酒蒲天光。智叔夫婦後來出面澄清，解釋文哲因為父母偏心細佬先至做啲嘢引人注意。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！