愉景灣酒店 Monchhichi Staycation包下午茶+曲奇班+早餐
資料、圖片授權：澄兄湜弟 |編輯：TLY
Monchhichi露台海景房
原本Book海景房，因為極想要望海景嘅大浴池。去到發現今個月開始Monchhichi主題，即時加錢upgrade，無懸念！2pm 開始check-in，我哋大約 1.45pm 到，好好彩仲有Monchhichi房間，仲攞到惟一一間有露台嘅海景房！一出電梯已經入咗 Monchhichi 世界，牆上仲有幾幅Monchhichi 環遊世界嘅掛畫，唔放過先打卡打卡。房間充滿Monchhichi怖置，床上cushion、露台的門、鏡、浴室都係貼滿夏日風格。
仲有一隻Monchhichi公仔喺沙發休息，酒店送咗Monchhichi拖鞋、紋身貼紙、沙灘玩具及 沙灘蓆。我哋即刻開晒嚟玩，一家四口都貼晒 Monchhichi嘅紋身貼紙。
Cafe下午茶
休息一陣，3pm就去食酒店Cafe下午茶，Monchhichi房包埋，好細心，有Monchhichi口罩套及圍巾畀我哋用。Cafe 佈置當然都係Monchhichi啦！意外地下午茶餐好多選擇，自選冷麵、小食、水果等等，超多款式嘅甜品好好食，仲好靚。
Monchhichi cooking class
4.15pm去上Monchhichi cooking class，小兄弟親身整Monchhichi曲奇，廚師預先搓好麵團，我地只係轆平及吸模，但已經令小朋友好忙好忙！哥哥講咗好多次「好好玩」，媽媽都表示好滿足！
沙灘
5.15pm 出發去沙灘！由酒店行去只係15分鐘，計埋兩兄弟邊行邊玩嘅時間。玩到7pm 就返嚟同Monchhichi泡泡浴，一家四口一齊浸都得，仲可以望住夜景，大人細路都超開心！去附近食完快餐，返到房再玩一陣Monchhichi幻燈片燈先瞓。
泳池
爸爸7am起身去預約第一節 (7.45-8.45am) 泳池，小朋友一起身就可以再去玩水。雖然小朋友嬉水池無開，但大人池邊有個位置好淺水，好啱小朋友玩水，兩兄弟終於下水禮，同爸爸潑水已經玩到傻。返上房間再浸浴過水，一個Monchhichi浸池，早晚唔同景觀，兩種享受！覺得好抵！
套房包兩位大人早餐
預約10am食早餐，套房包兩位大人早餐，澄兄身高超過90cm，只係加約 $92（連加一），都合理。11am check out，我哋把握最後機會，去埋兒童遊戲室玩。不過，比較啱大小朋友，有籃球機、遊桌球、氣墊球、街機等，爸爸第一次同兩兄弟一齊打街機。然後，梗係去埋玩Epicland 喇！
