隨住網上社交平台興起，做網上名人（KOL）成為一門致富新出路。工聯會業餘進修中心食住個勢，推出新課程「網絡紅人（Key Opinion Leader）全攻略」，學費700蚊上6堂，教人「了解中國KOL市場及當中的奧妙」。
工聯會喺課程簡介中提到，香港KOL行業發展蓬勃，國內直播行業發展「更為迅速及興盛」，導師就會由淺入深，幫學員了解中國KOL市場。
睇埋課程內容喇。除咗介紹本港及國內「KOL進化史」、講講兩地直播分別之外，導師亦會傳授如何使用直播工具（即係電腦、電話），以及直播時有咩嘢要注意等等。可能因為課程旨在教大家攻略內地市場，當中有專節講解「國家於網紅上的政策」，各位日後北上搵真銀時就唔怕犯禁。
「網絡紅人（Key Opinion Leader）全攻略」由9月15日開始，連續6個星期六上午9點半開講，每堂3個鐘，最後一節有考試。如果學員出席率達八成或以上，而且考試合格，可以收到一張證書。
特首林鄭月娥上任後一直話，要推動香港創新科技產業，班官睇落就好積極推動各項措施喇，工聯會呢次亦發力順應科網潮，各位有無心郁郁想參加埋一份？嚟緊星期日（6月10日）上午11點以下晝2點，工聯會土瓜灣業餘進修中心有簡介會，心動不如行動喇喂。
其他報道：【短片：網上熱話】行山友組團上山猛摘楊梅 爬上樹狂搖樹枝網上晒「戰利品」